Шинэ үеийн барилгын материал

Шинэ үеийн барилгын материал

Г.Саран \ШУТИС -ийн Материал судлалын төвийн захирал, доктор (Ph.D), дэд профессор\
Р.Долгоржав \ШУТИС -ийн ХШУС, ХИС-ын багш, МУ-ын мэргэшсэн инженер\

Барилгын материалын үйлдвэрлэл нь түүхий эд болон эрчим хүчийг хамгийн их хэрэглэдэг салбар юм. Иймээс олон орны эрдэмтэн судлаачид байгалийн түүхий эд болон эрчим хүчийг хэмнэх зорилготой шинэ шинэ барилгын материал гарган авах судалгааг гүйцэтгэж байна.
Үүний нэг жишээ нь Австри улсын Техникийн их сургуулийн эрдэм шинжилгээний ажилтан, судлаач Х.Фишер нь мөөг ашиглаж 100% биологийн гаралтай барилгын материал гарган авсан нь ногоон хөгжлийн архитектурын шагнал авчээ.  Тэрээр нөхөн сэргээгддэг, 100% биологийн задралд орох боломжтой материал гарган авахыг зорьсон байна.

Зураг 1. Австрийн техникийн их сургуулийн эрдэмтэн Х.Фишерийн мөөгнөөс гарган авсан материал

 

Иймээс мөөгний үндэс, модны үртэс болон хөвөн даавууны хаягдал ашиглан түр ашиглах павильон хийх бүтээцийн материал гарган авчээ. Үүний тулд мөөгний үндэс буюу мицелийг ашигласан бөгөөд энэ нь байгалийн гаралтай цавуу шиг шинж чанартай байдаг байна. Мицел нь хөрсөнд миллиметрийг хэд хуваасантай тэнцүү хэмжээний нарийн утсархаг сүлжээ үүсгэдэг байна. Энэхүү маш нарийн утсархаг материалын бөөгнөрөл нь дуу ба дулаан тусгаарлах чадвар сайтай аж. Мөөгний үндсийг ингэж сайн ургуулахын тулд хоол хүнсний хаягдлыг модны үртэс эсвэл сүрэл зэрэгтэй холин хөрсөнд цацаж өгдөг байна. Энэхүү хөрсөнд мөөгний үндэс 2-3 долоо хоногийн дотор утсархаг сүлжээ үүсгэн бэхжүүлдэг бөгөөд энэ хольцыг халаасны дараа дурын хэлбэрт оруулах боломжтой болдог байна. Харин Х.Фишер нь мөөгний мицелийг модны үртэс ба хөвөн даавууны хаягдлыг барьцалдуулахад ашиглажээ. Ингэж барьцалдуулан гарган авсан материал нь полистирол шиг дулаан тусгаарлах шинж чанартай боловч биологийн задралд 100% ордог байна.
Италийн дизайнер ба судлаач Маурицио Монталти мөөгний мицел ашиглан мөн барилгын материал  гарган авчээ. Тэрээр Могу нэртэй компанийг 2010 онд байгуулсан бөгөөд мөөгнөөс гарган авсан барилгын хавтан ба плита үйлдвэрлэж байна. Барилгын материалыг мөөгнөөс гарган авахын тулд хөдөө аж ахуйн хаягдал жишээ нь маалинга, олс зэргийг мөөгний мицелээр бүрхэхэд тэр нь эх материалтайгаар симбиоз үүсгэдэг ажээ. Энэхүү материалыг дүрс хэлбэрт оруулахад хязгаар байхгүй тул сав баглаа боодлын үйлдвэрлэлд хамгийн хэрэгцээтэй материал боловч дизайнер Маурицио Монтали илүү үр дүнтэйгээр ашиглахаар шийдсэн байна. Жишээ нь гоёл чимэглэлийн зориулалттай интерьер дизайны хавтангууд байна.

