П.Одгэрэл: Реалтор сургалтаар анхдагч зах зээлийн борлуулалтын ур чадварыг хөгжүүлнэ

П.Одгэрэл: Реалтор сургалтаар анхдагч зах зээлийн борлуулалтын ур чадварыг хөгжүүлнэ

Үл хөдлөх хөрөнгө зуучлалын салбар манай улсад шинэ салбар. Үүнийг дагаад ҮХХ-ийн борлуулалтын сургалт эрэлт ихтэй ч ховор хийгддэг билээ. Энэ цаг үед нэгэн чухал сургалтыг “Мэско Консалтинг ХХК-аас зохион байгуулах гэж байна. Иймээс  сургалтын талаар тус компанийн ерөнхий захирал, Үл хөдлөх хөрөнгө зуучлагчдын нэгдсэн холбооны ТУЗ-ийн гишүүн П.Одгэрэлтэй ярилцлаа.

-Үл хөдлөх хөрөнгө /ҮХХ/-ийн салбарын мэргэжилтнүүдэд зориулж Төслийн борлуулалт хэрхэн хийх вэ” сургалтыг танай хамт олон зохион байгуулах гэж байна. Сургалтын талаар уншигчдад танилцуулахгүй юу?
-Үл хөдлөх хөрөнгө зуучлалын салбар манай улсад шинэ салбар. Үүнийг дагаад ҮХХ-ийн борлуулалтын сургалт эрэлт ихтэй ч ховор хийгддэг. Иймээс энэ удаагийн сургалт төслийн борлуулалтыг хэрхэн хийх буюу барилга, орон сууц, хотхон мөн цогцолбор борлуулалтыг цогцоор нь хийх, бүх төлөвлөлтийг сургахаараа онцлог юм. “Мэско Консалтинг” ХХК нь ҮХХ зуучлалын салбарт өнгөрсөн 10 жилийн хугацаанд онцгой гэрээгээр барилгын 13, энгийн гэрээгээр 100 гаруй төслийн борлуулалт хийж багагүй туршлагыг хуримтлуулж өөрийн гэсэн үнэ цэнийг бий болгосон. Энэ туршлагаа ҮХХ-ийн салбарт тогтвортой, амжилттай, урт хугацаанд ажиллахаар төлөвлөж буй мэргэжилтнүүдэд харамгүйгээр хуваалцаж, Монголын ҮХХ зуучлалын салбарыг хамтдаа нэг түвшингээр ахиулахыг хүссэн. 
-
ҮХХ-ийн салбарт ажиллаж байгаа борлуулагч нарт ихэвчлэн ямар мэдлэг, ур чадвар дутагддаг вэ. Үүнийг дэмжихэд энэ удаагийн сургалт хэрхэн чиглэгдэх бол?
-
Борлуулагч, агентууд ихэвчлэн өөр, өөр салбараас орж ирсэн, өөр, өөр мэдлэг ур чадвар, туршлагатай хүмүүс байдаг. Хэсэг хугацаанд ҮХХ-ийн салбарт ажилласны дараа хоёрдогч зах зээлийн буюу 2,3 дахь удаагаа борлуулагдаж байгаа үл хөдлөх хөрөнгийн борлуулалтын хэв маягт дасчихдаг. Улмаар анхдагч зах зээлийн буюу шинэ төслүүд дээр ажиллах туршлагатай борлуулагч нар дутагдаж байна. Иймээс энэ сургалтаар борлуулагчийн идэвхи, хандлагыг сайжруулж, төслийн борлуулалтын ур чадвар буюу анхдагч зах зээлийн борлуулалтын ур чадварыг хөгжүүлнэ. Мөн ихэнх тохиолдолд борлуулагч нар бие даан ажиллах, хувь хүний хөгжлөө бүрэн хариуцах хэрэгтэй болдог ба тэвчээр, тэсвэр хатуужилтай байх, ажлын төлөвлөлтөө зөв хийх, цаг тухайд нь үйлчлүүлэгч нэг бүртэйгээ амжилттай хамтарч ажиллах ур чадвар шаардагддаг. Иймээс бид энэ хэрэгцээг хангах зорилго тавьсан.  