Ц.Батжаргал: Манай компани цахилгаан болон урсдаг шатны угсралт, засвар үйлчилгээгээр мэргэшсэн

Ц.Батжаргал: Манай компани цахилгаан болон урсдаг шатны угсралт, засвар үйлчилгээгээр мэргэшсэн


“Ханбаян констракшн” ХХК-ийн гүйцэтгэх захирал Ц.Батжаргалтай ярилцлаа.

-Юуны өмнө компанийнхаа үйл ажиллагааг танилцуулахгүй юу?
-“Ханбаян констракшн” ХХК нь цахилгаан шат, урсдаг шат, урсдаг зам нийлүүлэлт угсралт, засвар үйлчилгээний үйл ажиллагааг 2009 оноос хойш дагнан явуулж байна. Манай компани нь Улаанбаатар хот төдийгүй Дархан, Эрдэнэт, Хэнтий аймагт цахилгаан шат, урсдаг шат нийлүүлж угсарч, одоогоор 50 гаруй аж ахуйн нэгж, иргэдийн 200 гаруй цахилгаан шат, урсдаг шатны засвар үйлчилгээг хариуцан ажиллаж байна.
-Энэ төрлийн үйл ажиллагаа явуулдаг компани хэр олон бэ. Танай компанийн хувьд ялгарах давуу тал, онцлогийнхоо талаар сонирхуулахгүй юу?
-Энэ чиглэлийн үйл ажиллагаа явуулдаг, улсын бүртгэлтэй байгууллага, аж ахуйн нэгж олон боловч эдгээрээс тогтвортой, тасралгүй, чанартай үйл ажиллагаа явуулдаг нь цөөхөн хэдэн байгууллага бий. Манай компанийн хувьд онцлох зүйл нь цахилгаан шат, урсдаг шатны угсралт, засвар үйлчилгээгээрээ олон жил мэргэшсэн. Мөн БНСУ-ын мэргэжилтэн, инженерийн удирдлаган дор манай угсралтын баг хамт олон  ажилладаг. Энэ баг бүрэлдэхүүн маань үйлдвэрлэгч байгууллагад нэвтрүүлж буй шинэ техник технологийн дэвшил, программ хангамжтай цаг тухай бүрт нь газар дээр нь буюу БНСУ-д очиж суралцаж, сургалтад тогтмол хамрагддаг. Ингэснээрээ бид техник технологийн мэдлэг чадвараа байнга дээшлүүлдэг бөгөөд энэ нь бидний хувьд бусад компаниас ялгарах давуу тал гэж бодож байна.
-Зарим компани зөвхөн борлуулалтандаа анхаарч гарал, үүсэл нь тодорхойгүй цахилгаан шат оруулах, угсралтын ажлаа чанаргүй гүйцэтгэх, улмаар ашиглалтад ороод удалгүй асуудал үүсэх явдал элбэг. Энэ талаар та санал бодлоо хувцаалцахгүй юу?
- Зөвхөн борлуулалт хийхийн тулд гарал, үүсэл нь тодорхойгүй лифт оруулж ирээд угсралтын ажлыг чанаргүй гүйцэтгэхээр шинэ ч бай хуучин ч ялгаагүй лифт чанар, хариуцлагын асуудал яригдах болно. Миний бодлоор гарал үүсэл нь тодорхойгүй лифт оруулж ирэх, угсралтын ажлыг чанаргүй гүйцэтгэх нь өнөөгийн нийгмийн хариуцлагагүй байдал, бүтээн байгуулалтыг мөнгөний нүдээр харснаас үүдэлтэй болов уу. Ер нь цахилгаан шат, лифтийг угсарч ашиглалтад оруулсны дараах ашиглалт, засвар үйлчилгээг тооцоолохгүй, хариуцах эзэнгүй орхидогоос гол асуудал үүсдэг.  “Үнэ дагаад чанар” гэж ярьдаг атлаа ихэнх тохиолдолд эргээд хамгийн хямдхан цахилгаан шатыг сонгодог. Хямдхан цахилгаан шат сонгоод ирэхээр зах зээлдээ эрэлт ихтэй болж гарал үүсэл нь тодорхойгүй цахилгаан шатыг хувь хүн, компаниуд ихээр оруулж ирж байна. Цахилгаан шат нь өөрөө хүний амь нас, барилгатай холбоотой учир үнэ өртөг дээр ганцхан төвлөрч сонголт хийх нь өөрөө эрсдэл дагуулдаг гэдгийг сайн анхаарах ёстой.