Зураг 2. Мицелийн материал бүрэлдэж байгаа нь

Зураг 3. Мөөгний мицелийн тусламжтай гарган авсан хавтан, дуу тусгаарлагч



Эдгээр материал нь нийлэг материалтай харьцуулахад үрэлт банарны гэрэлд тэсвэртэй, гал дэмждэггүй учраас Европын барилгын материалын галын аюулгүй материалын В ангилалд багтжээ. Өөрөөр хэлбэл хөвөн даавууны хаягдлыг мицелтэй хослуулснаар галд тэсвэрлэлт сайжирсан байна.
       
Зураг 4. Шалны плита

Мөн үүний зэрэгцээ үндсэн материалыг 2 мм зузаантай био-полиуретан материалаар бүрхсэн элэгдэлд тэсвэртэй шалны плита гарган авчээ. Тус плита нь харшил хөдөлгөдөггүй бөгөөд хортой бодис агуулдаггүй юм байна.

Америкийн Сан Франциско хотод байрладаг уран бүтээлч бөгөөд судлаач Фил Росс нь арьс шир, цемент болон хуванцар материалыг мөөгөөр орлуулах боломжтой гэж үздэг нэгэн ажээ. Тэрээр Майковоркс компаний хамтран эзэмшигч бөгөөд малгай, гутал, цүнх зэрэг ахуйн эд зүйлсээс гадна барилгын материал тоосго хүртэл олон тооны материал гарган авсан байна.  

Зураг 5. Фил Россын гарган авсан тоосго


Индонезийн залуу бизнесмэн Роналдиац Хартантио уламжлал ёсоор цайны тариалан эрхэлдэггүй харин мөөг тариалдаг ажээ. Тэрээр Швейцарийн их сургууль болон ХБНГУ-ын Карлсруэгийн институтын эрдэмтэдтэй хамтран маш уян хатан чанартай, галд тэсвэртэй бөгөөд ус түлхэгч шинж чанартай материал гарган авсан байна. Үүний тулд мөөгний мицелийг нэг сарын дотор ургуулдаг.
Майкотех компани нь мөөгний мицелийг хулстай хольж барилгын материал гарган авсан бөгөөд үүнийгээ Сөүлийн олон улсын архитектур ба хот төлөвлөлтийн үзэсгэлэн дээр үзүүлсэн байна.

Зураг 6. Шинэ материалаар хийсэн  модны дүрсийг угсарч буй байдал


Зураг 7. Майкотех компаний үйлдвэрлэсэн плита

Гарган авсан мицелийг хүссэн хэлбэр дүрсэнд оруулах боломжтой тул Майкотех компани нь барилгын материал, гоёлын плита болон тавилга, сав баглаа боодол үйлдвэрлэдэг.

Зураг 8. Дуу болон дулаан тусгаарлах материал

Одоогийн байдлаар Майкотех компани нь энэхүү материалыг интерьер дизайны чиглэлээр ашиглаж байгаа бөгөөд гадна орчинд ашиглах талаар судалгаа шинжилгээ, туршилт гүйцэтгэж байгаа ажээ.

Зураг 9. Фил Россын гарган авсан тоосго



 

ХБНГУ-ын Фрауэнхофын институтын эрдэмтэд мөн энэ чиглэлээр судалгааны ажил гүйцэтгэж байгаа бөгөөд тэдгээр нь мөөгний мицел ашиглан дуу тусгаарлалт маш сайтай материал гарган авсан байна. Одоогийн ашиглаж байгаа дуу тусгаарлах, дуу авиа шингээх болон дулаан тусгаарлах материалыг дан хөөсөн полистиролоор хийдэг бөгөөд галаас хамгаалахын тулд заавал нэмэлт бодис ашигладаг төдийгүй байгаль дээр өөрөө задардаггүй тул байгаль орчинд хортой материал юм. Иймээс биологийн гаралтай материалаар орлуулах нь нэн тэргүүний зорилт болоод байна.

Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.