BIM ба барилгын төслийн менежмент

BIM ба барилгын төслийн менежмент

Барилгын төслийн менежмент гэдэг нь орон сууц, олон нийт, үйлдвэрийн барилга байгууламжуудын төслийг эхлэхээс дуусах хүртэл бүх үе шатуудын үр дүнг оролцогч талуудын үйл ажиллагаа, санхүүгийн хэрэгцээ, бусад хүлээлтэд хүрэх зорилготойгоор мэдлэг, ур чадвар, зааварчилгаа, арга зүйд тулгуурлан хэрэгжүүлэх арга гэж ойлгож болно.
Төслийг ямар тохиолдолд амжилттай дууссан гэж үзэх вэ?
Хамгийн нэгдүгээрт “Төлөвлөж байсан барилга яг баригдсан уу?” гэдэг асуултад хариулах шаардлагатай. Хэрэв “Тийм” гэж хариулж байгаа бол “Төслийн бүх оролцогч талууд сэтгэл хангалуун байсан уу?” гэдэг асуултанд хариулах хэрэгтэй болно. Мөн л “Тийм” гэж хариулаад дараа нь “Төсөл төлөвлөсөн өртөг, цаг хугацаандаа баригдаж чадсан уу?” гэдэг асуултанд “Тийм” гэж хариулж байгаа бол төсөл амжилттай хэрэгжлээ гэж үзэж болно.
Төслийн ямар менежментүүдийн талаар тайлбарлавал:
Эхлүүлэлтийн менежмент (Integration management) гэдэг нь төслийн төлөвлөгөөг хөгжүүлэх, боловсруулах үйл явц юм. Энэ нь төслийн бүх үе шатыг зохистой байдлаар удирдан зохион байгуулж, бүх оролцогч талуудын хүлээлт болон хэрэгцээг хангаж ажиллахад зорино.
Зорилгын менежмент (Scope management) гэдэг нь захиалагчийн анхны тодорхойлсон зорилго, шаардлагад нийцүүлэн, тухайн төслийн үе шатуудыг тодорхойлж бүтээгдэхүүнийг захиалагч талд амжилттай хүргэх үйл ажиллагаа юм.
Цагийн менежмент (Time management) гэдэг нь тухайн төслийг өгөгдсөн хугацаанд амжилттай хэрэгжүүлэх үйл ажиллагаа юм.
Зардлын менежмент (Cost management) гэдэг нь тухайн төслийг батлагдсан төсөв, санхүү болон санхүүжүүлэлтийн хуваарьт багтаан амжилттай хэрэгжүүлэх үйл ажиллагаа юм.
Чанарын менежмент (Quality management) гэдэг нь хийгдэж буй тухайн төслийг захиалагчийн хүсэлт, хууль эрх зүй, норм, дүрэм, стандартад нийцүүлэх ажлын зохион байгуулах үйл ажиллагаа
Хүний нөөцийн менежмент (Human Resource management) гэдэг нь төсөл гүйцэтгэхэд шаардлагатай мэргэжилтнүүдийг төлөвлөх, бүрдүүлэх, зохион байгуулах, удирдах үйл ажиллагаа
Харилцааны менежмент (Communication management) гэдэг нь төслийн оролцогч талуудын харилцааг зохицуулах, тэдгээрийн мэдээллийг төвлөрүүлэх, үүсгэх, тараах, хадгалах, буцаан авах, удирдах, зохицуулах, хянах үйл ажиллагаа юм.
Эрсдэлийн менежмент (Risk management) гэдэг нь төслийн эрсдэлийг тодорхойлох, үнэлэх, даван туулах арга замуудыг тодорхойлон удирдах үйл ажиллагаа юм.
Ханган нийлүүлэлтийн менежмент (Procurement management) гэдэг нь төсөлд шаардлагатай бараа бүтээгдэхүүн, үйлчилгээг худалдан авах, ханган нийлүүлэлтийг зохион байгуулах үйл ажиллагаа юм.
Оролцогч талуудын менежмент (Stakeholder management) гэдэг нь төсөлд шууд болон шууд бус байдлаар оролцох хувь хүн, албан байгууллагуудыг тодорхойлно. Мөн төсөл нь оролцогч талуудад хэрхэн нөлөөлөх, оролцогч талууд нь төсөлд хэрхэн нөлөөлөх талаар судлан дүн шинжилгээ хийж, төслийг үр дүнтэй явуулах ажлыг зохион байгуулдаг.
 
