Өвөрмөц шийдэлтэй “ТОП- 8” нийтийн орон сууц

Өвөрмөц шийдэлтэй “ТОП- 8” нийтийн орон сууц
Дэлхийн улс орнууд бага, дунд орлоготой иргэддээ зориулж байгаль орчинд ээлтэй, ашиглалтын зардал багатай, хямд өртөгтэй нийтийн орон сууцаар хангах бодлогыг хэрэгжүүлж хүн ардаа тав тухтай, эрүүл орчинд амьдруулж байна. Хүн болгон орон сууц худалдаж авах эсвэл өөрийн гараар байшин барих боломжгүй учраас хямд өртөгтэй санхүүгийн уян хатан нөхцөлтэй нийтийн орон сууцыг сонирхдог. Энэ асуудлыг шийдвэрлэхэд Европын орнууд хамгийн амжилттай ажиллаж байгаа бөгөөд эдгээр орнуудад нийтийн орон сууц нь нийт орон сууцны 30 орчим хувийг эзэлдэг. Улс орнууд орон сууцжуулах төсөл хөтөлбөртөө авьяаслаг, нэр хүндтэй архитекторуудыг урьж оролцуулан шилдэг шийдлээр хүний амьдрах таатай орчин нөхцөлтэй төслийг боловсруулан хэрэгжүүлж байна. Нийтийн орон сууцыг нэг л хэв маягийн уйтгартай  байдлаас салгаж өвөрмөц шийдэлтэй хүнийг сэтгэлийг татахаар бүтээн босгосон, хямд төсөр дэлхийн сонирхолтой орон сууцны төслүүдийг танилцуулж байна.

1. Хабитат-67, Монреаль, Канад
Архитектор - Моше Сафди
Дэлхийд танигдсан орон сууцны цогцолборын нэгийг архитектор Моше Сафди 1966-1967 онд зохион бүтээж,  “Монреаль Экспо-67” үзэсгэлэнд танилцуулсан байна. Авьяаслаг шинэхэн архитекторын төгсөлтийн ажил нь арав гаруй жилийн турш тогтсон нэг хэв маягийн шийдлээс татгалзаж өвөрмөц, шинэлэг архитектурын хэв маягаар бүтээгдсэн байна. Хабитат (“Амьдрах орчин”) нэр нь төслийн өвөрмөц байдлыг илэрхийлдэг ба энэхүү 12 давхар орон сууцны цогцолбор нь яг ижил төстэй элементүүдийн нарийн төвөгтэй эмх замбараагүй хэлбэлзэлтэй 354 цутгамал төмөр бетон модулиудаас бүрддэг. Модуль бүр нь өөрийн гэсэн ногоон цэцэрлэгтэй, бие даасан орон сууц юм. 



2. “Mieres Social Housing”  Mерьес, Испани
Зохиогч: Zigzag Arquitectura

Энэхүү орчин үеийн орон сууцны барилга нь Испанийн уулсын үзэсгэлэнтэй хөндийд оршдог. Энэхүү төсөл нь дизайнеруудын хувьд хамгийн чухал, шинэлэг төслийн нэг байсан ба хөдөө, хот суурин газрын орчинг хослуулсанаараа онцлог юм. Энэхүү цогцолбор нь 7 өөр өндөртэй, хоорондоо холбоотой орон сууцуудаас бүтдэг ба төлөвлөлт нь дөрвөлжин хэлбэртэй, тохилог ногоон байгууламж, хашаатай. Барилгуудын доод давхар нь нийтийн эзэмшлийнх бөгөөд энд агуулах болон машины зогсоол байрладаг. Орон сууцууд нь хоёр талдаа байгалийн гэрэл тусгахаар зохион байгуулагдсан бөгөөд энэ нь мөн  агааржуулалтыг шийдэхэд чухал нөлөө үзүүлдэг. Фасадны ар талын чимэглэлд металл ашигласан бөгөөд өвөр талд нь нээгдэж хаагдахаар гүйдэг модон савхан материал хэрэглэж байгалийн гэрлийг зохицуулж ашиглахаар шийдсэн байна. 


3. “Izola Social Housing” Изола, Словени
Зохиогчид: OFIS архитектор

Энэхүү орон сууцны цогцолбор нь хязгаардлагдмал төсвөөр төлөвлөлтийн шаардлагыг хангасан,  нийтийн орон сууцны анхны бүтээлч шийдлийг бий болгосон гайхалтай жишээ юм. Зөгийн үүртэй төстэй ер бусын фасад бүхий хоёр орон сууцны барилга нь гоо зүй, функциональ байдлыг хослуулсан ба эдгээр орон сууцууд нь хурдан хугацаанд борлуулагдсан.  Залуу гэр бүлд зориулсан хямд өртөгтэй нийтийн орон сууц бий болгох зорилготой энэ төсөл нь Словенийн орон сууцны сангаас зохион байгуулсан тэмцээнд тэргүүн байранд шалгарсан. Энэ төсөлд 1- 3 өрөө бүхий төрөл бүрийн хэмжээтэй 30 айлын орон сууцыг төлөвлөсөн. Орон сууцны нэг давхарт нэгээс гурван өрөө байр тус бүр 2 байдаг. Энэ орон сууцны чухал давуу тал нь зөвхөн гадна хана нь даацын ачаалал авдаг ба оршин суугчдын хэрэгцээ шаардлагын дагуу дотоод зохион байгуулалтыг өөрчилж болдгоороо онцлог юм.


