Гэрээ орчин үеийн засалтай болгохын тулд бид юуг анхаарах ёстой вэ?

Өөрийн гэр орныг тохижуулах тал дээр санаа зовдоггүй өрхийн тэргүүн, тэр дундаа эзэгтэй нар байдаггүй гэдэгтэй уншигч та санал нийлэх байхаа. Тэгвэл Монголчууд бид хувьсан өөрчлөгдөх дуртай хүмүүс. Тиймдээ ч тэрүү өөртөө болон өөрийн гэр орныг орчин үеийн шийдэлээр цаг үедээ нийцүүлэн засч янзлахыг илүүд үздэг. Гэрээ хэрхэн яаж янзлах мөн ямар тавилга тавибал илүү зохимжтой тал дээр танд дөхөм болох үүднээс “Демастер” компанийн захирал Б.Алтангэрэл гуайг урьж оролцуулж байна.

Манайхан гэрээ засахын тулд нилээдгүй мөнгө зарцуулдаг нь нууц бишээ. Харин үүнийг зөв зарцуулахын тулд иргэд маань юун дээр эхэлж анхаарах ёстой байдаг вэ?

Манай Монголчууд маань ерөнхийдөө Европ сэтгэлгээтэй хүмүүс байдаг. Энэ нь өөрийн гэр орны дотор, гадна заслыг хийлгэж байхад их ажиглагддаг юмаа. Тийм болохоор гэр орны тавилга болоод гаднах үзэмжиндээ барууны загварыг их ашигладаг. Ер нь тухайн хүн гэрээ өөрчилөхөөр шийдсэн бол хамгийн эхлээд холбогдох сэтгүүл, сонин, нэвтрүүлгийг үзэх хэрэгтэй байдаг. Ингэсний дараа тодорхой мэдлэгтэй болдог. Мэдлэгтэй болсон хүн мэргэжлийн хүмүүстэй ярилцахад дөхөм болхоос гадна өөрийн сонголтоо хийхэд нэмэр болдог юм.

Танай компаниар олон хүмүүс үйлчилүүлдэг. Эдгээр хүмүүс дунд би ийм л загвараар хийлгэе гэж орж ирэх хэрэглэгч байдаг уу?

Байлгүй яахав. Ер нь манайд  хандаж байгаа үйлчлүүлэгч 3 төрөл байдаг. Нэг дэх нь интрьер, экстерьерийн тал дээр огт мэдлэггүй хүн орж ирдэг. 2-дах нь нилээн юм  судалцан тодорхой чиглэлтэй болцон байдаг. 3-дах хэрэглэгч  нь ерөөсөө би та нарт даатгана. Та нар л мэдээд хийчих гэдэг. Ийм 3 төрлийн үйлчлүүлэгч орж ирдэг дээ. Би түрүүн хэлсэн дэвсгэр мэдлэгтэй байвал бидэнд хамтарч ярилцаад хийхэд амар байдаг юм.

Байраа засварлахын тулд эхлээд тухайн хүн  мэдлэгтэй байхаас гадна өөр юуг анхаарах ёстой вэ?

Мэдээж хамгийн чухал нь төлөвлөгөө. Та байраа засахаар шийдсэн  бол эхлээд сайтар төлөвлөх хэрэгтэй. Тухайлбал, өрөөнүүдийн зохион байгуулалт ижил байх уу, үгүй юу гэдгийг урьдчилан бодох шаардлагатай. Сүүлийн үед хүмүүс  том бөгөөд олон өрөөтэй байр сонгодог болсон байна. Тиймээс цөөн өрөөтэй байрандаа өргөтгөл хийх нь элбэг болжээ. Ер нь хүн өөрийнхөө  тав тухыг хангасан байранд амьдрах нь юу юунаас илүүг санах хэрэгтэй. Монголчууд гадны хүн орж ирэхэд зориулж байраа засдаг нь ажиглагддаг. Гэтэл энэ нь буруу сэтгэлгээ юм. Өөрийн засварласан байрандаа та л амьдарна гэдгийг санах  хэрэгтэй. Тиймээс бусдад биш танд тавтай байх нь чухал юм шүү.

Байраа бүрэн засварлахын тулд аль өрөөнөөсөө эхэлбэл зохимжтой вэ?

