Шинэ жилийн интерьерийн санаа

Шинэ жилийн интерьерийн санаа

Хүн бүхний хүсэн хүлээдэг шинэ жилийн баяр хаяанд ирлээ. Шинэ жилийн баярт гэр бүлээрээ ширээгээ бэлтгэх, ойр дотныхон, хүүхдүүддээ өгөх бэлгээ сонгох, баярын хөтөлбөр бэлтгэх, гоёл чимэглэл болон хувцсаа бэлтгэх, мэдээжийн хэрэг гэрээ ч бас чимэглэх ажил гардаг шүү дээ. 
Шинэ жилийн интерьер бол баярын хамгийн сонирхолтой бэлтгэл ажил юм. Энэ бол дан ганц гацуур модоо чимэглэх ажил биш юм,  гэртээ онцгой, содон, гоёмсог орчинг бүрдүүлэхийн тулд гарын доорхи зүйлс, байгалийн материалаар өрөө тасалгаагаа нийтэд нь ч юм уу, нэг хэсгийг нь тохижуулж баярын уур амьсгал оруулдаг билээ. Улирал бүр хувьсан өөрчлөгдөж байдаг загварын тренд шиг интерьер ч мөн адил хувьсан өөрчлөгдөж жил бүр шинэ содон зүйлсийг дизайнерууд санал болгодог ба орон бүрд өөрийн өвөрмөц онцлогийг тусгасан интерьерийн хэв маягууд байдаг.

Амьдралдаа дурсамж болон үлдэх онцгой баяраараа өөрсдийн хүссэнээр гэрээ чимэглэхийн тулд дараах шинэ жилийн интерьерийн хэв маягуудаас санаа аваарай.  

“Сканди” зөөлөн уур амьсгалыг бий болгоно

Шинэ жил бол өвлийн баяр. Иймээс өвлийн уур амьсгалыг зөөллөж дулаахан мэдрэмжийг төрүүлдэг хэв маяг бол “сканди” юм. “Сканди” интерьерийн хэв маягийн үндсэн чиглэл нь жинхэнэ байгалиараа байх ба дан ганц байгалийн гаралтай материал болох модоор хязгаарлалгүй таар, арьсны хэсэг, үслэг материал, шил, өвөрмөц хээтэй даавуу зэрэг органик материалаар чимэглэлээ хийдгээрээ онцлог. 

Мөн жаккард хэмээх байгалийн гаралтай  улаан, ногоон, хөх, улбар шар зэрэг тод өнгөтэй зурагтай даавуун материалаар хананы чимэглэл, цонхны хөшиг, ширээний бүтээлэг, дэр, сандлын зөөлөвч, тоглоом хийж чимэглэх нь өрөө тасалгааг тод, гоёмсог болгон харагдуулна. Шинэ жилийн гацуур хүртэл байгалиас авсан сэвсгэр ногоон, шинэхэн давирхайн үнэртэй байна. Сүлд модны чимэглэл болох байшин, од, цасан чимэглэл, амьтад, гэрлийг ч гэсэн мод, модон материалаар өөрсдийн гараар урлаж болно. 
Өвлийн улиралд дулаахан мэдрэмжийг төрүүлэхийн тулд жижиг арьсан эдлэл, үслэг материалаар сандал диванаа бүтээх, шалан дээрээ ширдэг болгон дэвсэх нь энэ хэв маягийн салшгүй нэг хэсэг юм.

