Т.Ганбаатар: Усгүйжүүлэх байгууламж хоногт 1100м3 лагийг усгүйжүүлээд байна

Т.Ганбаатар: Усгүйжүүлэх байгууламж хоногт 1100м3 лагийг усгүйжүүлээд байна
Орон сууц, нийтийн аж ахуйн салбарын талаарх төрийн бодлого, хөгжлийн ойрын ба хэтийн чиглэлийг  хэрэгжүүлэхэд мэргэжлийн удирдлага, зохицуулалт, зөвлөгөө, дэмжлэгээр хангах замаар салбарын үйл ажиллагааны болон эдийн засгийн чадавхийг сайжруулах нөхцөлийг бүрдүүлэх зорилготойгоор БХТ-ийн нийтийн аж ахуйн хэлтэс ажиллаж байна. Энэ жил НАА-н хэлтэс Улсын чанартай томоохон ажлуудыг амжилттай хийж хэрэгжүүллээ. 2019 оны ажлын үр дүнгийн талаар Нийтийн аж ахуйн хэлтсийн дарга Т.Ганбаатартай ярилцлаа.
 
2019 онд хэрэгжүүлэх ажлын  төлөвлөгөөний биелэлт хэдэн хувьтай байна вэ?
-Манай хэлтсийн 2019 онд хийх үйл ажиллагаа төлөвлөгөөний дагуу явагдаж, эхнээсээ үр дүн гарсан. Салбарын  бодлого, хууль тогтоомжийг хэрэгжүүлэх хүрээнд төрөөс нийтийн аж ахуйн талаар баримтлах бодлогын баримт бичгийг боловсруулах ажлыг хийгээд дуусаж байна бид өөрсдийн саналаа өгч тусгуулсан. Мөн Хот суурины ус хангамж, ариутгах татуургын ашиглалтын тухай хуульд нэмэлт өөрчлөлт оруулах тухай хуулийн төсөлд саналаа тусгуулсан. Уг хуулийг боловсруулаад энэ сарын 11-нд БХБ-ын сайд Х.Баделхан  УИХ-ын даргад өргөн барьсан. Орон сууцны тухай хуульд нэмэлт өөрчлөлт оруулах тухай хуулийн төслийн ажлын хэсэгт багтаж, хуулийг төслийг Хууль зүйн яам, Сангийн яамаар хянуулж үр дүнг нь  нэгтгэгдээд УИХ-д өргөн барихад бэлэн болсон. Тогтвортой хөгжлийн зорилт 2030 төлөвлөгөөг боловсруулж, энэ ажилтай холбоотой нийтийн аж ахуйн салбарт Бодлогын баримт  бичиг гарч байгаа. Ус хангамжийн системийн аюулгүй байдал, автоматжуулалтад хөрөнгө оруулалтыг үе шаттайгаар тусгах, саналаа нэгтгэж өгсөн байгаа.

-Энэ жилийн гол бүтээн байгуулалтын нэг Лаг усгүйжүүлэх байгууламжийн ажил дууссан уу. 
-Барилга, байгууламжийн захиалагчийн  хэлтсийн хяналтын инженерийг оролцуулж Төв цэвэрлэх байгууламжийн лагийг цэвэрлэж, үнэргүйжүүлэх ажлын хүрээнд хэд хэдэн  ажлыг хэрэгжүүллээ. Хамгийн яаралтай, богино хугацаанд хийгдэх лаг усгүйжүүлэх байгууламжийг ашиглалтад өгөх ажлыг гүйцэтгэж,  улсын комисст хүлээлгэж өгөөд  байна. Хоногт 1000-1100м3 лагийг усгүйжүүлж байна.  Лаг усгүйжүүлэх байгууламж  хэвийн ажиллаж байна. Мөн ашиглагч байгууллага болох төв цэвэрлэх байгууламжийн инженер, техникийн ажилчидтай туршилт тохируулга дээрээ хамтраад ажиллаад явж байна.

-Ашиглагч байгууллага бүрэн бие дааж ажиллаж байгаа юу?
- Туршилт тохируулгын ажил дээр хамтарч ажиллаад энэ хугацаанд ямар нэгэн техник технологийн эвдрэл гэмтэл гарвал гүйцэтгэгч компанитайгаа хамтраад засварлаад явж байна. Усгүйжүүлэх байгууламж ашиглалтад орсон үр дүн нь лагийн үнэр багасаж, эзлэхүүний хувьд 6-7 дахин багассан.

