Улаанбаатар хотын дулааны сүлжээ төсөл хэрэгжинэ

Улаанбаатар хотын дулааны сүлжээ төсөл хэрэгжинэ

Монгол Улсын Засгийн газар, Европын сэргээн босголт, хөгжлийн банк хооронд байгуулсан Санхүүжилтийн ерөнхий хэлэлцээрийн хүрээнд Улаанбаатар-Дарханы чиглэлд нэмэлт 2 эгнээ зам барих төсөл болон Улаанбаатар хотын дулааны сүлжээ төслийн Тусгайлсан зээлийн хэлэлцээрт Монгол Улсын Засгийн газрыг төлөөлж Сангийн сайд Ч.Хүрэлбаатар, Европын сэргээн босголт, хөгжлийн банкны Бүс нутгийн дэд бүтцийн асуудал хариуцсан захирал Екатерина Мирошник нар, Улаанбаатар хотын дулааны сүлжээ төсөл хэрэгжүүлэх Төслийн гэрээнд УБДС ТӨХК-ийн гүйцэтгэх захирал Г.Баярсайхан, Европын сэргээн босголт, хөгжлийн банкны Бүс нутгийн дэд бүтцийн асуудал хариуцсан захирал Екатерина Мирошник нар 2020 оны 1 дүгээр сарын 10-ны өдөр тус тус гарын үсэг зурлаа.

Улаанбаатар-Дарханы чиглэлийн замыг өргөтгөх төслийг нийт 137.0 сая ам.долларын хөнгөлөлттэй зээлийн санхүүжилтээр шийдвэрлэж байгаа бөгөөд зээлийн хугацаа нь 18 жил, үүнээс эхний 4 жил үндсэн төлбөрөөс чөлөөлөгдөх юм.

Улаанбаатар-Дарханы чиглэлийн 202 км замыг 4 урсгалтай Asia Highway 3 стандартын 1 дүгээр зэрэглэлийн зам болгосноор Монгол-Орос-Хятад эдийн засгийн корридор байгуулах хөтөлбөр, Бүс ба зам санаачлага зэрэг бүс нутгийн эдийн засгийн хамтын ажиллагааг хөгжүүлэхэд өндөр ач холбогдолтой юм.

Улаанбаатар хотын дулааны шугам сүлжээг шинэчлэх, дэд станцуудыг сайжруулах, шинээр байршуулах, дулаан түгээлтийн хэмнэлтийн горимоор ажиллах аккумуляторуудыг суурилуулах зорилго бүхий Улаанбаатар хотын дулааны сүлжээ төслийг нийт 16.5 сая ам.долларын санхүүжилтээр хэрэгжүүлэх ба үүнээс 10.0 сая ам.доллар нь зээл, 5.0 сая ам.доллар нь буцалтгүй тусламж, үлдсэн 1.5 сая ам.доллар нь техникийн туслалцаа хэлбэртэй байна.  Тус төслийн хүрээнд нийт 3.8км магистралын шугамыг өргөтгөн шинэчилж, насос станцын өргөтгөл хийснээр  1, 3, 4, 10-р хорооллын орон сууцнууд, ХУД-ийн 11, 15-р хороо, БЗД-ийн зарим орон сууцны хорооллуудын дулаан хангамжийг сайжруулах, хэрэглээг хангах боломж бүрдэнэ.

Мөн 7.6км дулааны шугам шинээр татсанаар БЗД-ийн 10-р хороо, Амгалан орчим, 3,4 дүгээр хорооллын эцэс, Бичил хороолол, Толгойт, Цэргийн хотхон орчмын дахин төлөвлөлтийн байршлуудад шинээр орон сууцны хорооллуудыг холбох, дулаанаар хангах боломж бий болно.

Эх сурвалж: barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.