“Бохо” эрх чөлөөг мэдрүүлнэ
Шинэ жилийн баярын гол эзэд бол залуус, хүүхдүүд байдаг. Тэдэнд ахмад үеийнхнийгээ оролцуулахгүйгээр шинэ жилийн гоёлоо хийхэд “бохо” хэв маяг тохиромжтой. Энэ нь анх Францад үүссэн хэв маяг ба нэг зүйлд баригдахгүй чөлөөт байдлаар шийддэг, харахад эмх замбараагүй ч юм шиг мөртлөө тансаг байдал, цыганы тод өнгийг илтгэдэг. Чимэглэлээ ихэвчлэн өөрсдийн гараар хийдэг ба  гэрэл гэгээтэй, бүтээлч дэс дараалсан байдал чухал ба алт, мөнгөний өнгөтэй гялалздаг чимэглэлээр дүүрэн байдаг, жижигхэн зүйлээр ч гэсэн өнгө оруулан баярын орчинг бүрдүүлдэг. “Бохо” хэв маягийг бүтээхэд хуучны модон тавилга, тод өнгийн олон нэхмэл эдлэлүүд, харахад ядаргаа тайлах төдийгүй сайхан сэтгэгдэл үлдээх олон тооны жижиг чимэглэлийг эсгий, хөвөн, ширэн материалаар  хийдэг. Мод нь байгалийнхаараа байвал дээр, мөрөөдлийн нар ба гэрэл, зүүлт, бүх төрлийн даавуун чимэглэл, салфетка, зул сарын гацуур модонд зориулж хийсэн модон, сүлжмэл тоглоом нь тод, өвөрмөц, дахин давтагдашгүй байдаг. Мөн даавуун дээр гацуур модыг дуурайлган оёж, зурсан ч болно.  

“Рустик” тайвшрал, амар амгаланг илтгэнэ


“Рустик” хэв маяг нь орон нутаг, тосгонд амьдарч байгаа хүмүүсийн сэтгэлд хэдийнээ байр сууриа эзэлжээ. "Рустик" нь дотоод чимэглэлийг тайван амгалан байдлаар дүүргэдэг бөгөөд 
зул сарын гацуур нь хиймэл биш жинхэнэ байдаг, тоглоом чимэглэлийг ихэвчлэн картон, цаас, фанераар хийдгээрээ онцлог. Гутал хэлбэрийн даавуун материалаар хийсэн бэлгийн уутыг хана, тавилга, цонхны чимэглэлд хэрэглэнэ. Модон тавилга болох тавиур, хүрээ, хайрцаг, авдар, сандал ширээг оролцуулан чимэглэнэ.

Цаас, картон, фанер зэрэг материалыг зул сарын гацуур мод, байшингийн чимэглэл хийхэд ашигладаг ба эдгээр нь том хэмжээтэй, энгийн байдаг, ихэвчлэн цас, хавирган сар, одод, амьтдыг хийж чимэглэдэг. Мөн модны боргоцой, тайрдас, мөчир, үндсийг ч ашиглаж болно. 

“Кантри” асуудал багатай орчинд тохирно


Бодит хөдөө, тосгоны амьдрал нь шаргуу хөдөлмөр, даруухан амьдрал, амар амгалангаар дүүрэн байдаг ба шинэ жилээр баяр баясгалан төрөхүйц орчин бүрдүүлэхийн тулд хувийн сууц, байшингаа чимэглэхэд “Кантри” хэв маяг туслах ба гацуур мод, чимэглэлд байгалийн материалууд болох мод, шавар, чулууг ашиглаж болно.

Улаан, цагаан өнгөний суурьтай, дөрвөлжин хэлбэрийн хээтэй байгалийн гаралтай даавуу, "тор" бүхий сүлжмэл нэхмэл эдлэл хэрэглэх нь өрөө тасалгааг тодотгоно. Мөн ханаа мод, чулуугаар өнгөлөх нь бат бэх байдлыг илтгэнэ.
Хөдөөний амьдралын гол эд зүйлс болох сав, хувин, шүүгээ, аяга таваг, ширээ сандлыг ч оролцуулан улаан өнгө  давамгайлсан даавуун салфетка, хормогч, алчуурыг ашиглан чимэглэх нь баяр уур амьсгалыг нэмнэ. Мөн таар, даавуун материал, хөвөн, сүлжмэл тор, тууз, олс зэргийг ашиглан шинэ жилийн чимэглэлийг хийх нь гэрт тань өнгө нэмнэ. 

