Хот байгуулалтын чиглэлийн мэргэжилтэнг Москва хотод дадлагажуулах боломжтой боллоо

Хот байгуулалтын чиглэлийн мэргэжилтэнг Москва хотод дадлагажуулах боломжтой боллоо
Нийслэлийн Засаг дарга С.Амарсайхан болон бусад албаны хүмүүс 1956 онд Улаанбаатар хотын ерөнхий төлөвлөгөөг гаргаж байсан ОХУ-ын Москва хотын Хот байгуулалт, хөрөнгө оруулалтын хөгжлийн Гипрогор институтаар  /2019.12.05/ зочилж, институтын удирдлагуудтай санал солилцлоо.
Тус институт нь Улаанбаатар хотын анхны ерөнхий төлөвлөгөөг гаргаж, хожим нь 1963, 1971, 1986 онд  ерөнхий тодотгол хийж байсан түүхтэй бөгөөд 2013-2015 онд  онд Улаанбаатар хотод хэд хэдэн удаа зочилж, нийслэлийн ерөнхий төлөвлөгөөний газар, зураг төслийн хүрээлэнгийн үйл ажиллагааг дэмжин хамтран ажиллаж байжээ. Тиймээс дагуул хотууд болон Аеросити, Майдар сити зэрэг шинэ хотуудын төлөвлөлтөд тус институтаас санал зөвлөмж авч, Монгол дахь Хот байгуулалт, судалгааны институтын үйл ажиллагааны удирдах болон бодлогын зөвлөлд орж ажиллахыг урьлаа. 
Түүнчлэн Гипрогор институтын удирдлагуудад хандан нийслэлийн хот байгуулалтын салбарын мэргэжлийн боловсон хүчний мэдлэг чадварыг дээшлүүлэх чиглэлээр дадлагажуулах, туршлага солилцох боломжийг бий болгох зэрэг асуудлыг дэмжиж  өгөхийг хүссэн юм. 

ОХУ-ын Москва хотын Хот байгуулалт, хөрөнгө оруулалтын хөгжлийн Гипрогор институтын Ерөнхий захирал Елена Станиславовна “Манай институт энэ жил 90 жилийн ойгоо тэмдэглэж байна. Энэ байгууллага бол ОХУ-ын Хот байгуулалт, төлөвлөлтийн чиглэлийн анхны институтуудын нэг юм. Бид үйл ажиллагаагаа орчин үеийн техник дэвшлийн ололт амжилттай уялдуулан улам бүр хөгжүүлэн ажиллахыг эрмэлзэж байгаа.  Москва хотын төлөвлөлтийн хувьд иргэд амьдрахад таатай орчныг хэрхэн бүрдүүлэх вэ гэдэг цөм асуудлыг үндэс болгон хэрэгжүүлж байна. Аливаа хотын ерөнхий төлөвлөгөө нь  эрх зүйн орчин, статистик тоон судалгаа, орон зайн боломж, эдийн засгийн чадавхи гэсэн дөрвөн хүчин зүйлтэй уялддаг. Мөн иргэдийн санал хүсэлтийг цахим хэлбэрээр авч төлөвлөгөөнд тусгах нь чухал. Цаашдаа бид хамтын ажиллагаага өргөжүүлж, бидний зүгээс та бүхэнд мэддэг чаддаг зүйлээрээ туслахад бэлэн байна” гэв. 


Уулзалтын үйл ажиллагаа үр дүнд хоёр тал хамтын ажиллагааны шинэчилсэн санамж бичгийг боловсруулан Москва хотод Улаанбаатарын хот төлөвлөлтийн мэргэжлийн боловсон хүчинг тодорхой хугацаагаар сургаж дадлагажуулах, зураг төсөлд мэргэжлийн зөвлөгөө өгөх чиглэлээр хамтран ажиллахаар боллоо. 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.