Үүний дагуу амжилтаа хэрхэн ахиулах, мөн хувийн сахилга батаа хэрхэн удирдах тухай сургалтыг “Дэйл Карнеги Монголиа”-ийн захирал Б.Энхболдтой хамтран хүргэх болно. Хувийн борлуулалтын ур чадварыг сайжруулснаар мэргэжилтнүүд салбартаа сэтгэл хангалуун ажилладаг. Түүнчлэн маркетингийн мэдлэг, ур чадвар борлуулагч нарт чухал. Ийм учраас маркетингийн орчин үеийн шинэ шийдлийн тухай сургалтыг бидний хүсэлтээр Б.Нандин-Эрдэнэ багш заана. Цэгцтэй, цогц байдлаар бодит ур чадвар олгох нь энэ сургалтын гол давуу тал. Дашрамд хэлэхэд, сургалтын үеэр зөвхөн манай компанид тохиолдсон жишээг ярихгүй. Зах зээлд юу тохиолддог, олон улсад ямар байдаг вэ гэдгийг хослуулахыг хичээж байна.
-
Сургалтад хэдэн хүнийг оролцуулахаар төлөвлөсөн бэ. Зохион байгуулалтын онцлогуудын талаар хуваалцахгүй юу?
-
ҮХХ-ийн борлуулалтыг хэрхэн хийх, худалдан авагчийн сэдлийг хэрхэн төрүүлэх аргыг эзэмших хүсэлтэй, борлуулалтын салбарт тууштай ажиллаж байгаа маш олон мэргэжилтэн бий. Тиймээс энэ удаа бүтэн өдрийн сургалтыг цогцоор нь төлөвлөж, вакуумжуулсан орчинд зохион байгуулна. Сургалтад нийт 150 хүнийг бүртгэнэ. Олон хүнтэй сургалтыг оролцогч бүрт 100 хувь өгөөжтэй байлгахад бид анхаарч ажиллаж байна. Тиймээс хүн тус бүрийн оролцоог хангах мэргэжлийн туслах трэйнерүүдийн баг, зохион байгуулалт үйлчилгээн дээр ажиллах тусгай баг зэрэг бүтэн өдрийн турш оролцогч нарт хүрч ажиллах 20-оод хүний бүрэлдэхүүнтэй байх юм.
-
Сургалт хаана болох вэ?
-
Сургалтыг Тэрэлжид байрлах Red Rock Resort дээр зохион байгуулах болсон нь сургалтыг хог хаягдлаас татгалзсан, эко шийдлийг эрхэмлэсэн байдлаар хийх хүслийг төрүүлсэн. Тиймээс сургалт хуванцар хог хаягдалгүй, цаасны зохистой хэрэглээтэй, мөн захиалгын бүтээгдэхүүн, сургалтын материалуудыг зорилтот бүлгүүдэд үйлчилдэг байгууллагуудтай хамтран бэлтгэж байна. Жишээлбэл, цэвэр хөвөн даавуун малгайтай цамцыг бүх оролцогч нартаа зориулан “Ээлтэй Ертөнц” ТББ-д захиалан хийлгүүлж байна. Мөн бүх төслийн борлуулалтын гэрээний төсөл, загваруудаа флаш дээр буулган хүн бүрт шууд өгснөөр бид олон жилийн туршлагаа бүрэн нээлттэй болгож байгаа юм.