-Цахилгаан шат бүрийн зориулалт янз бүр байх. Иймд барилгадаа тохирсон цахилгаан шатыг сонгохын тулд юун дээр хамгийн түрүүнд анхаарах ёстой вэ?
-Мэдээж янз бүр байна. Жишээлбэл, сүүлийн үед хүн ам ихтэй өндөр барилга, орон сууц төвлөрсөн Япон, Солонгос улсад ачаа болон талийгаачдыг зөөвөрлөх зориулалттай цахилгаан шатыг орон сууцанд нэмэлтээр суурилуулж эхэлсэн. Энэ нь бидний хувьд сонсоход эвгүй боловч өндөр хөгжилтэй орнуудын хувьд талийгаачдыг хүндэтгэсэн үйлчилгээ болохын зэрэгцээ цахилгаан шатны зориулалт нэмэгдэж гарч ирж байгаагийн илрэл. Ер нь орчин үед техник технологийн шинэчлэл маш хурдацтай явагдаж байна. Ирээдүйд ч хүний аюулгүй байдал, байгаль орчин, экологийн сөрөг нөлөөгүй, эдийн засаг, хөдөлмөр, үйлдвэрлэлийн хэмнэлттэй технологийг цахилгаан шат үйлдвэрлэгч компаниуд нэвтрүүлэх болно. Дашрамд сонирхуулахад, манай нийлүүлж буй цахилгаан шат нь эрчим хүчийг нөхөн сэргээх, цахилгаан зарцуулалтыг хэмнэх шинэ төхөөрөмжийг нэвтрүүлсэн.
Сонголтын хувьд анхаарах зүйл олон. Өөрөөр хэлбэл, тухайн барилгын онцлогоос шалтгаална гэсэн үг. Жишээлбэл, барилга барихад эхлээд хэмжээ, давхар, аюулгүй байдал, орчин дараа нь загвар дизайн, үнэ зэргийг харах байх. Харин бидний хувьд тухайн цахилгаан шат, лифтийг эргээд хариуцах эзэнтэй, засвар үйлчилгээг тогтмол үзүүлэх мэргэжлийн инженер техникчтэй, тухайн лифтны сэлбэг, эд ангийг нийлүүлдэг эсэхийг анхаарч үзэх нь зүйтэй.
-Сүүлийн үед орон сууцанд цахилгаан шат эвдэрч хүн бэртэж, гэмтсэн тухай  мэдээ мэдээлэл нэлээдгүй гарах болж. Энэ юутай холбоотой вэ?
-Чанаргүй, дүрэм, стандартын дагуу хийдэггүй, нөгөө талаар манайхны монголчилдог зан, мэргэжлийн хүн дутмаг зэрэгтэй холбоотой. Хэдийгээр хичнээн сайн лифт, эд анги, бараа бүтээгдэхүүн байгаад ч өөрийн үндсэн үүрэг, зориулалтыг өөрчилбөл тухайн цахилгаан шатны зориулалт, тохиргоо алдагдах, техникийн алдаа заах, эвдрэл гэмтэл гарах нь тодорхой. Дээр нь угсраад өгвөл боллоо эсвэл лифтээ борлуулаад л боллоо гэсэн сэтгэхгүйтэй шууд холбоотой.
-Цахилгаан шатыг суурилахын өмнө хамгийн түрүүнд юуг анхаарсан байх ёстой вэ?
-Нэгдүгээрт, аюулгүй ажиллагаа, хөдөлмөр хамгааллыг чухалчлах ёстой. Үүний тулд цахилгаан шатыг угсрахын өмнө хонгилын хаалт, цэвэрлэгээ хийгдсэн, анхааруулга, санамж, таних тэмдэг, тэмдэглэгээг дүрмийн дагуу хийсэн байх шаардлагатай.
