Гэр, байшингаа дулаалснаар агаарын бохирдлыг бууруулах боломжтой

Гэр, байшингаа дулаалснаар агаарын бохирдлыг бууруулах боломжтой

Гэр, байшингаа дулаалснаар утаа үүсгэж байгаа түлшний хэрэглээг багасгах төдийгүй, эрчим хүчний бодитой хэмнэлт бий болгож, хомсдол үүсэхээс сэргийлэх боломжтой гэж үздэг. Байшингийн зай завсарт чигжээс хийх замаар битүүлж, хаших хийцэд зохимжтой дулаалгын материалыг ашиглан, технологийн дагуу нэмэлт дулаалга хийх замаар амьдарч байгаа байшин, сууцаа дулаалж,  дулааны алдагдлаа багасгаж, агаарын бохирдлыг бууруулахад та хувь нэмрээ оруулаарай. Юуны өмнө байшин, сууцныхаа хана, булан тохойг гараараа дарж үзээрэй, салхи сийгэж, хүйтэн хана хайрч байвал дулаан алдаж байна гэсэн үг. Мөн таны амьдарч байгаа байшин, сууцны цонх хаалга, хана хөлөрч байвал дулаан алдагдаж байна гэж оношилж болно. Байшин дулаан алдахын хирээр өөрөөсөө илүү их зардал гаргаж байна гэдгийг санаарай. 
Барилгын дулаан нь дараах хоёр үндсэн хэлбэрээр алдагддаг байна. Үүнд:

1. Хаших хийцийн дулаан алдагдал буюу ханын материалын дулаан дамжуулалтаас үүсэх алдагдал. Үүнийг олон улсын хэлээр трансмиссийн алдагдал гэж нэрлэдэг.

2. Агаар нэвтрэлтийн алдагдал. Барилгын хана, хаалга, цонхонд зай завсар гарвал түүгээр агаар гадагшилж түүнтэй хамт их хэмжээний дулаан алдагдана. Үүнийг олон улсын нэр томъёогоор инфильтрацийн алдагдал гэдэг.

Барилгын гадна хана, дээвэр, шал, цонх, хаалга зэрэг хашлага хийцээр барилгын дулааны алдагдлын 80-90% нь алдагддаг. Үүнд тухайн барилгын байршил, хийц, гадаргуугийн талбайн хэмжээ, геометрийн хэлбэр зэрэг нь их нөлөөлнө. Барилгын дотор болон гадна агаарын температурын зөрүү нь дулааны солилцоо явагдах үндсэн шалтгаан болдог ба барилгын хашлага хийцийн дулаан дамжуулах үзүүлэлт их байх тусам дулааны алдагдал тэр хэмжээгээр их байдаг. 

Агаар нэвтрүүлэлтийн алдагдал нь барилгын цонх, хаалганы завсар зай, хашлага хийцийн уулзвар, үүссэн ан цаваар болон салхижуулалт хийх үеэр гардаг. Энэ хоёр төрлийн алдагдлыг бууруулах нь олон талын ашигтай бөгөөд ингэснээр дулааны алдагдлаас болж гардаг барилгын гэмтлээс (хөлрөлт, цанталтаас үүсэх гэмтэл г.м) урьдчилан сэргийлэх боломжтой. Жишээ нь: өвлийн улиралд дулаалга сайн хийсэн барилгын ханын дотор гадаргуугийн температур нэмэгддэг ба энэ нь хөлрөлт үүсэх, норох, улмаар мөөгөнцөр ургах аюулыг багасгадаг сайн талтай.

Ашиглаж буй байшин, сууцныхаа дулааны алдагдлыг бууруулахад дараах аргуудыг хэрэглэнэ.

 Үүнд:

  • Барилгын хашлага хийцийн дулаан дамжуулалтыг багасгахын тулд шал, хана, тааз, дээвэрт  дулаалга хийх;
  • Агаар нэвтрэлтийн алдагдлыг хязгаарлах; Үүнд: цонх, хаалганы завсар зайг битүүмжлэх эсвэл чанар сайтай цонх, хаалгаар солих. Завсар зай, нүх сүвийг битүүлэх байдлаар барилгыг ерөнхийд нь битүүмжлэл сайтай болгох.
  • Гадна болон дотор агаарын температурын зөрүүг багасгах замаар дулааны алдагдлыг бууруулах; Үүний тулд шөнийн цагт болон ашиглалт багатай өрөөний температурыг бууруулж байх. Жишээ нь: халаах хэрэгслийн термостат вентилээр усны температурыг тохируулах, бууруулах г.м;
  • Гарч болох дулааны бусад алдагдлыг бууруулах; Үүний тулд цонх, гадна хаалга нээлттэй байх үеийн "хяналтгүй” дулаан алдагдлыг бууруулах арга хэмжээ авах, тусгаарлах хөшиг, хаалт ашиглах, зуухны яндангаар дулаан алдагдахыг хязгаарлах гэх мэт

