Барилгачдын баяртай “Барилга.МН” сэтгүүлийн шинэ дугаар уншигч таны гарт …

Барилгачдын баяртай “Барилга.МН” сэтгүүлийн  шинэ дугаар уншигч таны гарт …

Монгол Улсад Орчин цагийн барилгын салбар үүсч хөгжсөний 93 жилийн ой, Барилгачдын баяр давхацсан энэ л өдрүүдэд “Барилга. МН” сэтгүүлийнхээ 112 дахь дугаараа уншигч, захиалагчдынхаа гарт хүргэж байгаадаа баяртай байна. Бизнес эрхлэгч, инженер, техникийн ажилтан, архитектор, зураг төслийн баг, орон сууц худалдан авагч, үл хөдлөх хөрөнгийн компани гээд барилгын салбарт ажиллаж, үйл ажиллагаа явуулдаг хэн бүхэнд хэрэгтэй мэдээ, мэдээллийг хүргэдэг Барилга.мн сэтгүүлийн энэ удаагийн дугаарт …  

Дугаарын зочин

Энэ удаагийн хүндэт зочноор Барилгын салбараас төрөн гарсан шинэхэн Хөдөлмөрийн баатар Б.Рагчаа гуай оролцлоо. Тэрээр  “Монгол Улсын хил дархан байна” гэсэн Үндсэн хуульд заасан заалт баталгаажхад гол хувь нэмэр оруулсан хүн юм. Мөн Монгол Улсын газар нутаг, хил хязгаарын бүрэн бүтэн байдал, тусгаар тогтнолд үнэлж баршгүй хувь нэмэр оруулж, улсынхаа хилийг тогтоох, баталгаажуулахын төлөө зүтгэсний үр дүнд өдгөө манай улсын хойд, урд бүх хилийг тогтоон шалгасныг нотолсон 100,50,25, мянга, зарим хэсэгтээ 10 мянганы хумилт бүхий газрын зургийн 2 боть том атластай болсон юм. Үүний зэрэгцээ хилийн бүх баганын байршлын солбицол тодорхой болсон түүхтэй. Барилгачдын баярын 93 жилийн ойн баярыг тохиолдуулан энэ эрхэм хүндтэй хүнтэй уулзсан сонирхолтой ярилцлагыг Барилга.мн сэтгүүлээс уншаарай.

Мэргэжилтний үг 

Дэлхийн дулаарлыг бий болгож байгаа хүлэмжийн хийн ялгаралтыг барихгүй бол энэ зууны эцэс гэхэд дэлхийн дундаж температур +1.8°C-аас - +6.4°C-аар нэмэгдэж болзошгүй хэмээн эрдэмтэд үзэж байгаа. Тиймээс бид хүлэмжийн хийн ялгарлыг багасгахын тулд барилгын салбарт юун дээр анхаарах ёстой талаар мэдээллийг бэлтгэлээ. Та энэхүү нийтлэлээс “барилгын салбарт хэрхэн эрчим хүчний зардлыг хэмнэх, хүчилтөрөгчийн ялгарлыг багасгахын тулд юуг анхаарч хэрэгжүүлэх” “шаардлагатай байгаа дулаалгын материалыг хэрхэн сонгох”, дулаалгын материалуудын шинж чанар, үнэ ханшийн талаарх мэдээлэл, эдгээр материалуудын давуу болон сул тал, дулаалгын материалыг хэрхэн ашиглах талаарх мэдээллүүдтэй танилцаарай. 

Амжилтын эзэд 

Сэтгүүлчээс үл хамааран зочид өөрсдийн сонирхсон асуултыг харилцан тавьж, сонирхолтой яриа өрнүүлдэг “Амжилтын эзэд” дуэль ярилцлагын энэ удаагийн зочноор “Монкон Констракшн” ХХК- ийн гүйцэтгэх захирал Г.Батбаяр,  “Жи Эф Ай” ХХК-ийн гүйцэтгэх захирал Б.Ууганцэцэг нар оролцлоо. Та энэхүү ярицлагаас ус цэвэршүүлэх шинэ шийдэл, дэвшилтэт технологи болон барилгын салбарт тулгарч байгаа асуудал, түүний шийдэх арга замын талаар мэдээлэл авахаас гадна гүйцэтгэх удирдлагуудын ур чадвар, амжилт, бизнесийн салбарын эрсдлийн талаарх тэдний бодол, саналыг уншаарай.  

Судалгаа 

Энэ удаагийн судалгааны булангаар барилгын үндсэн түүхий эд болох мод, модон материалын 2015-2018 оны байдлаарх зах зээлийн судалгааг хүргэж байна. Судалгааг дүнз палк,  паркетан шал, хавтан фанер, дэр мод, модон бэлдэц гэсэн 4 бүлэгт хувааж хийсэн бөгөөд импортын хэмжээ, мөнгөн дүнгээр тооцож графикаар үзүүлсэн юм. Түүнчлэн дотоодын мод, модон эдлэлийн үйлдвэрлэлийн өнөөгийн байдал, үнийн судалгааны талаарх дэлгэрэнгүйг мэдээлэлийг эндээс аваарай. 

