Анх удаа орон сууц худалдан авсан иргэд 6 сая төгрөгийн хөнгөлөлт эдэлнэ

Анх удаа орон сууц худалдан авсан иргэд 6 сая төгрөгийн хөнгөлөлт эдэлнэ

2020 оны 1 дүгээр сарын 01-ний өдрөөс хэрэгжиж эхлэх  “Хувь хүний орлогын албан татварын тухай хууль”-ийн 22, 23 дугаар зүйлд зааснаар 9 төрлийн орлогын чөлөөлөлт, 10 төрлийн албан татварын хөнгөлөлт эдлэхээр хуульчлагдаад байгаа. Үүнээс хөнгөлөлтийн хувьд амьдран суух зориулалтаар байр, орон сууц анх удаа худалдан авсан, барьсан иргэд 6 сая хүртэлх төгрөгийн албан татварын хөнгөлөлт эдлэх боломжтой болсон билээ. Уг хөнгөлөлтийг арилжааны банкаар дамжуулан найм, 18 хувийн хүүтэй зээл авсан иргэд хамрагдах боломжтой юм.
Харин татварын багц хуулиар 2020 оны нэгдүгээр сарын 1-ны өдрөөс орон сууцны гэрчилгээ нь гарсан тохиолдолд буцаан олголтын мөнгийг авах боломж нь бүрдэнэ. Хэрвээ 2019 онд орон сууцных нь гэрчилгээ гарсан бол буцаан олголтыг авах боломжгүй гэж ирэх оноос хэрэгжих хуульд журамласан байна. Тиймээс таны гэрчилгээ 2019 онд гарсан бол одоогийн хэрэгжиж буй хуулиар 30 хүртэлх сая төгрөгийн орлогыг чөлөөлөх буюу 3 хүртэлх сая төгрөгийн албан татварыг буцаан авахаар байгаа юм.  

Орон сууцны худалдан авч хөнгөлөлтөд хамрагдахаар баримт бүрдүүлж байгаа иргэд дараах зүйлд анхаарах хэрэгтэй. Үүнд хувь хүмүүс хоорондоо өөрийн амьдран суудаг орон сууцаа худалдахаас бусад захиалгаар бариулах болон орон сууц худалддаг хуулийн этгээдээс орон сууц худалдан авсан бол и-баримтыг шаарддаг. Тиймээс цахим төлбөрийн баримтыг авсан байх хэрэгтэй. 
Мөн орлогоо нотлох ёстой учраас орон сууц худалдан авсан орлогоо хэрхэн бүрдүүлсэн талаарх нэмэлт материалаа бүрдүүлэх шаардлагатай юм. Хэрэв банкны зээлээр авсан бол зээлийн гэрээ, төлбөрийн баримтыг, хуримтлалаараа орон сууцаа авсан бол орлогоо хуримтлуулсан гэдгээ нотлох нэмэлт материал шаардлагатай. 

Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.