​Унтлагын өрөөний гэрэлтүүлгийг сонгохдоо...

​Унтлагын өрөөний гэрэлтүүлгийг сонгохдоо...

Айл гэрийн өрөө болгон өөрийн гэсэн онцлог үүргүүдтэй. Жишээлбэл, гал тогооны өрөө эзэгтэй нарт хоол ундаа бэлтгэхэд амар хялбар, гэр бүлээрээ хооллоход таатай байх ёстой. Харин зочны болон унтлагын өрөө нь гэрийн хүн бүрт ая тухтай, амар тайван орчинг бүрдүүлсэн байх ёстой. Ийм л орчинг бүрдүүлэхэд тавилга, эд хогшлоос гадна хамгийн ихээр нөлөөлөх зүйл бол гэрэлтүүлэг гэдгийг Та мэдэх үү. Иймээс унтлагын өрөөний гэрэлтүүлгийг сонгохдоо хэрхэн анхаарах ёстой талаарх зөвлөмжийг хүргэж байна. 



Унтлагын өрөөний гэрэлтүүлгийг сонгоход үндсэн 3 зүйлийг анхаарах хэрэгтэй. Үүнд:
1.  
Ямар төрлийн гэрэл сонгомоор байгаагаа бодох
2. 
Өрөөний аль хэсгүүдэд хэр их хэмжээтэй гэрэлтүүлэг хэрэгтэй эсэхийг ажиглах
3.  
Таны унтлагын өрөөний дизайн, хэв маягт таарсан гэрэлтүүлэг мөн эсэх гэсэн шалгуураар унтлагын өрөөнийхөө гэрэлтүүлгээ сонгоорой.  
Орны дэргэдэх гэрэл. Хамгийн эхний гэрэлтүүлэх орчин бол орны орй орчим. Орны хажуугийн гэрлүүд нь унтлагын өрөөг чимэх, хамгийн түгээмэл бөгөөд хамгийн өвөрмөц чимэглэл болж чаддаг. Нөгөө талаар олон талт унждаг гэрлийн дизайныг энэ өрөөнд туршаад үзэхэд илүүдэхгүй. Энэхүү гэрэл нь танд унтахаасаа өмнө орондоо дуртай зүйлээ хийх эсвэл ном уншихдаа хүссэн хэсэгтээ гэрлээ тохируулах боломжийг олгодог.



Харин таазны болон, орны дэргэдэх унждаг гэрлүүд нь таны унтлагын өрөөг илүү чамин, содон харагдуулахаас гадна, гэрлийн хуваарилалт тархалт шууд бус доош чиглэлтэй байдаг тул, романтик бөгөөд амар амгалан орчинг бүрдүүлэхэд хамгийн тохиромжтой. Харин илүү их гэрэлтүүлэг хэрэгтэй болсон үед таазны гэрлээр гэрэлтүүлгээ нэмэх боломжтой. Шалны дэнлүү, хөлтэй гэрлүүд. Хэрвээ та унтлагын өрөөгөө хэт их гэрэлтэй байлгахыг хүсэхгүй байвал зөөх боломжтой, янз бүрийн бүрхүүлтэй хөлтэй гэрлүүдийг сонгох мөн боломжтой. Учир нь шалан дээр тавьдаг гэрлүүд нь хаана ч зөөж байршуулж болдгоороо давуу талтайгаас гадна, гэрлийг бүдэгрүүлж, тусгалыг бууруулж илүү таатай орчинг бүрдүүлэх боломжтой. 



Унтлагын өрөөний аль хэсгийг илүү их гэрэлтүүлэх хэрэгтэй вэ?
Өрөөний аль хэсэгт хэр их гэрэлтүүлэг шаардлагатайгаас хамаарч гэрлийн хэмжээ, өндөр, тусгал, өнгө гэх мэт маш олон зүйл таны сонголтод нөлөөлнө. Тиймээс унтлагын өрөөнийхөө аль хэсэгт хэр их гэрэлтүүлэг ашиглах вэ гэдэг нь таны хүсэл юм. Гэхдээ унтлагын өрөөнийхөө хэв маяг, дизайныг мартаж болохгүй шүү. Гэрэлтүүлэг нь унтлагын өрөөний дизайны нэгэн томоохон хэсэг. Хэрвээ та өрөөнүүдийнхээ дизайн, өнгө төрхөд анхаардаг бол унтлагын өрөөний гэрлээ сонгохдоо тухайн гэрэлтүүлэг нь унтлагын өрөөний тааз, хана, шал, обойны өнгө дизайнтай хэр зохицох эсэхийг мөн бодох хэрэгтэй. Харин ингэхдээ унтлагын өрөөний болон гэрэлтүүлгийн дизайн нь хэдий танд чухал ч амар амгалан, тайван байдлыг хамгийн түрүүнд бүрдүүлэх  ёстойг мартаж болохгүй. 



Хамгийн сүүлд нь гэрэл шилжүүлэгч, залгуурын урт, зөөврийн гэрлүүдийг өөр, өөр хэсэгт зөөвөрлөх боломжтой байх залгуур, гэрлийн утсууд танд ямар нэгэн саадгүй байх ёстойг битгий мартаарай. 

Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.