Хуванцар цонх, хаалгыг ашиглах, арчлах заавар

Хуванцар цонх, хаалгыг ашиглах, арчлах заавар
Хуванцар PVC цонх хаалгыг зөв зохистой арчилж хэрэглэсэн тохиолдолд 40-50 жилийн эдэлгээтэй гэж тооцдог. Цонх хаалганы насжилтад түүхий эд материалын чанараас гадна, суулгалт, зөв зохистой хэрэглээ, арчилгаа зэрэг олон хүчин зүйл нөлөөлдөг. Хуванцар цонхыг удаан эдэлгээтэй болгох, дулаан алдагдахаас сэргийлэх, өнгө үзэмжийг муудахаас хамгаалж зөв ашиглаж, дараах арчилгаа тордлогыг хийх хэрэгтэй. Үүнд:
  1. Цонхны хуванцар хүрээг цэвэрлэх-Бага зэрэг угаагч шингэнтэй бүлээн усаар угааж, зөөлөн алчуураар дахин гялалзуулан арчина. Ингэснээр улам өнгөлөг болж гадаргуу дээрх хар толбо, зураас алга болно. Хуурай цэвэрлэгээнд шүүр, хуурай алчуур хэрэглэхгүй байх хэрэгтэй. 
  2. Нугас, түгжээний эргэн тойрны тоос шороог сайтар соруулж цэвэрлэх- Нугас түгжээний завсраар шороо, амалгааны шавар зэрэг зүйлс орсноор салхивч болон хаалганд саад учирч гажилт үүсч, эвдрэл гардаг.
  3. Жийрэг резинийг тогтмол цэвэрлэж байх- Чийгтэй алчуур, зориулалтын уусмал, тослог чанартай бодисоор арчиж цэвэрлэснээр резин нь уян хатан байдлаа удаан хадгалж, салхи сийгэлт болон утаа, шороо оролтыг багасгана.
  4. Цонхны шил цэвэрлэх-Бага зэрэг угаагч шингэнтэй бүлээн усаар тоосжилт, бохирдолтыг цэвэрлэнэ. Гүн бохирдолттой, элдэв бодис наалдан, хатсан тохиолдолд үзүүртэй, ширүүн зүйлээр цэвэрлэж болохгүй. Иймд үед зориулалтын татуургаар цэвэрлэнэ. Угаасан шилийг элгэн алчуураар зүлгэж гялалзуулна.
  5. Гадна хэсгийн цэвэрлэгээ- Тагтны хаалт болон цонхны хуванцар материал шарлаж өнгө үзэмжээ алдахаас сэргийлж дулааны улиралд зориулалтын шингэнээр цэвэрлэх хэрэгтэй.
  6. Нугас, түгжээтэй бүх хэсгийг оёдлын машины тос болон техникийн тосоор /вазелин/ жилд 1-3 удаа тослох хэрэгтэй. Зориулалтын бус тос хэрэглэх юмуу огт тослохгүй байх нь төмөр эд ангиуд дуу орох, хурдан зэврэх болон элэгдэж эвдрэхэд хүргэнэ. Тосолгоо, цэвэрлэгээний үед эрэг боолт гэх мэт жижиг эд ангиудын бэхэлгээг шалгах хэрэгтэй. Шаардлагатай бол чангалж бэхэлнэ.
  7. Цонхыг онгойлгож хаахад дараах горимыг мөрдөнө. Үүнд:
а/ Салхивч, хаалганы бариул эгц доошоо буюу 0ө-ын байрлалд түгжээтэй байна
б/ Баруун гар тийшээ 90ө-т бүтэн дэлгэгдэж онгойно.
в/ Баруун гар тийшээ 180ө-т буюу эгц босоо байрлалд уналттай буюу салхивч маягаар онгойно.
  1. Ашиглалтын явцад цонх, хаалгыг жигд, гүйцэд бариулыг түгжих буюу онгойлгоно.
  2. Салхивчийг онгойлгосны дараа хаахдаа дээд савалгааны түгжээг сайн дарж хаах шаардлагатай. Ихэнх тохиолдолд хэрэглэгчид салхивчны дээд түгжээг дутуу хийн цонхоо гацаасан байдаг.
Анхаарах зүйл:
  • Зэвний болон бусад толбыг арилгахын тулд хумсны лак арилгагч, хүчтэй цэвэрлэгээний уусгагч бодис, бензин болон өнгөлөгч бодис хэрэглэхгүй байх шаардлагатай.
  • Чигжээс резин рүү үзүүртэй зүйлээр хатгаж болохгүй. Резин зүсэгдэж гэмтвээс цонхны битүүмжлэл алдагдана. Зөвхөн хурууны үзүүрээр юмуу мохоо зөөлөн эдээр чигжих хэрэгтэй.
  • Үзүүртэй зүйлээр цонхны гадаргуун дээрх толбо, наалдсан бусад зүйлсийг хусахгүй байх. Хатуу ширүүн зүйлээр чанга дарж арчиж болохгүй.
  • Цонхонд нэмэлт жин ачаалуулахыг хориглоно. Жишээлбэл, цонхноос хүнд зүйл өлгөх, тавцан дээр гарч зогсох, цонхны бариул, хавтаснаас дүүжигнэх гэх мэт
  • Онгорхой цонхны завсраар ном, мод гэх мэт зүйл хавчуулж болохгүй. Хавчуулсан тохиолдолд цонхны хавтас гажиж хаагдахгүй болж, түгжээ нугасны тохиргоо алдагдана.
  • Хүчтэй салхи шуургатай үед онгорхой орхиж болохгүй. Онгорхой цонх хаалга нь салхинд савагдан өндөр настан болон бага насны хүүхдийг гэмтээх тохиолдол цөөнгүй байдаг. Бага насны хүүхдийг онгорхой цонхноос хол байлгах хэрэгтэй.
  • Цонхны хавтасыг зөөлөн хааж байх хэрэгтэй. Гүйцэд хаасны дараа бариулыг зөв эргүүлж түгжинэ.

