Интерьер дэх “өвлийн улирал”

Интерьер дэх “өвлийн улирал”
Улирал бүхэн өөрийн гэсэн өнгө төрх, байгалийн сонин сайхан үзэгдэлтэй билээ. Түүгээрээ ч хүний сэтгэлийг соронзон мэт татдаг. Иймээс мэргэжилтнүүд гэрийн интерьерийг улирлын чанартай хийж болно гэж үздэг. Та “Интерьер дэх дөрвөн улирал” гэхээр гайхаж байна уу. Үнэндээ дөрвөн улирлын гоёмсог өнгөний хослол, тэдгээрийн хоорондын уусал, зохицолдлогоог сайтар ажиглаад өөрийн хүссэн улирлаар гэрээ засч тохижуулж болно гэсэн үг. Гэхдээ хамгийн түрүүнд өнгөний зохицлыг анхаарах ёстой. Учир нь, өнгө бүхэн хүйтэн, дулаан, тод, бүдэг, гэрэлтэй, бүүдгэр гээд олон төрөл бөгөөд өөрийн гэсэн өвөрмөц шинжтэй. Түүгээрээ ч хүний сэтгэлийг татах нөгөө талаар хувьсгах увидастай. Тодруулж хэлбэл, интерьер дэх дөрвөн улирал өөр, өөрийн өнгөний зохицолтой байдаг. Жишээлбэл, өвлийн улиралд хүйтэн, тод өнгө, зуны улиралд хүйтэн, бүдэг өнгө голлодог бол хаврын улиралд дулаан, бүүдгэр өнгө,  намрын улиралд дулаан, тод өнгө зонхилдог. Гэхдээ заавал нэг өнгө байх албагүй. Интерьерт дурын улирлын өнгө хоорондоо зохицож болдог. Өөрөөр хэлбэл, ханыг дулаан өнгөөр будсан бол гэрийн тавилга /буйдангийн дэр, ваар, мебель, хөшиг г.м/ бүүдгэр бараан байх нь илүү чамин хээнцэр, хүний нүдэнд дулаахан харагддаг “ид шидтэй”.


Ингээд энэ дугаартаа өвлийн улиралд гэрээ хэрхэн тохижуулах буюу интерьер дэх “өвлийн улирал”-ын талаар зөвлөж байна. Хүйтний улиралд гэрийн интерьерийг  багахан зүйлсээр өөрчилж болно. Өвлийн улиралд байгаль дэлхий өнгөгүй, уйтгартай мэт болдог учраас түүнийг дагаад хүний сэтгэл, санаа ч хувирдаг. Тэр байтугай хүмүүсийн хувцаслалт ч мөн өнгө багатай болдог. Учир нь, энэ бүхэн хүний өдөр тутмын амьдралын хэв маяг тэр байтугай сэтгэл санаанд ч ийн нөлөөлдөг тул гэртээ интерьерийн багахан ч болов өөрчлөлтийг зайлшгүй хийх хэрэгтэй юм.



Юуны өмнө хар бараан, цагаан гэсэн өнгөөр жижигхэн ч гэсэн шийдлийг гаргаж өгвөл зүгээр. Жишээлбэл, буйдан дээрээ гоёмсог зөөлөн дэрийг гэрийн интерьертэй  зохицуулан тавьж өгөх, хөвөн даавуу, ноолуур эсвэл ноосон хучлага гэх мэт нэмэлт тохь тухтай зөөлөн хэрэгсэл байршуулах нь өвлийн улирлын чимэглэлийн чиг хандлага юм. Faux үслэг эсвэл үслэг сандал нь тохиромжтойн зэрэгцээ нэхий хивс, хивсэнцэр нь өвлийн өдрийг дулаан харагдуулдаг. 




Нэгэн хэвийн цайвар, цулгуй өнгөтэй айл бол янз бүрийн өнгө оруулж болно. Харин эрээн обой, ханатай бол цулгуй зүйлсийг оруулж өгөх нь илүү зохимжтой.   
Хэрэв хана тань хүйтэн өнгө дагуу эсвэл өрөөний тохижилт тань ийм бол  дулаан өнгийг зүйлсийг санал болгож байна. Учир нь, дулаан өнгө, гоё хийцтэй жижиг тавилга, чимэглэлүүд нь гэрийн интерьерийг илүү тодотгож өгдгийг битгий мартаарай. 



Ногоон өнгө нь нэг талаар байгалийн үндсэн өнгө нөгөө талаар урин дулаан утгыг илэрхийлдэг учраас таримал ургамлыг гэртээ зөв газар нь байршуулбал маш их дулаан мэдрэмжийг төрүүлэх болно. Таримал ургамлын оронд ногоон хана зэрэг интерьерийн шийдлээс ч оруулж болно. 

Хүйтэн цаг агаарт модон өнгөлгөө эсвэл модон зүйлсийг оруулсан орон зай нь дулаалгын нөлөө үзүүлэхийн зэрэгцээ байгалийн дулаалга болдог. Тэр тусмаа модон шал, модон хавтан нь илүү их нөлөөтэй. Гэхдээ илүү энгийн шийдлүүд ч бас байж болно. Тухайлбал, хүйтэн өдөр буйдангийнхаа хажууд халуун цай, кофе уухын тулд заавал ширээ байх албагүй. Харин байгалийн модны хожуул шиг пластик эсвэл модон тайрдсан хожуул гэх мэт энгийн зүйлс нь зуслангийн байшинд байгаа мэт мэдрэмжийг төрүүлэх болно. 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.