-Лаг овор хэмжээнээс гадна үнэр нь багассан гэхээр, одоо лагийн стандарт, дүрэм шинээр батлагдаж байгаа юу?
-Цэвэрлэх байгууламжаас гарсан лаг, тунадсыг боловсруулах, бүтээгдэхүүн болгон ашиглах дүрмийн төсөл боловсруулах үе шатандаа яваа. Мөн лагийн стандарт, холбогдох дүрэм журам боловсруулах , Цэвэрлэх байгууламжийг шинээр барих, өргөтгөн шинэчлэх байнгын ашиглалтад оруулахад шаардагдах техникийн баримт бичиг /улсын комиссын акт/-ийн төслийг Барилга байгууламж материал үйлдвэрлэлийн хэлтэс, Норм нормативын хэлтэстэй хамтраад боловсруулаад явж байна. Мөн бохир усны лагд суурилсан органик бордооны  стандартын техникийн даалгаврыг Норм, нормативын хэлтэстэй хамтран боловсруулан Барилга, хот байгуулалтын яаманд хүргүүлээд байна. Стандарт, дүрэм журам боловсруулах асуудлаар Азийн хөгжлийн банк ажлын хэсэгт орж ажилласан.

-Усгүйжүүлэх байгууламжаас гадна хур лагийг үнэргүйжүүлж боловсруулах төсөл амжилттай хэрэгжсэн. Энэ төсөл хэр хугацаанд үргэлжлэх вэ?
-2018 онд эхлүүлсэн хур лагийг үнэргүйжүүлэх төслийг Эко тайхи компани 2 жилийн хугацаанд гүйцэтгэж, гүйцэтгэл 90 гаруй хувьтай байна. Мөн хоёр картны лагийг хар шороон хөрс болгох ажлыг “Ховд тул” ХХК гүйцэтгэж байна гүйцэтгэл 90 гаруй хувьтай байна.  Ирэх арван хоёрдугаар сарын 6-нд төслийн хаалтыг хийхээр төлөвлөж байна.

-Үнэр нь багассан гэж мэргэжлийн байгууллагууд болон газар дээр нь очиж үзсэн хүмүүс хэлж байгаа ч иргэд тэр бүрд итгэлгүй байна?
- Анх 2018 онд энэ ажлыг эхлүүлэхээс өмнө Ногоон титэм гэж компанитай хамтран Төв цэвэрлэх байгууламжийн ойролцоо 18 цэгт агаарын чанарын үнэрт бодисуудын ялгарал, тархалтын судалгаа хийсэн. Тэгвэл 2019 оны сүүлээр 12 сард тус компани өмнө нь авсан 18 цэгт хэмжилт хийж үр дүнг нь танилцуулах юм.

-Лаг боловсруулж бордоо болгох боловсруулсан бордоог юунд ашиглаж болох талаар хийсэн олон туршилтыг харсан. Энэ бордоог цаашид хэрхэн ашиглах гарцаа олсон уу?
-Байгаль орчин аялал жуулчлалын яам болон Нийслэлийн байгаль орчны газартай холбогдох мэдээллүүдийг өгсөн. Ажил хэрэг болгохоор ярьж байгаа.  Бордоог туршиж, ургамлын өсөлт хөгжлийн нөлөөлөл, болон ахуйн жорлон ариутгах зэрэг олон туршилтуудыг хийсэн. Тиймээс дээрх газруудтай хамтарч хаана хэрэглэж болох талаар саналуудыг хэлэлцээд байна. Жил бүр Нийслэлийн ойр орчмоос хар шороон хөрс ухаж бүтээн байгуулалтад ашигладаг. Бидний лагаас гарган авсан бордоог Улаанбаатар хотын хогийн цэгүүдийн хуримтлагдсан хог хаягдлыг булшлах технологид ашиглах гээд хэрэглээ бий.

