Бүтээн байгуулалтын 94,4 хувийг дотоодын компаниуд гүйцэтгэх чадавхтай байна

Бүтээн байгуулалтын 94,4 хувийг дотоодын компаниуд гүйцэтгэх чадавхтай байна

“Барилга.МН” сайтын гишүүн байгууллагуудын удирдах албан тушаалтан, захирлуудын дунд зохион байгуулагддаг VIP уулзалт өчигдөр болж өнгөрлөө. Энэ удаагийн уулзалт нь "Итгэл тэмүүлэл, амжилтад хөтөлнө" сэдвийн хүрээнд зохион байгуулагдаж, хүндэт зочноор "Барилга корпораци" -ийн ТУЗ-ийн дарга, Монгол улсын гавьяат барилгачин Л.Шагдаррагчаа оролцсон юм. Тэрээр уулзалтын эхэнд “Барилгын салбарын ойрын болон ирээдүйн тойм зураглал ба зарим шийдэл” - ийн талаар илтгэл тавьж, “Төрөөс барилгын салбарын талаар баримтлах бодлого” - ын талаарх мэдээллийг ирсэн зочдод танилцууллаа.
Уулзалтын үеэр тэрээр “Өнөөгийн байдлаар бүтээн байгуулалтын ажлын 94,4 хувийг хувийн хэвшил гүйцэтгэж, жилдээ нийт 3566 тэрбум төгрөгийн ажил гүйцэтгэх чадавх бүхий үндэсний компаниуд салбарт ажиллаж байна. Түүнчлэн 2020 онд 4343 тэрбум , 2025 онд 8338 тэрбум, 2028 онд 12330 тэрбум төгрөгийн бүтээн байгуулалт хийх боломжтой гэсэн тооцоог 2017 оны суурь түвшин дээр өсөлтийн итгэлцүүр, далд эдийн засгийн нөөц болон статистикт ордоггүй барилгын хэмжээг төсөөлөлд оруулан тооцолсон. Тиймээс уг бодлогыг баримтлан хөгжлийн төлөвлөгөөг хэрэгжүүлснээр Монгол улсын бүтээн байгуулах өнөөгийн чадавхыг 2020  онд 1.38 дахин, 2025 онд 2.6 дахин, 2028 онд 3.9 дахин өсгөх тооцоо төсөөлөл гаргаж, баримт бичгийг боловсруулсан” гэдгийг онцлон ярьсан юм. Түүнчлэн ажлын фронт, ажилчны дутагдал, материал бүтээгдэхүүний борлуулалтын болон санхүүгийн хүндрэлээс үүдэж олон компани, үйлдвэрүүд дампуурах, бодит үнийнх нь 50-60%-иар бодож банкны барьцаанд тавьсан барилгын компануудын үл хөдлөх хөрөнгө хураагдах (хамгийн багаар 2.1 их наяд), барилгын салбарт олгогдсон үнэ тогтворжуулах болон орон сууцны зээлийн эргэн төлөлт баталгаагүй болж банк санхүүгийн системд томоохон эрсдэл үүсэх гэх мэт асуудлууд тулгарч болзошгүй байгааг анхааруулан ярьлаа.

Одоогийн байдлаар “Барилгын салбарт төрөөс баримтлах бодлого, төлөвлөгөө \2020-2030он\ ” - г батлуулсан байгаа бөгөөд салбарын хөгжлийн урт, дунд хугацааны хөгжлийн стратегийн баримт бичиг өргөн бариад \2020-2045\ хариу хүлээж байгаа юм.
Уулзалт нь салбарын төрийн бодлого үйл ажиллагаа, төслийн менежментийн хүрээний асуудал, барилгын төслийн технологийн интеграци, барилгын төсөл хэрэгжүүлэх цахим систем BIM, салбарын шинэчлэл ба компаний засаглал зэрэг сэдвийн хүрээнд зочид сонирхсон асуултаа асууж, хариулт авлаа. Түүнчлэн  салбарын мэдээллээс гадна тэрээр өөрийн ажил, амьдралын гараа, алдаа оноо, туршлагын талаарх зөвлөгөө өгч, барилгын салбарын залуу үеийнхэнд салбарынхаа өөрчлөлт, шинэчлэлтэд үнэтэй хувь нэмэр оруулан амжилттай ажиллахыг хүслээ. 


 
Эх сурвалж: barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.