Амины орон сууцны цахилгаан халаалт

Амины орон сууцны цахилгаан халаалт
Манай орны уур амьсгал эрс тэс, хуурай, өвөл зуны температурын зөрүү ихтэй учраас халаалтын систем зайлшгүй төлөвлөх шаардлагатай байдаг. Халаалтын системийн зорилго нь өрөө тасалгаанд байгаа хүний амьдрал, үйл ажиллагаанд хамгийн таатай дулаан нөхцөлийг бүрдүүлэх юм. Халаалтын систем нь гадна агаарын температур 100 С -ээс тогтмол буурах үед ажиллаж, 10С-ээс тогвортойгоор нэмэгдэхэд зогсдог. Үргэлжлэх хугацаа нь 8 сар орчим байх ба газар нутгийн цаг агаарын онцлогоос хамаардаг.
 
Халаалтын системийг  дараах байдлаар ангилна
Төвлөрсөн халаалтын систем
Байрын халаалтын систем
Төвлөрсөн халаалтын систем нь дулааны станцад дулааныг бэлтгэн хороолол, сум, аймаг, хотод түгээхийг хэлнэ. Харин байрын халаалтын систем нь эх үүсвэр, халаах хэрэгсэл нэг дор байрлан бага хэмжээний шугам сүлжээгээр холбогдон ажилладаг систем юм. 
Амины орон сууцанд байрын халаалтын системийг төлөвлөдөг бөгөөд ихэвчлэн дулаан зөөгч физик бие нь халаасан ус, тосол гэх мэт шингэн байдаг. Орчин үед халаалтын системийн маш өргөн сонголт байгаа ба хатуу, хийн түлшний зуух, нам даралтын систем, шалны халаалт, дулааны насос, нарны эрчим хүчээр халаах зэрэг байгаагаас хамгийн хямд, илүү хэмнэлттэй нь цахилгаан халаалт юм. Амины орон сууцыг цахилгаанаар халаахад ашиглалтын зардал тогтмол,  ашиглахад хялбар байдаг. 


Шалны халаалтын систем 

 
Цахилгаан халаалт нь 
Завсрын хөргөлттэй 
Шууд дулаан дамжуулалттай гэсэн хоёр төрөлтэй байна. 
Манай оронд ихэвчлэн шууд дулаан дамжуулалтай цахилгаан халаагуурыг хэрэглэдэг. Улаанбаатар хотын гэр хорооллын айл өрхийн халаалтыг цахилгаанаар шийдэх замаар агаарын бохирдлыг бууруулах ажлууд шат дараагаар хийгдэж, шөнийн эрчим хүчний хэрэглээг хөнгөлөлттэй үнээр нийлүүлснээр мод, нүүрсний хэрэглээг бууруулж байна.
Цахилгаан халаагуурын давуу тал:
Түлш бэлтгэх болон хадгалах сав шаардлагагүй тул талбайн ашиглалт нэмэгдэнэ. 
Өрөөний температурыг тогтмол хэмжээнд барина. 
Автомат ажиллагаатай тул нэмэгдэл зардалгүй, хүний оролцоогүй, аюулгүй ажиллагаатай. 
Дуу чимээгүй, үзэмжтэй.
Сул тал:
Ажиллах хугацаанаас  хамаарч цахилгааны зардал харилцан адилгүйн зэрэгцээ засвар үйлчилгээ шаардлагатай.
Амины орон сууцны халаалтын хамгийн тохиромжтой  шийдэл нь цахилгаан халаалт буюу цахилгаан халаагуур  юм. Цахилгаан халаагууруудын хувьд эрчим хүч ашиглалтын зардал хоорондоо зөрүүгүй. Эрчим хүчний төрлүүдээс хамгийн үр ашигтай нь цахилгаан эрчим хүч бөгөөд бараг бүх цахилгаан халаагууруудын хувьд ашигт үйлийн илтгэлцүүр 95 хувиас их байдаг. 
Нарны зайн систем 

