АНУ-д байрлах гэрүүдийн тухай сонирхолтой баримтууд

АНУ-д байрлах гэрүүдийн тухай сонирхолтой баримтууд
Орчин үеийн шийдэлтэй гэрт хонох тренд аялагчдын дунд түгэж байна. АНУ-ын Лос-Анжелес хотоос эхлээд Юта мужийн "Zion" үндэсний цэцэрлэгт хүрээлэнд хүртэл гэр бий. Агаар солилцоо сайтай, байгалийн сайхныг мэдрүүлж чаддаг гэрийг гадны улс орнууд ихээр сонирхох болжээ. 

Дэлхийн улс орнуудад байгаа зарим гэрүүдээс сонирхуулж байна 

Техас мужийн Марфа хот 


Техас мужийн Марфа хотод шөнийн тэнгэрт түгэх оддыг харах боломжийг бүрдүүлсэн гэр байх бөгөөд энэ нь Техас мужийн Эль Пасо хотоос зүүн урд зүгт гурван цагийн зайтай орших нутагт 21 акр газрыг хамран оршдог. Мөн энд дүүжин ор, халуун рашаан байх төдийгүй унадаг дугуй түрээслэх боломжтой аж. Найзуудтайгаа ирээд гэрийн эргэн тойронд майхан барьж болдог юм байна. 

Юта мужийн Ордервилл хот 

"Zion" үндэсний цэцэрлэгт хүрээлэнгийн ойролцоо орших Ютагийн гэрт утасны сүлжээ хүртэл байхгүй учраас төгс амралтыг бий болгодог юм байна. Шөнийн тэнгэрийг ажингаа галын наадамд дулаацах энэхүү амралтын газрын гэрт 11 хүртэлх хүн унтаж, амрах боломжтой аж. 

Техас хотын Элжин хот


Техас мужийн Остин хотоос 30 орчим минутын зайд байрлах амралтын гэрийг гар урлалын эдлэлээр өнцөг булан бүрийг нь чимэглэжээ. Уг чимэглэл нь зочдыг их хотын завгүй хэмнэлээс холдуулж дөнгөхөөр онцгой юм. Мөн гэр бүрт сонгодог бичгийн ширээ байх бөгөөд дүүжин оронд тухалж, ойр орчим зугаалах боломжтой. 

Колорадо муж 


Хэрвээ та ууланд аялах хүсэлтэй бол энэ гэр танд яг тохирно. Денвер хотоос 30 минутын зайд онгон зэлүүд байгальд байрлах энэхүү гэр нь адал явдал хайдаг хэн бүрт нээлттэй. Шөнийн гайхалтай үзэмжийг тольдож, эргэн тойрноо 360 градуст харах боломж бүрджээ. 

Калифорни мужийн Лос-Анжелес хот 


Орчин үеийн шийдэлтэй эл гэр нь зөвхөн адал явдал хайгчдад зориулаагүй гэдгийг цохон тэмдэглэе. Алдарт "Hollywood"-ын дурсгалт газраас хэдхэн километрийн зайтай оршдог энэхүү газарт жүрж, лемон болон авокадо жимсний өнгөтэй унжуурга бүхий гэр бий. Хатуу модон шалтай, орчин үеийн тохь тухтай хэрэгсэлтэй юм байна. 

Вайоминг мужийн Саратога хот


Вайоминг мужийн Шайенн хотоос хоёр цагийн зайд энэхүү уулын гэр бий. Энэхүү тансаг зэрэглэлийн гэрт байрлах төлбөрт хоол болон хөтчөөр газарчлуулж морь унах үйлчилгээ багтсан байдаг. Гэр дотор таны тав тухыг бүрэн хангах хэрэгслүүдийг бэлдсэн байдаг. Тухайлбал, аварга том ор, арьсан буйдан гэх мэт. Мөн Вайомингийн хөдөөх газар загасчлахаас эхлээд агаарт йога хийх боломжийг зочиддоо санал болгодог байна. 
Эх сурвалж: oly.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.