Цонх цантах, сийгэх доорх шалтгаанууд байдаг ба үүнээс сэргийлэхийн тулд дараах арга хэмжээг авах хэрэгтэй.
  1. Цонхны дотор талд буюу шил хөлөрч ус гүйх
Энэ нь гэрийн дотор агаар хэвийн хэмжээнээс их чийгтэй байх тохиолдолд цонхны гадаргуу дээр ус гүйж хөлөрдөг. Хоол хийх, угаасан хувцас хатаах үед, байр болон тасалгааны салхивчийн систем хэвийн ажиллахгүй тохиолдолд дээрх үзэгдэл ажиглагддаг. Мөн шинэ ашиглалтанд орсон байр хаталт бүрэн явагдаагүй байдаг тул цонх хөлөрч цантдаг.
Дээрх тохиолдолд:
  • Угаалга хийх, хоол хийх үедээ цонхоо хэсэг хугацаанд нээж тасалгаан дахь чийгтэй агаарыг гадагшлуулж байх. Хэрэв танайх тагтны хаалттай бол тагтны цонхыг хамт онгойлгох шаардлагатай.
  • Ихэнх барилгууд ердийн систем бүхий агааржуулалттай байдаг. Агааржуулалт хэвийн бус байвал механик систем буюу албадмал агааржуулалт шаардлагатай. Сараалж ( решетка)-г сольж, сэнстэй сараалж хийх шаардлагатай. Шинэ байранд орсон бол та 1 жилдээ хүлээхээс өөр аргагүй.
  • Цонхны тавцан дээр хэсэг хугацаанд лаа асааж байх, энэ нь цонх цантаж хөлрөхөөс хамгаална. Энэ аргыг хэрэглэхэд та галын аюулгүй байдлаа анхаараарай.
  1. Шилэн багцын дунд хөлөрч цантах
  • Энэ бол шилэн багцын бүтүүмж муудсантай шууд холбоотой. Мөн чийг шингээгч үрлийг хийгээгүй тохиолдолд шилэн багц дотроо хөлөрч цантдаг.
Дээрх тохиолдолд:
  • Шилэн багцыг шинээр солих, үйлдвэрийн шилэн багцыг сонговол найдвартай.
  • Шилэн багцын битүүмж, цавуу, чийг шингээгч үрэл зэргийг сайтар шалгаж авах хэрэгтэй  
  1. Нугас түгжээ, онгойлтын хэсэг, амалгаагаар сийгэх.
    Цонхны тохиргоо муу хийгдсэн, нугас түгжээнд эвдрэл гарсан, жийрэг резиний чанар муудсан, амалгааг дутуу буруу хийсэн зэрэг шалтгаан байдаг. 

Дээрх тохиолдолд:
  • Мэргэжлийн хүнээр цонхны тохиргоог хийлгэх нь зүйтэй.
  • Цонхны тоноглол, нугас түгжээ зэрэг нь хэвийн ажиллаж байгаа эсэхийг шалгаж, эвдрэл гарсан бол солиулах шаардлагатай.
  • Жийрэг резинийг манай орны нөхцөлд 2- 3 жилд нэг удаа солиулж байх хэрэгтэй.
  • Цонх, хаалганы амалгаа шаврыг хийхдээ цонхны 3 талаас 0,5-1см давуулж хийх хэрэгтэй. Амалгаа буруу хийгдсэн тохиолдолд цонх, хаалга цантах, хүйт даах сийгэх зэрэг хүндрэлүүд үүсдэг.
  • Тавцанг суулгахад цонх, тавцан 2-ын хооронд зай гарах ёсгүй ба цонхны доогуур 1см-д суулгах, тавцан доогуур нягт хөөс, шаврыг хийж өгөх хэрэгтэй.
Цонх шинээр худалдаж авах гэж байгаа бол анхаарах зүйлс:
  • Цонхны бүрэн бүтэн байдлыг шалгаж авах хэрэгтэй.
  • Цонхны шилэн багцад зориулалтын чийг шингээгч, цавууг хийсэн байх, мөн шилэн багцны шилний хооронд гадны зүйлс ороогүй, толбо, сэв зураасгүй байх шаардлагатай.
  • Цонхны насжилтын гол зүйл болох зүрхэвч төмөр хийсэн эсэхийг заавал шалгаарай.  /жижиг үйлдвэрүүд огт хийдэггүй/
  • Цонх нээгдэж хаагдахдаа ямар нэг зүйлд хавирахгүй, гацахгүй онгойж байх хэрэгтэй.
  • Цагаан рамтай, шилтэй л бол вакум цонх мөн гэсэн ойлголтоосоо салж, технологийн дагуу хийсэн цонхыг баталгаатай үйлдвэрээс дагалдах гэрчилгээтэй, ашиглалтын заавартай нь авах хэрэгтэй.
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.