Хүүхдийнхээ тоглоом, номын тавиурыг хийцгээе

Хүүхдийнхээ тоглоом, номын тавиурыг хийцгээе

Бяцхан үрс маань өдрөөс өдөрт том болж өсөн өндийсөөр байна. Хүүхдүүд төрөл бүрийн тоглоомоор тоглох, ном унших, зураг зурах сонирхолтой байдаг ба үеийн найзуудтай тоглох, хөгжилдөн наадах, чөлөөт цагаа өнгөрөөх тодорхой хэмжээний буланг хүүхдийн өрөө тасалгаанд төлөвлөх хэрэгтэй. Энэ булангийн үндсэн тавилга нь тоглоом, номоо хураах тавиур байх ба тавиур нь хүүхдийн нуруунд тохирсон өндөртэй, бие даан тоглоом, номоо хураагаад тавиур дээр тавьж өрөх боломжтой, авсаархан, үзэмжтэй, хүүхдэд аюулгүй байх ёстой. Тоглож дууссаны  дараа тоглоом, номыг нь тавиур дээр хураалгаж, хүүхдээ багаас нь эмх цэгцтэй  сургах нь чухал. Энэ дугаарт хүүхдийн ном, тоглоомын тасалгаатай тавиурыг өөрсдөө хэрхэн хийх талаарх зөвлөгөөг оруулж байна. Хүүхдийн номын тавиурт 16 мм зузаантай МДФ хавтан, эсвэл тавилгын хавтанг ашиглаж болох ба дараах хэмжээтэй материалуудыг бэлтгэсэн байх шаардлагатай.

  1. Хажуу тал -2 ширхэг, 300 x 756мм хэмжээтэй, зузаан-16мм

  2. Суурь хавтан-3 ширхэг, 268 x 764мм хэмжээтэй, зузаан- 16мм

  3. Нүүрэн талын, дээд хэсгийн модон хавтан-1 ширхэг, 70 x 764мм хэмжээтэй

  4. Нүүрэн талын, дунд хэсгийн модон хавтан-1 ширхэг, 90 x 764мм хэмжээтэй

  5. Нүүрэн талын, доод хэсгийн модон хавтан-1 ширхэг, 130 x 764мм хэмжээтэй

  6. Ар талын дээд хэсгийн модон хавтан-1 ширхэг, 130 x 764мм хэмжээтэй

  7. Ар талын дунд хэсгийн модон хавтан-1 ширхэг, 150 x 764мм хэмжээтэй

  8. Ар талын доод хэсгийн модон хавтан-1 ширхэг, 180 x 764мм 

  9. Дээд тавиурын тусгаарлагч-3 ширхэг, 114 x 268мм хэмжээтэй

  10. Дунд тавиурны тусгаарлагч-2 ширхэг, 134 x 268мм хэмжээтэй

  11. Суурийн хавтан-2 ширхэг, 44 x 268мм хэмжээтэй

  12. 4 x 45мм эрэг шураг

  13. Модны цавуу, зүлгүүр

  14. Модны өнгийн будаг

Багаж хэрэгсэл: Цахилгаан өрөм, өрөмний хошуу, таслагч, цахилгаан хөрөө, ир, цахилгаан зүлгүүр, метр, харандаа, шрупдэгч
Энэ тавиурыг хийхэд шаардлагатай бүх зүйлс таны гарын доорх хэрэгслүүд байна.

1. Эхний . алхам бол нүүрэн талын хавтангуудыг 3 суурь хавтантай бэхэлнэ. 3мм-ийн өрөм ашиглан нүүрэн талын хавтангуудын дээд буланг өрөмдөнө. 45 мм-ийн эрэг ашиглан хавтангуудыг бэхэлнэ.

2. Дээд болон дунд тавиурны тусгаарлагчуудыг бэлтгэж булан гарган зүснэ. Дээд тавиурын тусгаарлагчид 54мм-ийн хэмжээтэй тэмдэглэгээ хийгээд 114мм-ээс 54мм хүртэл ташуу зураас зурна. Гурван тусгаарлагчийг зураасын дагуу зүсч бэлтгэнэ.

3. Дунд тавиурын тусгаарлагчид 74мм-ийн хэмжээтэй тэмдэглэгээ хийгээд 134мм-ээс 74мм хүртэл зураас зурна. Зураасын дагуу дунд тавиурын 2 тусгаарлагчийг зүсч бэлтгэнэ.
4. 
Дээд тавиурын суурь хавтангийн 2 төгсгөлөөс 179мм хэмжээд тусгаарлагчийг бэхлэх тэмдэглэгээ хийнэ. Гол тусгаарлагчийг ирмэгээс 374 мм-ийн зайтай залгаж бэхэлнэ. Тусгаарлагчуудын 2 талаас 3 мм-ийн өрөм ашиглаж цоолж, 45мм-ийн эрэг ашиглан нүүр талд бэхэлнэ.
5. 
Дунд тавиурын суурь хавтангийн 2 төгсгөлөөс 244 мм-ийн хэмжээтэй тэмдэглэгээ хийж, 2 тусгаарлагчийг дээд тавиуранд хийсэнтэй адил бэхэлж өгнө.

6. 2 хажуу талын хавтангийн урд ирмэгт 696 мм хэмжээтэй тэмдэглэгээ хийж,  756мм-ээс 696мм хүртэл ташуу зураас зураад зүсч авна.
7. Доод тавиуранд бариул хийгээд 3 мм-ийн нүх гарган 45мм-ийн эрэг ашиглан бэхэлж өгнө.

8. Дунд тавиурыг доод тавиураас 203 мм-ийн зайтай байршуулан доод тавиуртай бэхэлнэ.

9. Эцэст нь хажуу талуудыг бэхэлж өгнө.

10. Бүх эрэгний нүхнүүдийг цавуу ашиглан таглана. Хатсаны дараагаар  нүхнүүдийг битүүлж өгнө. Цавуу нь  эвдэрч хагарахаас хамгаалах зориулалттай.

11. Өнгөлгөөгүй хавтангийн хувьд зүлгүүрээр зүлгэсэний дараа модон хавтан будах зориулалттай будгаар өөрсдийн хүссэн өнгөөр будаж ном, тоглоомын тавиур бэлэн болно.

Мөн номын тавиурыг хүүхдийн сонирхол татахуйц байшин хэлбэртэй ч хийж болох ба доорхи зургуудаас санаа авч, өөрсдийн хүссэнээрээ тавиураа хийцгээрэй.




 
 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.