“Лофт”  шинэ жилийн нууцыг дэлгэнэ

"Лофт" нь ердийн хэв маяг биш юм,  энэ нь энгийн, хязгаартай, зарим талаар дутуу санагдаж ч магадгүй. Томоохон залуу компаний шинэ жилийн арга хэмжээ болох үйлдвэр үйлчилгээний газар, цехийг тохижуулж чимэглэхэд тохиромжтой ба орон сууц болгон хувиргасан юм шиг сэтгэгдэл төрүүлдэг. Мөн ерөнхийдөө том өрөөтэй,  гэрээ чимэглэх цаг зав байхгүй, эсвэл байшингаа худалдаж авсан, "засвар" горимд амьдарч буй гэр бүлд ч тохиромжтой.
Интерьерийн гол  шийдэл нь гэрэл, бас дахин гэрэл, агаартай орон зай, ногоон гацуурханыг ч зохиомлоор хийж гэрлээр ороож болно. Ханын чимэглэлийн талаар ямар ч асуудалгүй, тоосго, чулуун хана, дам нурууг утсан төмөр хийц бүхий гэрлээр чимж болно. Нэхмэл эдлэл болох бөс даавуун материалыг чимэглэлд ашиглах ба  цонхонд хөшиг шаардлагагүй болно. Утсан төмөр ороомог, металл эдлэл болон бусад ижил төстэй материалан чимэглэл голлодог. 

“Шебби-шик” эртний үлгэрийг санагдуулна

Олон хүмүүсийн мэддэг, оросын "Щелкунчик" хүүхэлдэйн киноны өнгө төрхийг санагдуулмаар хэв маяг юм. Энэ шинэ жилийн интерьерээр байшинг бүхэлд нь чимэглэн хувиргах шаардлагагүй, жижиг булан, зочдод харагдахуйц  газрыг зохион байгуулах нь хангалттай юм. Цагаан, ягаан ба мөнгөлөг өнгөтэй гацуур мод, торгомсог зангиа, тууз, ягаан цагаан шилэн бөмбөлөг,  цасан ширхэг нь гацуур модыг чимж, донж оруулж байдаг нь гоёмсог болон тансаг байдлыг илтгэнэ.


Цагаан өнгийн гацуурхан дээр өнгө өнгийн чимэглэлүүд, агаарт гаа, ваниль, зефир үнэртэх мэдрэмж төрүүлсэн, эмээгийн гоёл чимэглэлийн хайрцаг, авдараар гангарсан энэ хэв маяг нь үлгэрт дуртай хүмүүсийн хэрэгцээг хангадаг. 

“Фьюжн” өнгөний хослолыг төрүүлнэ

“Фьюжн” дотоод засал чимэглэлийн хэв маяг өнгөрсөн зууны дунд үеэс гарч ирсэн ба үг хэлэх эрх чөлөө, шинэ технологи дэлгэрсэн үе таарсан байсан. Энэ үед дотоод засал нь сонгодог хэв маягаас бүрдсэн байсан тул энэ хэв маягийн шинэ жилийн интерьер нь хамгийн ардчилсан байж магадгүй юм. Ажиглан анхаарал татсан гол зүйл нь цагаан, саарал, хүрэл эсвэл бор өнгийн хослол юм. Энэ хэв маяг нь таны хүсдэг бүх зүйлийг бий болгоно: цагаан тугалган саван дахь шампанск, хиймэл цастай байгалийн зул сарын гацуур мод, цасан ширхэгийн чимэг,  улайсгасан чийдэн, өнгө өнгийн лаа зэрэг нь тун чиг эрхэмсэг байдлыг илтгэнэ. “Фьюжн” бол гоёл чимэглэлийн хуваарилалт, өнгөний схемийн хэв маягийг өөрчлөгч, том том чимэглэл бүхий гацуур модноос бүрдсэн, "би үүнийг л эхнээс нь бүтээсэн" гэж урам зориг өгөх онцлог шинэ жилийн интерьер үүсгэх сайхан боломж юм.

Ид шидийн шинэ жилийн баяраар ямар ч хэв маяг, гоёл чимэглэлийг сонгосон ч болно, хамгийн гол нь гэр бүл, хүүхдүүдийн чинь хүсэлд нийцсэн, таныг хүрээлэх хайртай хүмүүсийн тань инээмсэглэл, баяр баясгаланаар дүүрэн байх орчинг бүрдүүлээрэй. Хуучин оноо амжилт бүтээлээр дүүрэн үдэж, шинэ оноо урам зоригтой угтаж байгаа уншигч та 2020 ондоо аз жаргал, амжилтаар дүүрэн байгаарай. 





 
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.