Энэ жилдээ багтаж 400 орчим айл орон сууцанд орох боломж бүрдэж байна

Энэ жилдээ багтаж 400 орчим айл орон сууцанд орох боломж бүрдэж байна
 

Барилга хот байгуулалтын яамны Инженерийн дэд бүтцийн бодлогын хэрэгжилтийг зохицуулах газрын дарга Л.Батжаргалтай ярилцлаа.
-Нийслэлийн Чингэлтэй дүүрэг, Дэнжийн мянга орчимд дахин төлөвлөлтийн ажил өрнөж байгаа. Энэ бүтээн байгуулалтад салбарын яамнаас ямар үүрэг оролцоотойгоор ажиллаж байна вэ?
-Чингэлтэй дүүргийн “Дэнжийн мянга” хороололд гэр хорооллын дахин төлөвлөлтийн төслийг “Бармон”, “Монкон групп” хоёр компани хэрэгжүүлж байна. “Монкон групп”-ийн тухайд гэр хорооллын дахин төлөвлөлтийг хэрэгжүүлэх боломжгүй гэдэг шийдвэр гараад батламж нь цуцлагдчихсан. Харин "Бармон" компанийн тухайд одоогийн байдлаар 234 айлын орон сууцыг ашиглалтад оруулсан. Гэр хорооллын дахин төлөвлөлтөөр тухайн бүс нутагт 5.000 айлын орон сууц барина гэсэн төлөвлөгөө гарсан. Энэ төлөвлөлттэй холбогдуулан яамнаас хөрөнгө оруулалт хийж ус дулаан дамжуулах төв “ЦТП”, цэвэр, бохир ус, холбоо дохиолол, цахилгаан хангамж гэх мэт инженерийн шийдлийн асуудлуудыг цогцоор нь шийдвэрлэж ажиллалаа. Ингэснээр тухайн гэр хорооллын бүс нутагт 5000 айл орон сууцанд орох боломж бүрдсэн. Ирэх жил тус компани дээрх байршилд мөн 234 айлыг орон сууцанд оруулах төлөвлөгөөтэй ажиллаж байна. Одоогоор барилга угсралтын ажил нь 80 гаруй хувьтай байгаа.  
-Хан-Уул дүүргийн Нэхмэлийн шарын хуучин барилгуудыг нурааж шинээр орон сууц барих бүтээн байгуулалт өрнөж байгаа.  Энэхүү бүтээн байгуулалтын инженерийн шугам сүлжээний ажил ямар шатанд байна вэ?
-Ашиглалтын шаардлага хангахгүй орон сууцыг дахин барилгажуулах төслийн хүрээнд Нэхмэлийн шарын хуучин барилгуудыг нурааж, хувийн хэвшлийн хөрөнгө оруулалтаар орон сууцны барилгуудыг барьж байгаа. Энэ хэсэгт “Фүжи холдинг”, “Нутгийн буян”, “ММЖИ Капитал” зэрэг компани орон сууц бариад дуусах шатанд явна. Үүнтэй холбогдуулаад яамны зүгээс төвийн дулааны “Ф400 мм”-ийн шугамыг татаж тухайн бүсэд авчирсан. Ингэснээр “Нэхмэлийн шар” орчимд баригдаж байгаа орон сууцууд найдвартай дулаанаар хангагдах боломж бүрдсэн. Мөн цэвэр усны шугамыг шинэчлэх ажлыг хийлээ. Бохир усны шугамын тухайд өмнө байсан “Ф300 мм”-ийн шугамыг өргөтгөөд “Ф500 мм”-ийн шугам болгохоор ажиллаж байна. Түүнчлэн холбоо дохиоллын ажлууд бүрэн хийгдэж дууссан. Өөрөөр хэлбэл, энэ нь тэнд амьдарч байгаа оршин суугчид болон ААН-ээс ирүүлсэн санал хүсэлт бүрэн шийдвэрлэгдсэн гэсэн үг. Инженерийн асуудлыг ингэж цогцоор шийдсэн нь “Нэхмэлийн шар” орчимд энэ жилдээ багтаж 400 орчим айл орон сууцанд орох боломжийг бүрдүүлж байгаа юм. Иймээс тухайн бүсэд төсөл хэрэгжүүлэгч компаниуд ирэх жил мөн адил хэмжээний орон сууцыг барихаар барилга угсралтын ажлаа эхлүүлээд байна.


-“Буят-Ухаа 2” хорооллын инженерийн шийдлийг БХБЯ-наас хариуцаж хийсэн. Айл өрхүүд нь орон сууцандаа хэзээ орох бол?
-Агаар орчны бохирдолттой холбоотойгоор хэрэгжүүлж байгаа томоохон ажил бол түрээсийн орон сууцны хөтөлбөр. Одоогоор улсын хэмжээнд 1542 түрээсийн орон сууц байна. Энэ жилдээ багтааж 1512 айлыг түрээсийн орон сууцанд хамруулсан. "Буянт-Ухаа 2" орон сууцны хорооллын хувьд 972 айлын 18 блок барилгыг барьж, ашиглалтад оруулаад байна. Энэ долоо хоногийн сүүлээр Нийслэлийн орон сууцны корпароциас сонгогдсон айлуудаа орон сууцанд нь эхнээс нь оруулах болов уу. Энэ ажлыг НЗДТГ 100 хувь хариуцаад хийж байгаа. Яамны зүгээс “Буянт-Ухаа 2” хорооллын гадна инженерийн шугам сүлжээ болон тухайн барилгын санхүүжилтийг Хөгжлийн банкны санхүүжилтээр шийдэж хяналт тавьж ажилласан. Уг хороололд ус дулаан дамжуулах томоохон ЦТП-г барьж инженерийн шугам сүлжээний шийдлийг БХБЯ-наас хангаж ажилласны үр дүнд энэ барилга ашиглалтад орж байна.

Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.