Сүхбаатар дүүрэгт анхны жишиг хороолол бий болно

Сүхбаатар дүүрэгт анхны жишиг хороолол бий болно
БНХАУ-ын Засгийн газраас Монгол Улсын Засгийн газарт олгох 350 сая юанийн буцалтгүй тусламжийн хөрөнгөөр нийслэлийн Сүхбаатар дүүргийн есдүгээр хорооны нутаг дэвсгэрт “Ногоон нуур 1008 айлын орон сууц” төсөл хэрэгжиж байна. Төсөл хэрэгжүүлэх хэлэлцээрийг Барилга, хот байгуулалтын яам, БНХАУ-ын тал үзэглэж, санхүүжилтийн асуудал шийдвэрлэгдэн, ерөнхий төлөвлөгөө батлагдаад байгаа юм. 



Төслийн хүрээнд Монголын талын хариуцсан газар чөлөөлөх, зураг төслийг бэлэн болгох, шаардлагатай дэд бүтцийг бүрэн гүйцэтгэх зэрэг төслийн барилгажих талбайг бэлтгэх ажлуудыг ирэх оны дөрөвдүгээр  сараас өмнө бэлэн болгох юм. 
Өнгөрсөн сарын 23-25-ны өдрүүдэд БХБЯ-ны төсөл хэрэгжүүлэх нэгж, зураг төслийн ажлыг гүйцэтгэгч компанийн төлөөлөл бүхий ажлын хэсэг БНХАУ-ын Бугат хотод зорчиж “Ногоон нуур 1008 айл орон сууц”  барилгын төслийн ажлын зураг болон төсвийг хятад хэл дээр бэлтгэж хүлээлгэн өгсөн байна. Одоогоор төслийн эрх зүйн баримт бичгүүд албажих, барилга угсралтын ажлын ерөнхий гүйцэтгэгчийг шалгаруулах ажил хүлээгдэж байгаа бөгөөд төслийн бэлтгэл ажил 60 гаруй хувьтай явж байна. Төсөл хэрэгжүүлэх байршилд 2012-2013 онд газар чөлөөлөлт хийгдсэн бөгөөд Нийслэлийн засаг даргын захирамжаар 3.8 га газар эзэмших эрхийг хуучин нэрээр нийслэлийн гэр хорооллын дэд бүтцийн газарт шилжүүлээд байна. 
Батлагдсан хэсэгчилсэн ерөнхий төлөвлөгөөнд тусгагдсанаар 1.9 га газар буюу 36 нэгж талбарыг чөлөөлөх шаардлага бий бөгөөд эдгээр байршилд авто зам, авто зогсоол, ногоон байгууламж, 960 хүүхдийн сургууль, 240 хүүхдийн цэцэрлэгийн бүтээн байгуулалтын ажил хийгдэнэ. “Ногоон нуур 1008 айлын орон сууц” төсөл 36 сарын хугацаанд хэрэгжих бөгөөд 21 давхар, зоорьтой, 8 блок барилга баригдахаар төлөвлөгдөөд байна. 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.