-Танай зохион байгуулж буй сургалт Remax-ын сургалтаас юугаараа ялгаатай вэ?
-
Олон улсын багш нар ирж Remax-ын сургалтыг хийдэг юм билээ. Тиймээс хөгжсөн орны зах зээлийн мэдээллийг танилцуулдаг. Гэхдээ манай хөрсөнд шууд хэрэгжүүлэх мэдээлэл бага байдаг гэж анзаарсан. Зарим хүн сертификатны төлөө суудаг гэж ярьж байхыг ч сонссон. Гэхдээ Remax-ын сургалтаас авах юм бий. Реалторуудад гаднын зах зээлд ажиллах хүсэл эрмэлзэл бий болгож, нүдийг нь нээж өгдөг. Харин манай сургалтын ялгарах онцлог нь хөрсөндөө сууж байгаа гэсэн үг. Бид монгол барилгын компаниудын засаглал ямар байдгийг мэднэ. Хэрхэн харилцах ёстой, яаж харилцаагаа сайн авч явах талаар мэднэ. 
-
Сургалтанд суух хүсэлтэй ч шийдвэрээ гаргаж хараахан амжаагүй хүмүүст хандан Та юу хэлэхийг хүсч байна вэ?
-
ҮХХ зуучлалын салбарт маш олон зуучлагч компани байгаа. Үүнийгээ дагаад маш их агентууд ажилладаг. Энэ нь манай улсад зах зээл хангалттай байгаагийн илрэл юм. Энэ сургалтын өдөр бид бүхэн цугларснаараа зөвхөн ямар нэг зүйлийг сургах, заахаас илүүтэй, сургалтанд сууж байгаа бүх зуучлагч нар өөрсдийнхөө санал бодлыг солилцох, хамтарч нэг кэйс дээр ажиллах, нэг гэрээн дээр ажиллах, ҮХХ-ийн салбарт ямар асуудлууд байгаа талаар хоорондоо сэтгэгдэлээ хуваалцах боломжийг бүрдүүлсэн өдөр болно гэж харж байна. Мөн хоорондоо харилцаа холбоо, хамтын ажиллагааг эхлүүлэх платформ болон хувирна хэмээн бид харж байна.




-Ер нь борлуулалтын ажлаас шантрах тохиолдол их. Иймээс энэ салбарт анхлан хөл тавьж буй мэргэжилтнүүдэд хандаж зөвлөгөө өгөхгүй юу
-Энэ салбарт нэгэнт орсон хүн ажилдаа үнэхээр дурладаг гэдгийг хэлж чадах байна. Тиймээс ч салбарын үнэ цэнээ өсгөх хувийн хүсэл мөрөөдөлдөө хөтлөгдөж энэ удаагийн сургалтыг зохион байгуулж байгаа юм. Үл хөдлөх хөрөнгө борлуулна гэдэг шинийг санаачлагч байна гэдгийг сургалтаар дамжуулж ойлгуулахыг хүссэн. Мөн үл хөдлөх хөрөнгийн агентуудыг олон нийтэд хүлээн зөвшөөрүүлэхийн тулд ийм ажил санаачилж байна. Зуучлагчид ч бас сурдаг гэх сэтгэхүйг бий болгох хүсэлтэй байгаа. Сургалтын сэдвээ бэлтгэж байхдаа нэг зүйл анзаарсан. Энэ салбарт ажилласан эхний таван жилдээ би үл хөдлөх хөрөнгө зуучлагч гэдгээ ойлгох гэж явсан юм билээ. Үнэнийг хэлэхэд дөрөв, тав, зургаа дахь жилдээ нэлээн  шантарсан. Дандаа санал гомдол дагуулж, өдөр шөнөгүй завгүй ажиллах юм уу гэж бодсон. Энэ үедээ хувь хүний хөгжилдөө анхаарч, өөртэйгөө тулж ажилласан. Шантарсан үеэ давсны дараа жаргалтай ажиллаж чадаж байна. Зүгээр л туршлагаа хуваалцаад орлого олох тохиолдол ч байдаг. Тэгэхээр шантарсан үедээ өөртэйгөө тулж ажиллаарай л гэж зөвлөх байна. 

Эх сурвалж: Барилга.МН

Сэтгэгдэл (3)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    Nomin 30 өдрийн өмнө 103.57.95.82

    Цагаа олсон сургалт байна
    Nomin 30 өдрийн өмнө 103.57.95.82

    Цагаа олсон сургалт байна
    45 30 өдрийн өмнө 150.129.142.121

    уурхайн нөөцийг хэнч оноод тогтоож чаддаггүй тааж тогтоодог