 
Гэр хороололд амьдардаг суугчдын хувьд төрөөс цахилгаан халаагуур хэрэглэхийг дэмжиж, агаарын бохирдлыг багасгах зорилгоор өдөр шөнийн тарифийн зохицуулалт хийж байна. Манай улсад шөнийн цагаар ажилладаг үйлдвэр, аж ахуйн нэгж төдийлэн их биш учир гэр хорооллын халаалтыг цахилгаан халаагуураар шийдэх нь  оновчтой хувилбар юм. Цахилгаан халаагуурын бүтээл нь барилгын халаалтанд шаардлагатай эрчим хүчний хэрэгцээг нөхөж өгөх үүрэгтэй. Гэр болон амины орон сууцны халаалтын эрчим хүчний хэрэглээ харилцан адилгүй байдаг. 
Цахилгаан халаагуурын олон төрөл  зах зээл дээр худалдаалагдаж байна.
Туузан халаагуур: Кабелийн туузан халаагуур нь хамгийн түгээмэл халаалтын сонголт ба гол элемент нь цахилгааныг дулаан болгон хувиргадаг кабель юм. Кабелийн системийн давуу тал нь стандарт бус өрөөнд илүү тохиромжтой.
Кабель халаагуур: Цахилгаан кабелийн шал нь том талбайтай өрөөнд зохимжтой. Холболт суурилуулахад хялбар, өндөр температур шаардлагатай өрөөнд тохиромжгүй.
Конвектор: Цахилгаан халаагч нь ямарч өрөө тасалгааг халаахад хэрэглэж болно, найдвартай, хэмнэлттэй, үзэмж сайтай төхөөрөмж юм. Сонголт арвинтай 220В хүчдэлд 500-2200Вт чадалтай 30м.кв хүртэл тайлбайг халаана.
Үлээдэг халаагуур: Олон нийтийн том талбайтай заал, нээлттэй өрөө тасалгаа зэрэгт хэрэглэхэд зохимжтой. Үйлдвэрлэлийн зориулалттай гарааш, павилон, засварын газар зэрэгт хэрэглэж болно.
Хэт улаан туяаны халаагч: Эрчим хүчний хэмнэлттэй манай орны нөхцөлд тохиромжтой бага хүчин чадлаар их тайлбайг халаах, цахилгаан энергийг ашиглан дулааны энерги үүсгэх төхөөрөмж дотроос хамгийн бага ашиглалтын зардалтай эрүүл мэндэд тустай аюул осол багатай төхөөрөмж юм.
Дулаан зөөгч шингэнтэй халаагуур: Агаар хуурайшуулахгүй хүний биед хор нөлөөгүй, цахилгааны зарцуулалт багатай, цахилгааны аюулгүй ажиллагааг сайн хангасан, хөнгөн цагаанаар хийсэн тул зэврэхгүй, ижил төрлийн цахилгаан халаагуураас эрчим хүчний хэмнэлттэй, авч явахад авсаархан давуу талтай.
Дотор халаалтын систем 

 
Хавтгай цахилгаан халаагуур: Усан халаагууртай ижил зарчмаар ажилладаг. Халаагуурын дотор хананд байрлах метал утас халж гадагшаа халан өрөөнд дулаанаа дамжуулдаг. Өрөөний температур мэдрэгчтэй тул температураа мэдэрч ажиллан, цахилгаан эрчим хүчний хэмнэлттэйгээр асч унтрах горимтой. Хүний биед хоргүй, эргэн тойрондоо хор нөлөөгүй, авсаархан, зах зээл дээр элбэг байдаг.
Цахилгаан халаагуурт тавигдах шаардлага
Цахилгаан халаагуурын хувьд стандартуудын дараах шаардлагыг хангасан байх ёстой. Цахилгаан халаагууруудын хамгийн их чадал 3,0 кВт байх ба чадлыг зөвхөн кВт гэсэн нэгжээр илэрхийлнэ. Халаах талбайгаар илэрхийлдэггүй.
Амины орон сууцны халаалтыг цахилгаанаар шийдэхэд дэд станц нэмэгдүүлэх, дамжуулах шугам сүлжээг шинэчлэх, шөнийн горимтой тоолуур суурилуулах шаардлагатай.


Цахилгаан халаагуурыг нэгэн зэрэг олноор ажиллуулахад оргил ачааллын үед эрчим хүчний системийн тогтвортой, найдвартай гэх ажиллагаа алдагддаг. Үүнээс сэргийлж эрчим хүчний хэмнэлт гаргах, дэд станцыг шинэчлэх, шинэ дулааны цахилгаан станц барих зэрэг зохицуулалт хийх хэрэгтэй. Амины орон сууцны халаалтын системийн шийдэлд онцгой анхаарч, эрчим хүчний хэмнэлттэй, байгальд ээлтэй, чанартай тоног төхөөрөмж авах нь чухал юм. Халаалтын системийг ажиллуулахаас өмнө сууцныхаа дулаан алдагдлыг тавигдах шаардлагын дагуу шийдвэл халаалтын систем бүрэн хүчин чадлаараа ажиллана.
 

 
Сурталчилгаа
Эх сурвалж: barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.