Уян чулуу- орчин үеийн заслын дэвшилтэт материал

Уян чулуу- орчин үеийн заслын дэвшилтэт материал

Уян чулуу нь шинэлэг заслын материал бөгөөд орчин үеийн интерьер дизайн, фасадны засал чимэглэлд томоохон өөрчлөлт авчирсан юм. Энэ материалыг гоёмсог гантиг болон  боржин чулууг дуурайлган олон өнгө сүүдэртэй, нягт бүтэцтэй уян байдлаар үйлдвэрлэдэг бөгөөд практик шинж чанараараа сэтгэл татам байдаг.

 

Уян чулууг байгалийн нарийн ширхэгтэй гантиг чулууны үйрмэгийг нийлэг давирхайн тусламжтай шилэн эслэг дээр нааж үйлдвэрлэдэг. Үүний үр дүнд бий болсон эцсийн бүтээгдэхүүн нь түүхий эдийн өнгө, хэв маягийг давтдаг ба чулуун давхарга нь элэгдэлд тэсвэртэй, бат бөх, галын аюулгүй байдлыг хангадаг. 

 

Гадна, дотор өнгөлгөөний ажилд тохиромжтой.

Эдэлгээ урт, цаг агаарын ширүүн нөхцөлд тэсвэртэй, үзэмжтэй уян чулууг гадна өнгөлгөөний засал, дулаалга, дотор өрөөний хана, шат, багана, нуман хаалга, камин зуухны засал зэрэг тэгш болон эзэлхүүнт гадаргууд ашиглаж болно. Мөн амины орон сууц, албан тасалгаа, дэлгүүр, кафе, рестораны дотор ба гадна ханыг  сүүлийн үед уян чулуугаар ихээр чимэглэж байна.

 

Гадна өнгөлгөөнд хэрэглэхдээ дулаалгын хавтан /хөөсөн полиуретан, хөөсөн полистирол хавтан/ дээр нүүрэн талын өнгөлгөөг цавуулаг хольцоор шүршиж хийхээс гадна уян чулуун хуудас хэлбэрээр ашиглаж байна.

 

Зөв биш хэлбэртэй гадаргууг ч өнгөлдөг.

Уян учир дурын гадаргууд өнгөлгөө хийж болно, геометрийн зөв биш хэлбэртэй гадаргууд наах боломжтой, өнгөний өргөн сонголттой, төрөл бүрийн өнгөтэй гантиг болон бусад чулуулгийн  нунтагийг холих замаар ямар ч өнгө гарган авч болох ба загварын хувьд дахин давтагдашгүй юм. Зүсч боловсруулахад хялбар бөгөөд энгийн цаасны хутгаар ч зүсч болох ба дурын гадаргууд ашиглалтын нөхцөлөөс хамаарч цавууг сонгож наадаг.

 

Дизайнерын шилдэг туслагч

Шинэлэг уян чулууны бүтцийн онцлог нь цул чулуун хавтан шиг хатуу гадаргууг дуурайлган 3 метр хүртэл оёдолгүй өнгөлгөөг гаргах, үйлчлүүлэгчийн хүсэлтээр төрөл бүрийн дүрс зураг, өвөрмөц хэлбэрийн чулуун гадаргыг фото хэвлэлийг ашиглан бий болгож болох ба  уг материалыг тэгш болгон хувааж ширхэгийн материалаар ашиглаж болно. 

Энэ материалаар төрөл бүрийн геометрийн дүрс хэлбэрийг бий болгон металл, мод мэт гадаргууг дуурайлган интерьерийн шийдлийг хийдэг ба шалны гэрлийн дизайныг ч бий болгож болно. 

 

Хүүхдийн өрөөнд тохиромжтой.

Уян чулууг үйлдвэрлэхэд байгаль орчин болон эрүүл мэндэд ээлтэй материал ашигладаг тул үүнийг хүүхдийн өрөөнд ашиглахад тохиромжтой. Энэ материалыг арчлахад хялбар байдаг ба уян чулуун бүрээсийг усаар угааж болдог тул хүүхдүүд ханан дээр зураг зурсан ч арилгаж болно.

 

Шатдаггүй, чийгэнд тэсвэртэй, уурын нэвчилт үүсгэдэггүй материал 

Чийгийн тогтворгүй байдал, уян хатан бус байдлаас шалтгаалан ханын цаас болон хавтанг ашиглах боломжгүй чийгтэй орчинд уг материалыг ашиглахад тохиромжтой ба тухайлбал, угаалгын өрөөний өвөрмөц хэлбэртэй ванн, угаалтуурын өнгөлгөөнд, мөн усан сан, гал тогооны өрөөнд ч ашиглаж болдог. Уян чулуу шатахгүй тул дулаан шал,  камин зуухыг чимэглэхэд таатай. Хүйтэн цаг агаарын нөхцөлд ч барилгын фасадыг өнгөлж болох ба уг материал дээр ус, тоос шороо тогтдоггүй.

 

Дулаан алдагдлыг бууруулдаг. 

Байшингийн фасадад уян чулууг дулаалгын материалтай  хослуулж хэрэглэх нь дулаан алдагдлыг бууруулж, дуу чимээг багасгаж өгөхөөс гадна жин багатай тул угсрахад хялбар байдаг. Дулаалгын материал дээр шүршиж чулуун гадаргууг бий болгохоос гадна хуудас хэлбэрээр нааж болно. 

Уян чулууны талаархи дэлгэрэнгүй мэдээлэл авахыг хүсвэл Монголын барилгын материал үйлдвэрлэгчдийн холбоонд хандаарай. 
 

Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.