Хүүхэддээ зориулан мөрөөдлийн орон зайг нь бүрдүүлээрэй

Хүүхэддээ зориулан мөрөөдлийн орон зайг нь бүрдүүлээрэй

Та хүүхдийнхээ өрөөг хэрхэн, яаж тав тухтай тохижуулахаа мэдэхгүй байна уу? Тэгвэл бага насны хүүхдийн өрөөний интерьерийн шинэлэг санаануудыг бэлтгэн хүргэж байна. Хүүхэд гэдэг цагаахан ертөнц. Бүх зүйлсийг гэгээлгээр хардаг учраас олон өнгийн өнгөлөг зүйлс дуртай байдаг. Тиймээс тод өнгөөр эсвэл дуртай өнгөөр нь өрөөг засаж өгвөл хүүхдэд илүү таатай байхаас гадна өсөлт бойжилт, зан төлөвд эерэг нөлөөтэй. Хүүхдийн тав тухыг бодолцон өрөөг нь хичээл хийх, тоглох, амралтын хэсэг гэж хувааж өгөх нь зүйтэй. Харин тавилгыг сонгохдоо байгалийн цэвэр бүтээгдэхүүн сонгохыг зөвлөж байна. 

Хүүхдийн өрөөний байрлал

Хүүхдийн өрөө байрлуулахад зүүн ба зүүн урд, баруун зүг ээлтэй байдаг. Зүүн зүг энерги сайжруулах холбоотой мандаж буй нар мэт эрч хүчтэй сэргэлэн цовоо байхыг илэрхийлдэг. Баруун бол тайван тогтвортой энергитэй гүн бат нойрсоход зохицсон зүг юм.

Тавилга,эд зүйлс

 

Хүүхдийн өрөөнд гялтгар, хурц өнгөтэй, өнцөгтэй тавилгаас илүү эрүүл мэндэд  сайнаар нөлөөлөх, чанартай модон тавилгыг сонгох хэрэгтэй. Мод нь агаар нэвтрүүлж, өрөөний энергийг нэмэгдүүлж, зогсонги байдалд орохоос сэргийлдэг тул хүүхдийн өрөөнд нэн тохиромжтой. 
 Өнгө

Хананы өнгө хүүхдийн харааг ядраахгүй, тайвшруулах өнгөтэй байвал зохимжтой. Мэргэжилтнүүд хүүхдийн өрөөнд хамгийн тохиромжтой өнгийг цайвар ногоон гэж үздэг ч мэдээж хүүхдийн хүйс, зэргийг харгалзан эрэгтэй хүүхдийн өрөөнд усан цэнхэр, эмэгтэй хүүхдийн өрөөнд цайвар ягаан өнгөөр сонгож болох юм. Цагаан өнгө цэвэр цэмцгэр харагдах давуу талтай. Хананд өлгөдөг даавуун зурагнууд нь энергийг удаашруулах, тайван амгалан уур амьсгал, нам гүм орчныг бүрдүүлэхэд чухал нөлөөтэй байдаг байна.

Гэрэлтүүлэг
Хэдийгээр гэрэлтүүлэг интерьерийн чухал хэсэг хэдий ч хүүхдийн өрөөнд үүнийг чухалчилдаггүй. Хүүхдийн өрөөний гэрэлтүүлгийг  гэрлийн төвшнөөр тохируулдаг чийдэнг сонгох нь зүйтэй. Зөвхөн таазандаа гэлтгүй ханандаа байрлуулвал өрөө илүү уужим, саруул харагдана. Унтлагын өрөөний гэрэл хэтэрхий тод өнгийн хүчтэй байх нь хараанд муу нөлөөтэй тул даавуун бүрхүүлтэй ширээний гэрэл тохиромжтой. Учир нь даавуу гэрлийн хурц тусгалыг буруулдаг байна. Хэрэв таны хүүхэд харанхуйгаас айдаг бол  бүүдгэр таатай орчинг бүрдүүлвэл шөнө тайван нойрсоход тус болох нь гарцаагүй .

