Б.Мөнхбаатар: Ажлаа хийж чадахгүй бол "хар жагсаалт"-д оруулна

Б.Мөнхбаатар: Ажлаа хийж чадахгүй бол
Ашиглалтын шаардлага хангахгүй нийтийн зориулалттай орон сууцны барилгыг дахин төлөвлөн барилгажуулах хүрээнд Хан-Уул дүүргийн хоёрдугаар хорооны нутаг дэвсгэрт байрлах “Нэхмэлийн шар” хуучны орон сууцны барилгыг дахин төлөвлөн шинэ орон сууц барьж байна. Тухайн хэсэгт шинээр баригдаж буй орон сууцыг инженерийн шугам сүлжээгээр бүрэн хангах ажлын хүрээнд Барилга, хот байгуулалтын яамны захиалгаар “Алъянс Тех” ХХК тендерт шалгарч 2017 оны долдугаар сарын 21-ний өдрөөс 2019 оны аравдугаар сарын 1-ний өдөр хүртэлх хугацаанд дээрх ажлыг бүрэн хийж гүйцэтгэх үүрэг хүлээсэн юм. Гэвч тухайн ажил удаашралтай явагдаж байгаагийн зэрэгцээ тус дүүргийн хоёрдугаар хорооны нэхмэлийн шар байрны 5 орон сууц, 27-р цэцэрлэг, замын ард хэсэгт байрлалтай 12, нийт 19 барилгын 800 гаруй өрх өнгөрсөн зургадугаар сараас хойш хэрэглээний халуун усгүй өнөөдрийг хүрч, оршин суугч, иргэдээс удаа дараа гомдол ирсээр байна. Үүнтэй холбогдуулан Барилга хот байгуулалтын дэд сайд Б.Мөнхбаатараар ахлуулсан ажлын хэсэг газар дээр нь ажиллаж, нөхцөл байдалтай танилцсан байна.



“Алъянс Тех” ХХК гэрээнд зааснаар дулааны шугам сүлжээг холбох ажлыг өнгөрсөн долдугаар сарын 15-ны өдөр гэхэд бүрэн дуусгах төлөвлөгөөтэй байсан ч хоёр сар гаруйн хугацааны хоцрогдолтой байгаа аж. Барилга, угсралтын ажил 84 хувьтай ч зураг төсөл өөрчлөгдсөн, замын трансын зөвшөөрөл авах гэж удсан гэх шалтгаанаар төлөвлөгөөт ажил хойшилсон гэж “Алъянс Тех” ХХК-ийн захирал З.Баясгалан тайлбарласан байна. Тухайн хэсгийн дахин төлөвлөлтийн хүрээнд баригдаж буй барилгууд түр цахилгаан, дулаанаар орон сууцаа хангаж байгаа ч дараагийн ээлжийн шинэ орон сууц ашиглалтад ороход дулаан, цахилгааны хүрэлцээ багасах эрсдэл үүсжээ. Өчигдрөөс эхлэн тус хорооны таван байр, нэг цэцэрлэг, “Улаанбаатар дулааны шугам сүлжээ” ТӨХК-ийн гэрээт зарим ААН байгууллагуудын дулааныг өгч эхэлсэн бол төв замын арын хэсгийн 12 барилгын хэрэглээний халуун усыг түр хэсгээр хангаж байгаа аж.



БХБ-ын дэд сайд Б.Мөнхбаатар гүйцэтгэгч “Алъянс Тех” ХХК-ийн зохион байгуулалт муу, ажлын төлөвлөгөөгүй байдлаас болж цаг хугацаа алдаж, улмаар олон иргэд хохирч байгааг хатуу анхааруулан дулааны шугам сүлжээг 10 хоногт багтаан дуусгаж, орон сууц, ААН, байгууллагад халаалтыг хэвийн өгч эхлэх, ирэх сарын 1-н гэхэд бохирын шугамыг бүрэн холбож, ойрын хугацаанд цахилгааны холболтыг хийх үүрэг чиглэл өгсөн байна.



Хэрвээ ирэх сарын 15-ны дотор үлдсэн ажлаа чанартай, бүрэн гүйцэтгэж чадахгүй бол хариуцлага хүлээлгэхийн зэрэгцээ ажлаа төлөвлөгөөний дагуу хийдэггүй, дутуу гүйцэтгэдэг ААН, байгууллагуудын “ХАР ЖАГСААЛТ”-д оруулан, дахин төсөл, хөтөлбөр, тендерт оролцуулахгүй байх хүртэл арга хэмжээ авахыг хатуу сануулсан байна. 
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.