4. “Opod Tube” бетонон хоолойгоор хийсэн бичил орон сууц. Гонконг
Зохиогчид: Жеймс Лав Кибертектур

Хонконгт  хүн амын өсөлт, орон сууцны эрэлт өндөр, үл хөдлөх хөрөнгийн үнэ өндөр, газарзүйн хувьд арлын хязгаарлагдмал нутгаас болж орон сууцны хүчтэй хямрал нүүрлэдэг. Хонконгийн архитектурын студи Жеймс Лайф Кибертектур нь хот суурин газрын барилгуудын хооронд байрлуулж болох бетонон хоолойн хямд байшингийн төслийг боловсруулжээ. Уг төслийн сууц нь 2.5 метрийн өргөнтэй бетон ус дамжуулах шугам хоолой бөгөөд тус бүр нь 9.29 квадрат метр талбайтай, дотроо амьдралд хэрэгтэй бүх зүйлээр тоноглогдсон ба ухаалаг  гар утсыг ашиглан нээгдэх, хаагдах боломжтойгоороо онцлог. Эдгээр хоолойнуудыг давхарлаж 4 үеэр угсраад дотор талд нь нийтийн эзэмшлийн шат тавцанг төсөллөж өгсөн ба энэхүү төсөл нь хотын төвийн залуу хүмүүсийг хямд үнэтэй орон сууцаар хангах зорилготой боловч энэ нь орон сууцны хямралын асуудлыг шийдэхгүй, гэхдээ богино хугацаанд боломжийн орон сууц хайж буй оршин суугчдыг түр байраар хангах боломжтой юм.


5. “La Valentina Station” орон сууцны цогцолбор, Сакраменто, АНУ Зохиогч: Дэвид Бейкер

Энэхүү цогцолбор нь 63 орон сууцнаас бүрдэх бөгөөд хотын бага орлоготой иргэдэд зориулагдсан юм. Засгийн газраас энэ төсөлд трамвайн замын хажууд байрлах цөлжсөн ашиглалтгүй талбайн газрыг хуваарилсан ба уг төслийг хэрэгжүүлснээр тухайн бүс нутгийн нөхцөл, экологийн байдлыг сайжруулсан бөгөөд хөрснөөс хортой хог хаягдлыг бүрэн цэвэрлэж ногоон орчинг бүрдүүлсэнээрээ онцлог болсон юм. Нарны хавтанг орон сууцны дээвэрт суурилуулж, цахилгаан эрчим хүчээр хангаж, байшин барихад эко ногоон материалыг ашигласан. Доод давхарт худалдааны газар, кафе зэрэг үйлчилгээний газруудыг төлөвлөсөн ба дотор болон гадна талдаа хангалттай машины аюулгүйн зогсоолтой. Энэхүү цогцолбор нь цаг уурын тааламжгүй бүсийг амьдрахад тохиромжтой газар болгон хувиргасан.

6. “Unit  Хабитат”, Марсель, Франц
Зохиогч: Le Corbusier

ЮНЕСКО-гийн Дэлхийн өвд бүртгэгдсэн “Unit`e d'Habitation” хэмээх алдартай Марсель хотын орон сууцны цогцолбор нь алдарт архитектор Le Corbusier-ийн  туршилтын анхны загвар юм. Авангард загвар зохион бүтээсэн архитектор уг байшинг "амьдралын машин" гэж тайлбарласан ба төлөвлөсөн барилга нь хүний ​​бүх хэрэгцээг хангасан "босоо хот" байх ёстой гэсэн үзэлд тулгуурласан байв. Архитектурын багцад нь урьд нь боловсруулсан бусад том хэмжээний орон сууцны схемүүд болон зарчмууд багтсан бөгөөд "Корбусье” бетоныг барилгын материал болгон ашигласан байна. Энэхүү "загвар" дээр үндэслэн Европын Нант-Резе, Берлин, Брие, Фирмини хотод орон сууц барьсан байна.


7. “Les Choux de Creteil”  Парис, Франц
Зохиогч: Жерард Грандвал

Энэхүү төслийг Францын архитектор Жерар Грандвал Парисыг нэгэн төрлийн, уйтгартай орон сууцны хэв маягаас салгахаар шийдсэн ба авангард, уян хатан, байгалийн материалыг ашигласан, илүү эмэгтэйлэг хэлбэрийг бий болгох шаардлагатай байна гэсэн үзлийнхээ дагуу боловсруулсан юм. Парисын энэ орон сууцны хороолол нь арван 10 давхар орон сууцны барилга, сургууль, цэцэрлэг, кино театр, дэлгүүр, гаражийн цогцолбороос бүрдсэн юм. Орон сууцуудын гол онцлог нь дугуйрсан хэлбэртэй фасад ба цэцгийн дэлбээг санагдуулах тагт юм.

8. “VM houses”, Копенгаген, Дани
Хямд төсөр орон сууцны өөр нэг төсөл болох Копенгагены архитекторуудын бүтээсэн “VM” орон сууцны цогцолборын хоёр барилга нь латины V ба М үсэг шиг харагддаг. Барилгын гол онцлог нь тунгалаг шилэн фасад ба V байрны урд талын гурвалжин хэлбэртэй, өвөрмөц байдлаар шийдсэн тагт юм. Эдгээр тагтны ачаар холоос фасад нь сүвэрхэг юм шиг харагддаг ба энэхүү сонирхолтой шийдэл нь орон сууцны төлөвлөлтийг ахисан түвшинд гаргаж, тагтны талбайг болон байгалийн гэрлийг хангалттай ашиглахаар шийдсэн байна. 

Эх сурвалж: barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.