Австрийн хөнгөлөлттэй зээлээр 11 төсөл амжилттай хэрэгжсэн байна

Австрийн хөнгөлөлттэй зээлээр 11 төсөл амжилттай хэрэгжсэн байна
Эдийн засгийн хамтын ажиллагааны Монгол-Австрийн Засгийн газар хоорондын комиссын /ЗГХК/ 7 дугаар хуралдаан Улаанбаатар хотноо 2019 оны 10 дугаар сарын 17-ны өдөр амжилттай зохион байгуулагдлаа.
Комиссын хуралдааныг УИХ-ын гишүүн, Барилга, хот байгуулалтын сайд, ЗГХК-ын Монголын хэсгийн дарга Х.Баделхан, Бүгд Найрамдах Австри Улсын цахимжуулалт, эдийн засгийн яамны олон улсын эдийн засгийн харилцааны газрын ерөнхий захирал, ЗГХК-ын Австрийн хэсгийн дарга Франц Вессиг нар удирдав.
Талууд хоёр орны харилцаа, хамтын ажиллагааны өнөөгийн байдал, цаашдын хамтын ажиллагааны чиглэл, 2016 онд хуралдсан 6 дугаар хуралдааны мөрөөр хэрэгжүүлэх ажлын төлөвлөгөөний биелэлт, хамтран хэрэгжүүлж буй төслүүдийн хэрэгжилтийг дүгнэн хэлэлцлээ.
Вена хотод болсон өнгөрөгч хуралдааны ажлын төлөвлөгөөнд тусгагдсан 14 ажил хэрэгжиж байгаа бөгөөд 80.0 хувийн гүйцэтгэлтэй байна. Хоёр улсын Засгийн газрууд 2012 оноос эхлэн “Санхүүгийн хамтын ажиллагааны хэлэлцээр”-ийн хүрээнд Австрийн Засгийн газраас хоёр удаагийн хөнгөлөлттэй зээлийг олгож,  нийт 11 төсөл Монголд хэрэгжүүлэхээр болсноос 6 төсөл нь амжилттай  дуусаж, 5 төсөл хэрэгжилтийн явцдаа байна. 

Мөн тус хэлэлцээрийн 3 дахь шатыг эхлүүлж, Монгол-Австрийн Засгийн газар хоорондын комисс цаашид хамтран ажиллах салбаруудыг өргөжүүлэх тал дээр санал нэгдсэн юм. Талууд цаашид сонгодог урлагийг түгээн дэлгэрүүлэх, түүхэн дурсгалт өв соёлын эд өлгийг хадгалан хамгаалах, сэргээн засварлах, эрчим хүч, сэргээгдэх эрчим хүч, дэд бүтэц, хөдөө аж ахуй, байгаль хамгаалал, уул уурхайн салбарт хамтран ажиллахаар болов.
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.