ТӨСӨЛ ХЭРЭГЖҮҮЛЭХ АРГА ЗҮЙ
Төсөл хэрэгжүүлэх арга зүй буюу Project Delivery Method (PDM) гэдэг нь захиалагч болон бусад оролцогч (зураг төсөл, барилга угсралт, хяналт гэх мэт) талуудын төслийн үе шат дахь оролцоо, эрх, үүргийн хэм хэмжээ, харилцааны хэлбэрийг цогцоор нь тодорхойлсон систем юм.
Төслийн аргазүй:
Design Bid Build (DBB)
Design Build (DB)
Construction Management (CM)
            CM as Advisor (Cma)
            CM as Agent
            CM at Risk
Integrated Project Delivery (IPD)
гэсэн хэлбэрүүдтэй. Эдгээр хэлбэрүүдээс хамгийн сүүлийн үед нэвтэрч байгаа, үр дүн өндөртэй нь IPD юм.
 
Төсөл хэрэгжүүлэх арга зүй
Төсөлд оролцогч талууд нь төслийн бүх үе шатуудад хамтран ажилласнаар талуудын уялдаа холбоо сайжирч, төслийн үр ашиг нэмэгдэнэ. Энэ аргазүйн техникийн шийдэл нь BIM бөгөөд маш олон төрлийн шинжилгээ, төлөвлөлтийн хувилбаруудыг тооцож үзэх боломжийг олгодог. Мөн LEAN Construction-ийн зорилгод яг таарч ажилладаг.

Зураг 1. BIM нэвтрүүлсэнээр барилгын төсөл хэрэгжих боломж

 
BIM
BIM барилга, бүтээн байгуулалтын салбарт нэвтэрснээр IPD хэмээх төслийн арга зүйг ашиглах боломжтой болсон. Төслийн уламжлалт хэлбэрүүдэд төсөлд оролцогчид шугаман байдлаар буюу ажлуудаа нэгээс нөгөөд шилжүүлэх байдлаар ажилладаг байсан бол IPD аргазүй нь төслийн үе шатнаас хамаарч төслийн оролцогч талууд нэг баг болон нэгдэж, нэг мэдээлэл дээр хамтран ажиллах боломжтой болсон юм.

Зураг 2. Оролцогч талуудын уялдаа холбоо


LEAN construction
Хаягдалгүй барилга угсрах буюу хамгийн бага нөөцөөр барилгын төслөө дуусгах нь LEAN Construction-ийн үндсэн зорилгуудын нэг юм. Хаягдалд

  1. Илүү тээвэр
  2. Илүү бараа, материал
  3. Буруу эсвэл шаардлагагүй үйлдэл
  4. Хүлээлт
  5. Илүү үйлдэл, илүү үйл ажиллагаа
  6. Илүү үйлдвэрлэл
  7. Алдаа дутагдал
  8. Шаардлагагүй ур чадвартай хүмүүс ордог бөгөөд эдгээр хаягдлуудыг арилгахын тулд зохион байгуулалт хийдэг.

Зураг 3. Хаягдалгүй барилгын төслийн анхаарах асуудлууд

Дээрх зорилгод хүрэхийн тулд бүх зүйлийг үйлдвэрт урьдчилан бэлтгээд барилгын талбай дээр угсрах нь оновчтой шийдэл болдог. Барилгын талбай дээр барилгын материалыг агуулах илүү зай шаардахгүй, материалын хог хаягдал гаргахгүй, цаг агаарын янз бүрийн хүчин зүйлд бараг автахгүй, барилгын талбай дээрх нойтон ажлын хаталт, бэхжилтийг хүлээж, цаг алдахгүй зэрэг маш олон давуу талтай. Гэхдээ архитектур, дизайны өвөрмөц шийдэлтэй барилгуудын бүх хэсгийг урьдчилан үйлдвэрт бэлтгэхэд хүндрэлтэй. Ийм учраас LEAN Construction-ийн зохион байгуулалт шаардлагатай болдог.

BIM, LEAN, IPD
BIM, LEAN, IPD-уудыг төгс хослуулж ажиллаж чадвал барилгын төслийн үр өгөөжийг дээд цэгт нь хүргэх боломжтой.

 Мэдээллийг бэлтгэсэн:
“БилдингСМАРТ Монгол” ТББ
“Констракшн Прожект Менежмент” ХХК

Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.