-Нийслэлийн цэвэрлэх байгууламжийн асуудал шат дараатайгаар явагдаж байна. Ер нь орон нутагт цэвэрлэх байгууламжийн асуудал хэр байдаг вэ?
-Өнгөрсөн жил бид хөдөө орон нутагт нийтийн аж ахуйн байгууллагуудаар явж, мониторингийн судалгаа хийсэн. Эндээс үзэхэд Нийтийн аж ахуйн байгууллагын Цэвэрлэх байгууламжуудын үйл ажиллагаа ихэнх аймгийн төвүүдэд нь хүндэрсэн бүрэн цэвэрлэгээ хийгдэхгүй нөхцөл байдалтай болсон байна. Байгууламжууд нь насжилт өндөртэй цэвэрлэгээ хийх боломжгүй болсон цэвэрлээгүй бохир ус байгальд хаяж байна. Өөрөөр хэлбэл технологийн дамжлага алдагдсан гэсэн үг. Тиймээс Азийн хөгжлийн банкны  хөрөнгө оруулалтаар хэд хэдэн аймгийн цэвэрлэх байгууламжийг үе шаттайгаар шинээр барьж эхнээсээ ашиглалтанд ороод байна.

-Орон нутагт мониторингийн судалгаагаар явсан гэлээ. Үр дүн хэр гарч байна?
- 2019 онд Дорнод, Сүхбаатар, Өмнөговь, Говьсүмбэр, Дундговь, Өмнөговь гээд таван аймагт болон нийслэлийн ойролцоох дүүргүүдийн Нийтийн аж ахуйн  байгууллагуудаар мониториг хийн ажилласан. Багануур дүүрэгт судалгаа хийгээд дүүргийн холбогдох газруудад зөвлөмжийг хүргүүлсэн. Энэ зөвлөмжтэй холбоотой үе шаттай ажлууд хэрэгжээд байна. Тухайлбал ус хангамжийн системийг автоматжуулах  ухаалаг системийг нэвтрүүлэхээр зураг төсөл хийгдэж бэлэн болсон. Мэдээж ажлын зураг  хийхэд санхүүжилт хэрэгтэй.  Харин энэ бүгдийг Дүүрэг болон Нийтийн аж ахуйн байгууллага нь  хамтраад төсөвтөө тусгаад шийдсэн. Багануур дүүрэг зураг болон төсвөө хийлгэсэн. Төсвийг нь  Барилга хот байгуулалтын яамаар дамжуулан  2020 оны төсөвт 2,2 тэрбум тусгаад явж байна. Энэ нь  бодит ажил болоод явчих юм бол Багануур дүүргийн ус хангамжийн систем автомат, ухаалаг, диспетчерийн удирдлагатай болно. 

-Танай хэлтэст орон сууц хувьчлал, шинээр ашиглалтад орсон орон сууцны мэдээллийн сан байдаг. Энэ ажлын хүрээнд ямар ажил хийгдэж байна вэ?
-Тийм ээ. Улсын хэмжээний орон сууц хувьчлалын мэдээллийн сангийн бүрдэлтийг хангах нэмэлт баяжилт хийх, Орон сууц хувьчлалын асуудлаар мэргэжил арга зүйн дэмжлэг үзүүлж ажилладаг.  Энэ хүрээнд орон сууцийг хувьчлах хүсэлтэй байгууллага ажилчиддаа өгөх мэдээллийн сангаас шүүлт хийх. Орон сууц өмчлөх эрхийн гэрчилгээ олгох хоёр чиглэлээр ажиллаж байгаа юм.  Иргэн тухайн мэдээллийн санд бүртгэлгүй байвал дараагийн шатанд орон сууцны гэрчилгээ олгох үе шаттай ажил явагддаг гэсэн үг.  Гэхдээ улсын өмчийн орон сууц дийлэнх нь хувьд шилжиж энэ ажил харьцангуй багассан. Харин ашиглалтад орсон барилга, байгууламж /орон сууц/-ийн борлуулалт, үнэ ханшны судалгаа, “Түрээсийн орон сууц” хөтөлбөр нэгтгэн боловсруулалт хийж тайланг Барилга хот байгуулалтын яаманд хүргүүлэх, удирдлагыг мэдээллээр хангах ажлыг гүйцэтгэдэг.

Ярилцсанд баярлалаа.
Эх сурвалж: БХТ

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.