-Байрны оршин суугчид, зорчигчдын хувьд шинэ суурилуулсан болон хуучин цахилгаан шатанд анхаарах зүйл юу байна. Тухайлбал, олон жил болсон хуучин орон сууцнуудын цахилгаан шат өнөөдөр ямар байдалтай байгаа гэж та бодож байна вэ?
-Шинэ болон хуучин лифтэнд ашигласан өдрөөсөө эхлээд засвар үйлчилгээг байнгын тасралтгүй хийхэд анхаарч ажиллах хэрэгтэй. Үүнд лифтыг эзэмшигч, ашиглагч, засвар үйлчилгээ хариуцагч байгууллага, иргэн гээд хамтын хүчин чармайлтаар хийгдэх ажил. Ингэснээр цаашид лифтыг хэрхэн, ямар хугацаанд ашиглах, насжилтыг уртасгах, найдвартай аюулгүй ажиллагааг хангах үндэс болно.
Олон жил болсон орон сууцнуудын цахилгаан шатыг шинэчлэн засварлах, зарим шаардлагатай эд ангийг солих, иж бүрэн шинэчлэл, өөрчлөлт хийх цаг болсон. Тодруулбал, улсын хэмжээнд 5600 гаруй, үүнээс Улаанбаатар хотод 5000-аад лифт цахилгаан шат байдгаас ашиглалтын хугацаа нь дууссан 250 гаруй лифт, цахилгаан шат одоо ашиглагдаж байна. Иймээс эдгээрийг солих, технологийн шинэчлэлт хийх зайлшгүй шаардлагатай. Ер нь цахилгаан шатны ашиглалтын хугацаа 15-20 жил байна. Одоо үед техник, технологийн шинэчлэл хурдтайгаар явагдаж байгаа тул тухайн цахилгаан шатыг ашиглаж эхэлснээс хойш ашиглалтын хугацааны явцад тухайн цахилгаан шатны удирдлагын систем, хэлхээ, түүнтэй холбоотой эд анги, технологийн дэвшлийг даган өөрчлөлт, шинэчлэлтийг цаг алдалгүй хийж байх ёстой. Үр дүнд нь цахилгаан шатны насжилт, ирээдүйд илүү өндөр зардлаар цахилгаан шатыг бүрэн солиход хүргэхгүй байх сайн талтай.
-Ер нь хэрэглэгчдийн хувьд анхаарах гол зүйл юу вэ. Аюулгүй зорчих мэдлэг мэдээлэл хэр байдаг бол...
-Иргэдэд аюулгүй зорчих мэдлэг мэдээлэл дутмаг. Хэдийгээр цахилгаан шат хариуцдаг компаниудаас зөв зохистой, аюулгүй ашиглах санамж бичгийг өгдөг ч иргэд мөрддөггүй. Мөн лифтний компани л аюулгүй, осол авааргүй явуулах ёстой мэтээр сэтгэхгүй, хандлагатай байдагтай холбоотой. Ашиглалтын хувьд санамж, зааврын дагуу ашиглаж, хэрэглэх нь чухал. Учир нь, зааврын дагуу ашиглавал эргээд ямар нэг осол аваар, эрдэнэт хүний амь нас, эрүүл мэнд хохирохгүй байх нөхцөл бүрддэг. Зорчигч удирдлагын товчлуурыг нэг л удаа дарахад хангалттай. Лифт команд аваад удирдлагын системийн дагуу үйлдэл хийдэг.

Эх сурвалж: Барилга.МН

Сэтгэгдэл (1)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    Б.Хишигсүрэн 28 өдрийн өмнө 112.72.15.42

    Та бүхний ажилд амжилт хүсье.