Суурийн дулаалга: 

Баригдсан барилгын газрын гадаргаас дээш суурийн хэсгийг /цоколь/ гаднаас нь дулаалах нь дулаан алдагдлыг бууруулах нэг шийдэл юм.  Газрын гадаргуугийн ус, хөрсний ус, гүний ус зэрэг олон төрлийн усанд барилгын суурь болон зоорийн шал оршин байдаг тул суурь хэсэгт ус чийгнээс хамгаалах түрхлэг түрхэж, ус чийг нэвтрүүлдэггүй дулаалга хийж өгөх шаардлага бий болдог. Суурийн хэсгийг дулаалахдаа MNS EN 13164:2011 стандартын шаардлага хангасан шахмал хөөсөнцөр буюу XPS ашиглах нь илүү тохиромжтой. Хэрэв тухайн барилга зоорьтой бол зоорийн хана болон шалыг бас дулаална. Шахмал хөөсөнцөр дулаалга нь ус чийгнээс хамгаалаад зогсохгүй шахалт тэсвэрлэх чадвараараа бусад дулаалгын материалаас илүү байдаг. Барилгын зоорийн хананы гадна талд тоосго өрөх нь тийм ч тохиромжтой арга биш юм. Учир нь тоосго нь усанд тэсвэр муутай удаан хугацааны туршид чийг авах юм бол өмхөрч хатуу шинж чанараа амархан алддаг. 

Дулаалга нь бэлтгэл ажлаас эхлэх ба суурийн хэсгийн ханын шороо, тоос, шохой, тос, будгийн үлдэгдэл зэргийг сайтар цэвэрлэнэ. Суурийн ханыг цэвэрлэснээр хотгор гүдгэр бий болохоос сэргийлэх дараагийн үе болох хөрсжүүлэгч сайн наалдах нөхцлийг бүрдүүлдэг. Цэвэрлэгээ дууссаны дараа хөрсжүүлэгч түрхэж хатаана. Ус чийгнээс хамгаалах түрхлэг түрхэж хатаасаны дараа  дулаалгын шахмал хөөсөнцөр XPS хавтанг зориулалтын цавуугаар нааж, дюбель хадаасаар бэхэлнэ. Барилгын суурь хэсгийн газрын гадаргаас ил гарсан хэсэгт өнгөлгөөний шавар хийхээс аль болох татгалзаж ус чийгэнд тэсвэртэй, хамгаалах өнгөлгөөний материал болох хавтанцар, чулуу, өнгөлгөөний хавтангаар хийх нь тохиромжтой байдаг. 

Шалны дулаалга:

Барилгын шал бол хаших хийцийн нэг гол бүрэлдэхүүн бөгөөд дулааны алдагдлын 15 орчим хувь нь шалнаас алдагддаг.

Өрөө тасалгааны дулаан агаар дээш хөөрч шалны хучилтан дээр хүйтэн байдаг тул шалыг дулаалах нь дулаан алдагдлыг багасгах гол арга юм. 

Шалны дулаан тусгаарлах материал нь дулаан алдагдлыг багасгах, дуу тусгаарлалтыг ихэсгэх, өрөө тасалгааны температурыг хэвийн нөхцөлд байлгахад чухал ач холбогдолтой ба дулаан дамжуулалтын эсэргүүцэл багатай эрдэс хөвөн, чулуун хөвөн, шилэн хөвөн, хөөсөн полистирол, полиуретан хавтан зэргийг хэрэглэхэд тохиромжтой.  

Шалны дулаалга нь түүний бүтэц, байрлал, зоорийн давхартай эсэх, ямар материалаар хийгдсэнээс шалтгаална. Хэрэв таны байшин хүйтэн зоорийн давхартай бол нэгдүгээр давхрын дулааны алдагдлыг багасгахын тулд зоорийн хучилтыг доороос нь дулаалахад хангалттай. Ингэхийн тулд 5см-ээс багагүй зузаантай хөөсөн полистирол хавтанг зориулалтын цавуугаар нааж тогтооно.

Зоорийн давхаргүй бол шалаа дулаалахын тулд дээрээс нь нэмж дулаалан давхар шаллах нь арай хялбар байх болно. Ингэж хийх тохиолдолд хаалганы самбаруудыг доороос нь тайрч хасах ажил гардгийг анхаараарай. 

Дулаалгатай модон шалны бүтэц 

Дулаалгатай бетон шалны бүтэц

                                                                                                                                Үргэлжлэл бий

 

Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.