С.Магнайсүрэн: Нийгэмд шүүмжлэл дагуулаад байгаа асуудлуудыг хуулиар бүрэн шийдвэрлэнэ

С.Магнайсүрэн: Нийгэмд шүүмжлэл дагуулаад байгаа асуудлуудыг хуулиар бүрэн шийдвэрлэнэ

Барилга, хот байгуулалтын яамнаас “Хот байгуулалтын тухай хуулийн шинэчилсэн найруулгын төсөл”-ийг боловсруулж эрдэмтэн судлаачдын саналыг авахаар эцсийн хэлэлцүүлгийг өнөөдөр /2019.10.09/ зохион байгууллаа. Хэлэлцүүлгийн үеэр тус яамны Төрийн нарийн бичгийн дарга С.Магнайсүрэнгээс хуулийн төсөлтэй холбоотой зарим асуултад хариулт авлаа.

-Хот байгуулалтын тухай хууль анх батлагдахдаа 4 бүлэг 18 зүйл заалттай байсан бол энэ удаад 10 бүлэг 56 зүйл заалттай болж өргөжсөн байна. Хуульд яг ямар, ямар давхардал байгаа учраас хуулийн төслийг шинэчлэхээр болсон бэ?

-Хот байгуулалт байгуулалтын тухай хуулийг зайлшгүй шинэчлэх шаардлагатай гэдэг үзэл баримтлал 2016-2020 оны Засгийн газрын үйл ажиллагааны хөтөлбөрт суусан. Хөтөлбөрийг хэрэгжүүлэх үйл ажиллагааны төлөвлөгөөнд БХБЯ хуулийн төслийг боловсруулж батлуулна гэж тусгагдсан. Манай яамны зүгээс хуулийн төслийг энэ  ондоо багтааж Засгийн газрын хуралдаанаар оруулж, УИХ-аар батлуулах төлөвлөгөөтэй ажиллаж байна. Хот байгуулалтын хууль бол суурь хуулиудын нэг. Өнгөрсөн хугацаанд хот байгуулалттай холбоотой нэлээдгүй зөрчлүүд бий болсон учраас ихээхэн шүүмжлэл нийгэмд өрнөж байна. Тиймээс яамнаас энэ хуулийн төслийг эцэслэн боловсруулаад өнөөдөр салбарын эрдэмтэн, судлаачдынхаа саналыг авахаар эцсийн хэлэлцүүлгийг хийж байна. 

-Манай улсын нийт хүн амын 70 гаруй хувь төв суурин газарт амьдардаг. Тэгвэл энэ хууль батлагдсанаар хот суурин газрын хүн амын төвлөрлийг бууруулж, нийт нутагтаа тархаж амьдрах боломжийг бий болгоно гэсэн гол заалт энэ хуулийн төсөлд тусгагдсан байсан.  

-Хот байгуулалтын хуулийн үндсэн гол концепци нь Хөгжлийн ерөнхий төлөвлөгөөний дагуу хотыг яаж барьж байгуулах, барилга байгууламжийг хэрхэн барих вэ гэдэг асуудлыг голчлон зохицуулж байгаа явдал юм. Хуучин Зураг төслийн хүрээлэн хот байгуулалтын бодлогын суурь баримт бичгийг боловсруулдаг байсан. Гэтэл энэ байгууллага өнөөдрийн байдлаар үндсэндээ үгүй болсон. Энэ удаагийн хот байгуулалтын хуулийн шинэчилсэн найруулгаар Зураг төслийн хүрээлэнг эргэж сэргээх ёстой гэсэн концепци оруулж ирж байгаа. Ингэснээрээ Улаанбаатар хотын хөгжлийн ерөнхий төлөвлөгөө болон аймгуудын хөгжлийн ерөнхий төлөвлөгөөг энэ байгууллага хийнэ. Өнөөдөр л гэхэд Дархан-Уул аймгийн хөгжлийн ерөнхий төлөвлөгөөг хувийн компани хийж байх жишээтэй. Энэ нь одоо мөрдөгдөж байгаа эрх зүйн орчинтойгоо нийцэж байгаа боловч өргөн агуулгаараа бид бүхний хүссэн үр дүнд хүрэхгүй байна. Тиймээс үүнийг судалгаа тооцоотойгоор төрийн байгууллага нухацтайгаар хийх ёстой. Энэ утгаараа төрийн статустай байгууллагад энэ чиг үүргийг нь шилжүүлж өгөх ёстой юм. Дээр нь нэмээд аймаг, нийслэлийн Ерөнхий архитектор гэдэг чиг үүргийг бид энэ хуулиар тодорхой болгоно. Өөрөөр хэлбэл, аймгуудын ерөнхий архитекторууд өөр, өөр статустай аймаг болгонд ажиллаж байна. Ингэхдээ улс төрийн албан тушаалтнуудыг энэ албанд томилж, сонгуулийн мөчлөг дагаад халаа сэлгээ хийгддэг. Мэргэжлийн субьектийг ингэж богино хугацаанд тогтворгүй ажиллуулах нь сөрөг үр дагаврыг үүсгэдэг. Тиймээс аймаг, нийслэлийн Ерөнхий архитекторууд ямар чиг үүрэгтэй байх, энэ албан тушаалд ямар субьект томилох, ямар мэргэжлийн хүн байх гэх мэт асуудлыг нарийн зохицуулж хуульд тусгаж өгсөн.

-Хэлэлцүүлгийн явцад зарим судлаач “Одоо мөрдөж байгаа хууль төдийлөн хөрсөн дээр бууж хэрэгждэггүй. Олон хууль тогтоомжтой зөрчилддөг" гэж шүүмжилж байсан. Шинэчлэн найруулсан хуулийн төсөлд энэ талд хэр анхаарч тусгасан бол вэ? 

-1998 онд батлагдсан Хот байгуулалтын хууль тухайн үед үүргээ гүйцэтгэсэн. Харин өнөөдрийн энэ цаг үед учир дутагдалтай гэдэг шүүмжлэл бодитой. Тиймээс бид энэ удаагийн шинэчилсэн найруулгаар Ногоон байгууламжийн тухай, авто зогсоолын тухай, Улаанбаатар хотын бүсчлэлийн тухай гэх мэт гурван салангид зайлшгүй зохицуулалт шаардагдаж байсан бие даасан асуудлуудыг нэгтгэж оруулсан. Өнөөдрийн байдлаар дөрвөн тусдаа жижиг хууль гарахаар байсныг нэг том хууль болгож базсан гэсэн үг. Ингэснээр хуулийн уялдаа, холбоо, зохицуулалт илүү сайжирна. Товчхондоо, хот байгуулалтын тухай хуулийн шинэчилсэн найруулгаар өнөөдрийн нийгэмд шүүмжлэл дагуулаад байгаа зарим асуудлыг бүрэн шийдвэрлэж чадна гэж харж байна. 

 

Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.