Байрныхаа засварыг гал тогооноосоо эхэлж хийдэг юмаа. Аливаа байранд бүрэн засвар хийхэд хамгийн их зардал шаарддаг зүйл бол гал тогоо ариун цэврийн өрөө байдаг. Гал тогоонд гэхэд л уур сорогч, хөргөч, аяга таваг ариутгагчаас эхлээд зурагт гээд гал тогоог бүрэн тоноглох нь  эхний  алхам. Энэ нь инженерийн шугам  сүлжээний ажлууд их байдагтай холбоотой. Мөн өрөө бүхэн нэг системд холбогдсон байх нь юу юунаас чухал юм.

Хүмүүсийн бас нэг санаа зовдог зүйлийн нэг бол тавилга байдаг. Тэгвэл сүүлийн үед ямар тавилга моодонд орж байна вэ?

Барилгын интерьер дизайны чиг хандлага Ази, Европ гэж хуваагддаг. Энэ нь хүмүүсээс  биш тухайн газрын цаг агаараас шалтгаалдаг. Сэрүүн ууур амьсгалтай орны иргэд модон тавилга сонгодог. Мод өөрөө дулаан чанарыг илтгэдэг учраас тэр юм. Харин чулуун шал, хана сонгож буй  хүмүүс нь дулаан оронд амьдардаг бөгөөд чулуу нь сэрүүн орчныг бий болгоно гэсэн үг юм. Тиймээс Монгол хүн европчуудтай адил интерьерээр гэрээ тохижуулах сонирхолтой. Өнөө цагт цэвэр байгалийнхаа өнгөөр байгаа модон тавилга моод болж байна. Мэдээж эртний сонгодог тавилгууд хэзээд үе үеийн сонголт байсаар байна.

Загвар зохион бүтээгчид энэ жилийн болоод ирэх жилийн хувцасны өнгийг тодорхойлдог. Тэгвэл энэ жилийн танай салбарыхны өнгөний хувьд ямар байгаа вэ?

Барилгад ч гэсэн өнгө гэдэг чухал үүрэгтэй. Ялангуяа манай салбарын хувьд өнгөний хослол хамгийн чухал байдаг. Ер нь энэ жилийн хувьд хар ногоон, улаан хүрэн өнгө ноёрхож байгаа гэж  хэлж болно.

Ингэхэд нэг хэсэг хивс моодноос гарч байгаа гээд айлууд ханан дах хивсээ хуулсан. Одоо бараг ханандаа хивстэй айл харагдахгүй болжээ. Тэгвэл өнөө үед хивс моодноос гарсан гэсэн үг үү?

Хивсийг моодноос гарсан гэж хүмүүс их ярьдаг болжээ. Үнэндээ тийм биш. Манайх  шиг сэрүүн уур амьсгалтай оронд дулааны зориулалт бүхий ашигтай эдлэл гэдгийг санах хэрэгтэй. Учир нь хананаасаа хүйт цохидог бол хивсийг өлгөхөд дулаан алдах нь бага болно. Иймээс хивс моодноос гараагүй гэсэн үг юмаа.

Тавилга нь ханын цаастайгаа уялдаатай байх нь тухайн айлыг улам ч гоё харагдуулдаг. Тэгвэл ямар ханын цаасыг сонговол илүү тохиромжтой байх вэ?

Ханын цаас гэдэг маань интерьерийн хувьд бас чухал зүйлүүдийн нэг. Том хээтэй тод өнгийн ханын цаасыг энэ жил түлхүү хэрэглэж байгаа. Цулгуй материалтай цаасаар ханаа чимэх нь тийм ч хээнцэр харагдахгүй. Харин эртний маягийн хийцийн тавилгатай бол торгомсог ханын цаас сонгохыг зөвлөж байна. Ер нь хүн гэрийнхээ интерьерийг өөрчлөхдөө эрүүл ахуйгаа бодож, өөрийн тав тухтай байдлыг харгалзах нь чухал гэдгийг санаарай.

Түүний өгсөн зөвлөгөө уншигч танд багахан боловч нэмэр болсон гэдэгт би итгэлтэй байна. Мөн ямар талын зөвлөгөө танд хэрэгтэй байгаа бидэнд бичиж ирүүлээрэй. Таны санал бидэнд ямагт үнэтэй байх болно.

 

                                                                                  

Эх сурвалж:

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.