Хэрэглэгчийн булан 
Иргэдэд хамгийн ойр зөвлөгөөг хүргэдэг хэрэглэгчийн булангаараа бяцхан хүүхдүүддээ зориулан хичээлийн ширээ хэрхэн хийх зааврыг хүргэж байна. Сурагчдад гэрийн даалгавраа хийх, зургаа зурах, бүтээлээ хийх зэрэгт насных нь онцлогт тохирсон тохь тухтай ширээ, сандал хамгийн чухлаас гадна богинохон завсарлага аваад, тоглох нөхцөлийг бүрдүүлэх хэрэгтэй. Иймд бид байшин загварын ширээг яаж хийх талаарх мэдээллийг энэ удаад бэлтгэлээ. 

Шинэ орон сууцны үнэ ханш, зах зээл, захиалгын байдал 

Бид сар бүрийн дугаартаа шинэ орон сууцны зах зээл, захиалгын байдал, үнэ ханшийн талаарх мэдээллийг хүргэдэг билээ. 

Шинэ орон сууцны зах зээл, захиалгын байдлын 2019 оны долдугаар сарын судалгаар нийт 57381 айлын 417 төсөл хэрэгжиж байгаа бөгөөд үүнээс 34 482 айлын 256 төсөл захиалга авч байна. Та эдгээр төслүүд ямар дүүрэгт баригдаж байгаа, үнэ ханшийн дэлгэрэнгүйг мэдээллийг Барилга.мн сэтгүүлээс авах боломжтой. Үүний зэрэгцээ портландцемент, тоосго, блок, арматур, бетон зуурмаг, модон материал, галд тэсвэртэй хөөсөн полистирол хавтан, цонх хаалга, элс хайрга, будаг эмульс гээд барилгын бүхий л материалын үнэ ханшийг мөн өдрийн байдлаар танилцуулж байна. Та бүхний ажилд судалгаа, тооцоо, төсвөө гаргахад тус болно гэдэгт бид итгэлтэй байна.

Байр суурь 

Монгол Улсад орчин цагийн барилгын салбар үүсэж, хөгжсөний түүхт 93 жилийн ойн баяр тохиож буйтай холбогдуулан өнгөрсөн хугацаанд хийж хэрэгжүүлсэн их ажлынхаа алдаа оноог дүгнэж цэгнэхийн зэрэгцээ цаашид анхаарч хэрэгжүүлэх зүйлсийн талаар салбарынхаа манлайлал болсон төлөөллүүдтэй уулзаж, санал, бодлыг нь сонссон юм.  Хүндэт зочноор БХБЯ - ны төрийн нарийн бичгийн дарга С.Магнайсүрэн, Үндэсний бүтээн байгуулалтын корпорацийн ТУЗ - ын дарга, Монгол Улс, Оросын Холбооний Буриад улсын гавьяат барилгачин зөвлөх инженер Б.Жүгдэр, БХҮНТ -ийн Удирдах зөвлөлийн дарга, гавьяат барилгачин, зөвлөх архитектор Г.Мягмар, Барилга корпорацийн ерөнхийлөгч, гавьяат барилгачин, доктор, профессор Л.Шагдаррагчаа, МБҮА - ийн Ажлын албаны салбарын бодлого хариуцсан зөвлөх Г.Лосол нар уригдан оролцож өөрсдийн байр сууриа илэрхийллээ. 

Архитектур 

Барилгын архитектурын түүх, гайхамшгийн талаар бичдэг “архитектур” булангийн энэ удаагийн дугаарт Италийн алдарт уран барилгуудыг танилцуулж байна. Ромын архитектур нь зуун, зууны туршид эзэнт гүрний үеийн сонгодог хэлбэрээс орчин үеийн хэв маяг  хүртэл гайхалтай хөгжин цэцэглэж ирсэн төдийгүй XI-XIII зууны үед сонгодог архитектурын гол төв болж байсан нуман хэлбэртэй хаалга, байшингийн бөмбөгөр орой зэргийг анх сэдэн хөгжүүлсэн байдаг. Түүнчлэн сэргэн мандалтын үед барокко хэв маягийн архитектурын гол төв болон хөгжсөн түүхтэй. Эдгээр түүхэн хөгжлийн гэрч болон үлдсэн  гайхалтай барилгууд болох Пиза цамхаг, 600 жил баригдсан Миланы сүм, Италийн сэргэн мандалтын үеийн гэгээн Петрийн сүм, дэлхийн долоон гайхамшгийн нэг амфитеатр колизей зэрэг уран барилгуудын талаар эндээс уншаарай. 

 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.