М.Нургул: Үл хөдлөхийн салбарт санхүүгийн луйвар их гарч байна

М.Нургул: Үл хөдлөхийн салбарт санхүүгийн луйвар их гарч байна

Санхүүгийн залилан, луйврын шинжтэй гэмт хэргийн улмаас иргэд, байгууллагад учирсан хохирлын хэмжээ 2016 онд хоёр тэрбум орчим төгрөгт хүрч байсан бол 2017 онд 6.4 тэрбум, 2018 онд 9.9 тэрбум төгрөгт хүрч өссөн бөгөөд 2019 он гарсаар энэ тоо 13 тэрбум төгрөгт хүрч, жил ирэх тутам нэмэгдсээр байна. Үүнтэй холбогдуулан Монголбанкны Олон нийтийн боловсрол, мэдээллийн төвийн ахлах мэргэжилтэн М.Нургултай “Ятгах тусам нягтал” аяны хүрээнд ярилцлаа.

-“Ятгах тусам нягтал” аяны гол зорилго юу вэ. Хэдий хугацаанд хэрэгжих вэ?

-­2011 онд санхүүгийн луйвар, залилангийн төрлийн гэмт хэргийн тоо 688 байсан. Харин 2019 оны байдлаар энэ тоо 4600 болтлоо өссөн. Хүмүүс маш богино хугацаанд их мөнгөтэй болох, мөнгөө өсгөх үүднээс сайтар нягтлахгүйгээр санхүүгийн харилцаанд орж, энэ төрлийн гэмт хэрэгт их өртөж байна. Найман жилийн хугацаанд зургаа дахин өссөн тул Монголбанк Цагдаагийн ерөнхий газар, Монголын банкны холбоотой хамтран “Ятгах тусам нягтал” аяныг зохион байгуулж байна. Төв банк нь иргэдийн санхүүгийн суурь мэдлэгийг дээшлүүлэх үндэсний хөтөлбөрийг 2016 оноос хойш хэрэгжүүлж байгаа. Санхүүгийн суурь мэдлэгт санхүүгийн залилан, луйвар гэсэн сэдэв багтдаг. Тус аяныг нэг сарын хугацаатай үргэлжлүүлнэ. Гол зорилго нь, иргэдэд санхүүгийн луйвар, залилангаас урьдчилан сэргийлж байх талаар мэдээлэл өгч, энэ төрлийн гэмт хэргийг бууруулахад дэмжлэг үзүүлнэ. 

-Санхүүгийн ямар төрлийн хэргүүд цахим орчинд үйлдэгдэж байна вэ?  

­-Тухайн хүний фейсбүүк хаягийг нь эвдэж ороод, ойр орчмынх нь хүмүүс рүү мөнгө гуйсан мессеж явуулдаг төрлийн залилангийн тоо өсөж байна. Мөн санхүүгийн бүтээгдэхүүн олон болсон. Тухайлбал, Монгол Улсын хэмжээнд нийт 3.7 сая гаруй банкны карт байгаагаас идэвхтэй ашиглаж байгаа нь 1.5 сая. Хүмүүс картаа бусдад ашиглуулах, нууц кодоо алдах зэргээс болж санхүүгийн луйварт өртөж байна. Гэхдээ үүнийг санхүүгийн залилан гэж үзэхээр тухайн хүн өөрөө алдчихсан учраас эргэлзээтэй. Сүүлийн үед төв банк үндэсний брэнд болох төлбөрийн ₮ картыг технологийн дараагийн шатанд гаргах эхний алхам буюу EMV чип технологид шилжүүлэх ажлыг эхлүүлсэн. Үндэсний брэнд ₮ картыг EMV/ NFC технологид шилжүүлснээр нууцлал, аюулгүй байдал сайжрах чухал алхам юм. Мөн виз гаргана гэсэн хаягуудтай газар их байна. Визийг тухайн улсынх нь Элчин сайдын консулын газар л гаргадаг. Үл хөдлөхийн салбарт мөн луйвар их гарч байна. Тухайн иргэн байраа түрээсэллээ гэхэд байрных нь гэрчилгээг гаргаж аваад, зарж шилжүүлэх жишээтэй. Залилан луйврын гэмт хэрэг нь олон төрөлтэй байна. Иргэдийн мэдээлэл муу учраас залилангийн гэмт хэрэг өсөөд байна. 

-Тус аяны үр дүнг хэрхэн харж байна вэ?

-­Нэгдүгээрт, иргэд залилуулж байгаа гэдгээ мэдэхгүй байна. Хоёрдугаарт, залилуулсныхаа дараа хаана хандахаа мэдэхгүй байна. Тиймээс урьдчилан сэргийлэх чиглэлийн мэдээллийг багтаасан сурталчилгаа, зурагт хуудас зэргийг цахим орчинд нийтэлснээр иргэд тодорхой мэдлэгтэй болно. Цагдаагийн ерөнхий газартай хамтарч бай­гаа учраас цар хүрээ нь улам тэлж, Улаанбаатар хот, 21 аймгийн хэмжээнд хэрэгжинэ. Дээрх гурван байгууллага хамтран эхний ээлжид агуулгаа боловсруулж, сошиал контен­туудыг бэлдсэн. Мөн олон ний­тийн арга хэмжээ зохион байгуу­лахаар төлөвлөж байна.

Эх сурвалж: Засгийн газрын мэдээ

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.