Орон зайн өгөгдлийн дэд бүтцийн нөхцөл байдалд үнэлэлт өгөхөөр боллоо

Орон зайн өгөгдлийн дэд бүтцийн нөхцөл байдалд үнэлэлт өгөхөөр боллоо

Дэлхийн банкны зөвлөх багийн гишүүд орон зайн мэдээллийн менежментийн нөхцөл байдлын үнэлгээ хийх гэж байна. Үүнтэй холбогдуулан Барилга хот байгуулалтын дэд сайд Б.Мөнхбаатар тай уулзсан бөгөөд Дэлхийн банкны зөвлөх зөвлөх багийн ахлах Катерин Келм, Орон зайн зөвлөх Саймон Вилс, Эндрью Күүт, Лесни Арнолд нарыг хүлээн авч уулзлаа.
Дэлхий нийтийн хөгжилд технологийн хувьсал эрчимтэй өөрчлөлтийг авч ирж байна. Монгол Улс газар нутгаараа дэлхийд 16 дугаарт ордог. Өргөн уудам тал нутагтаа амьдарч байгаа эгэл жирийн малчин хүн ч энэхүү өөрчлөлтийг амьдрал ахуйдаа нэвтрүүлэн хэрэглэж байна. Бид бүхэн л гэхэд гар утсан дээрээ Google map-ийг өдөр тутмын хэрэгцээндээ ашиглаж байна. Гэсэн хэдий ч үүний цаана орон зайн өгөгдөл гэдэг зүйл байгаа гэдгийг төдийлөн ойлгодоггүй.
Нөгөө талаар технологийн дэвшлийг улсынхаа хөгжилд хэрхэн яаж, зөв зүйтэйгээр уялдуулж ашиглах вэ гэдэг зүйл зайлшгүй судлах ёстой асуудал болж байна. Үүнтэй уялдуулаад “Төрөөс орон зайн өгөгдлийн дэд бүтцийн талаар баримтлах бодлогын баримт бичиг”-ийг боловсруулах шатандаа явж байна. 



НҮБ-ын Дэлхийн орон зайн мэдээллийн менежментийн зөвлөхүүдийн хорооноос /UN-GGIM/ Орон зайн мэдээллийн нэгдсэн хүрээг хөгжиж буй улс орнуудад хэрэгжүүлэх зорилготой төслийг өнгөрсөн оноос Этиоп, Буркина, Монгол, Непал, Фижи, Тонга зэрэг зургаан улсыг сонгон хэрэгжүүлж эхэлсэн. Дэлхийн банкны зөвлөх баг 4 хүний бүрэлдэхүүнтэйгээр энэ сарын 14-25-ны өдрүүдэд Улаанбаатар хотноо ажиллах бөгөөд тэд энэ хугацаанд дараах ажлуудыг хийхээр төлөвлөжээ. Үүнд:
-Монгол Улсын орон зайн өгөгдлийн дэд бүтцийн оролцогч талуудтай уулзалт ярилцлагыг хийж, бусад салбарт хэрэгжиж буй байрлалд суурилсан орон зайн мэдээлэлтэй холбоотой төсөл хөтөлбөрүүдтэй танилцах,
-Байрлалд суурилсан орон зайн мэдээллийн менежментийн чадавхыг бэхжүүлснээр Монгол Улсын нийгэм эдийн засагт үзүүлэх үр өгөөжийг судлан тогтоох,
-Монгол Улсын Орон зайн өгөгдлийн дэд бүтцийн өнөөгийн нөхцөл байдалд бодит үнэлэлт, дүгнэлт өгөх,
-Монгол Улсын Орон зайн мэдээллийн менежментийн чадавхыг бэхжүүлэх чиглэлд цаашид авч хэрэгжүүлэх арга хэмжээ, үйл ажиллагаанд зөвлөмж өгч ажиллах юм байна. 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.