Тоосго зөөж, зах дээр тэрэг түрж, микроавтобусанд кондуктор хийдэг хүүхдүүд өнгөрсөн долоо хоногт эрс ихэссэн. Дунд сургуулийн сурагчид улирлын амралтаараа ажил хийж яваа нь энэ. Тэдний нэг болох нийслэлийн 42 дугаар сургуулийн 11 дүгээр ангийн нэгэн сурагч 15 дугаар хорооллын 11 дүгээр байрны барилга дээр ажиллаж байгаад өрөөсөн хөлгүй болжээ.
Уг байрны дээд давхрыг өндөрлөн мансард барьж буй аж. Энэ ажлыг “Буурал сутай” компани гүйцэтгэж байна. Хүү өнгөрсөн долоо хоногийн баасан гаригийн өглөө өргөгч цамхагт өрөөсөн хөлөө даруулжээ. Түүнийг тэр дор нь эмнэлэгт хүргэсэн ч өрөөсөн хөлийг нь тайрахаас өөр аргагүй болсон байж. “Буурал сутай” компанийн нэгэн дарга “Байдаг л нэг гэмтэл. Барилга дээр иймэрхүү осол байнга гардаг” гэж ярьжээ.
Үнэхээр ийм осол байнга гардаг. Өнгөрсөн сард гэхэд л Хан-Уул дүүргийн гуравдугаар хороонд тросс нь тасарсны улмаас хоёр барилгачин наймдугаар давхраас унасан, Баянгол дүүрэгт барьж байсан барилга дээрээс тоосго унаж 10 настай хүүхдийн толгойг хагалсан гээд тоочоод байвал нэлээд урт жагсаалт гарна. Дээрх хүү энэ жагсаалтыг нэгээр ахиуллаа. Тэр сахилгагүйтэж яваад бэртэж гэмтээгүй. Задарсан зарим хүүхэд шиг гудамж метрлэж, хэрэг төвөг тарин эцэг, эхийнхээ чихийг халууцуулаагүй. Харин ч хэдэн төгрөг олж амьдралдаа нэмэр болохыг хичээн, биедээ ахадсан ачаа үүрч, ажил хийжээ. Шанд нь 17-хон насандаа тахир дутуу болов.
Насанд хүрээгүйг нь мэдсээр байж ажилд авчихаад “Байдаг л гэмтэл” гээд үл тоомсорлож боломгүй. Хүүхдийг ажиллуулахад хөлс хямд, тэгээд ч дуулгавартай, махруу, хурдан шаламгай учраас барилгын компаниуд тэднийг ажилд авахдаа дуртай байдаг аж. Тэгээд ч үндсэн ажилтан болохгүй учраас нийгмийн болон эрүүл мэндийн даатгал төлөхгүй, хүн амын орлогын албан татвар гээд элдэв шимтгэл хураалгахгүй тул ажил олгогчид ашигтай.
Манай улсад 1800 хүүхэд барилга, уурхай, мод бэлтгэх зэрэг хүнд хөдөлмөр эрхэлж байна гэсэн статистик бий. Сүүлийн хоёр жилд 10 мянган хүүхэд осолд орж, 30 хүүхэд амиа алджээ. Барилгад хэрэглэх гэж байсан элсэнд дөрвөн настай хүүхэд даруулжээ, толгой дээр нь тоосго уналаа гэсэн мэдээнд бид ийм амархан дөжирчихлөө гэж үү. Тэдний эрхийг хэн хамгаалж, хүүхдийн хөдөлмөрийг хэрхэн зогсоох вэ.
TODAY