Ор

Унтлагын өрөөний хамгийн чухал зүйл бол ор. Ороо сонгохдоо матраасаа зөв сонгож хэрэгтэй. Ор заавал модон материалаар хийгдсэн байх албагүй ч модон ор байвал соронзон долгионы оронг саармагжуулдаг тустай тул хамгийн сайн сонголт байх болно. Мөн ороо цонхноос хол байрлуулах хэрэгтэй. 

Шал
Хүүхдийн өрөөний шаланд тавигдах нэн түрүүний шаардлага бол цэвэрлэхэд хялбар, бага цаг зарцуулагддаг байх. Цэвэр модон, паркетан шал хамгийн тохиромжтой. Хэдий хивс, дрож өрөөнд дулаан уур амьсгал оруулдаг боловч тоос шороо их татдаг учраас эрүүл ахуйн хувьд тийм ч зөв сонголт биш. Хивсэнцэр тавьж болох ч угааж цэвэрлэхэд хялбар даавуун дэвсгэр сонгоорой. Өнгөний хувьд завсрын, бүдэг өнгөтэй байх нь зохимжтой.

Тааз 

Хүүхдийн өрөөний таазыг төрөл бүрээр хийж болно. Жишээ нь: одтой тэнгэрт саран хэлбэртэй гэрэл гийж байгаа эсвэл үүлтэй тэнгэрийг дүрсэлсэн, шувууд нисэж, цаасан луу хөвж ч болох юм. Энэ бүхэн таны сэтгэн бодох чадвар хүүхдийн хүсэлтээс хамаарна. Эцэг эхчүүд хэр бүтээлч хандахаас шалтгаална шүү.

Хөшиг

Хөшгийг зөвхөн нарны их гэрлээс болон гудамжны шөнийн гэрэл, шөнийн харануй мөн сарны гэрлээс хамгаалах зэргээр хэрэглэхэд зориулан сонгоорой.

Хүүхдийн өрөөнд анхаарах, цээрлэх, зайлсхийх зүйл:

Онгорхой хаалга: Шөнө өрөөнийх нь хаалгыг хааж, хөшгийг нь татаж бай. Энэ нь энергийн урсгалыг зөөлрүүлж, хүүхдийг тайван унтахад тусална.
Цонх: Орны толгойг цонхон доор таарахаар байрлуулж болохгүй. Энд энергийн урсгал  хэт идэвхтэй байдаг тул тайван унтахад бэрхшээл гарах магадлалтай.

Тавилга: Хүүхдэд орон зай хэрэгтэй байдаг учраас хэт том, овор ихтэй тавилга тавихаас зайлсхийхээс гадна дугуй сандал ширээ сонгох нь зөв.

Цахилгаан хэрэгсэл: Онц шаардлагаүй бол хүүхдийн өрөөнд телевизор, компьютер, видео тоглуулагч гэх мэт цахилгаан хэрэгслийг байлгах хэрэггүй. Хүүхдийг хэт ядаргаанд оруулдаг.

Нярай хүүхдийн өрөө

Хүүхэдтэйгээ байнга хамт унтах нь хүүхдийг ганцаараа унтах чадамжгүй болгодогоос  гадна хүүхдийн агаарыг чөлөөлж өгдөг. Тиймээс нэг өрөөнд тусдаа оронд унтах юмуу ганцаарчилсан өрөөтэй байлгах хэрэгтэй.
 

Хүүхдийг шөнө бат бөх унтуулахын тулд гэрлийг унтраан  шаардлагатай үед бүдэг гэрэл ашиглаж байх. Томчууд хэт халуун, эсвэл хүйтэн байхад унтаж чаддаг. Үүнтэй адил хүүхэд ч цельсийн 21 хэм хамгийн тохиромжтой. 
 
 

 
 
 
 
 
 
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.