“Барилга орон сууц-2019” үзэсгэлэн, яармагийн шилдгүүд тодорлоо

“Барилга орон сууц-2019” үзэсгэлэн, яармагийн шилдгүүд тодорлоо

Барилгын салбар үүсч хөгжсөний 93 жилийн ойг тохиолдуулан “Ногоон хөгжлийг хамтдаа бүтээе" уриан дор зохион байгуулагдсан "Барилга Орон сууц-2019” үзэсгэлэн, яармаг үзэгч, оролцогчоор дүүрэн өргөн дэлгэр болж өндөрлөлөө. Үзэсгэлэнд үл хөдлөх хөрөнгийн төсөл хэрэгжүүлэгч, орон сууц борлуулагч, барилгын материалын худалдаа эрхлэгчид, дэвшилтэт техник, технологи нэвтрүүлэгч, амины орон сууц барьдаг нийт 110  гаруй шилдэг аж ахуйн нэгж, байгууллагууд оролцсон бөгөөд шилдгүүдээ шалгаруулах ёслолын арга хэмжээ өчигдөр “Мишээл экспо” төвд болсон юм.  

Шагнал гардуулах ёслолын ажиллагаанд үзэсгэлэн, яармагийг зохион байгуулах хорооны дарга, МБҮА-ийн Удирдах зөвлөлийн гишүүн, “Барилга.МН” ХХК -ий ерөнхий захирал Г.Батсүх, “Барилга корпораци”-ийн ерөнхийлөгч, гавьяат барилгачин, доктор, профессор Л.Шагдаррагчаа, Цонх, хаалга үйлдвэрлэгчдийн холбооны тэргүүн Б.Насанбат нар оролцлоо. 

Энэ жилийн “Барилга, орон сууц 2019” үзэсгэлэнгийн “Шилдгийн шилдэг ГРАНПРИ” шагналыг «ТЭСО ПРОПЕРТИС» ХХК “Sky Garden Residence” төслөөрөө хүртсэн юм. Уг хотхон нь хүүхдийн эрүүл, аюулгүй өсч бойжих, эрдэмтэй нийтэч хүн болон хүмүүжих орчинг бий болгосон оновчтой төлөвлөлтийг хийсэн байна. Эдгээрээс дурьдвал: Дэлхийн жишигт нийцэх Winter garden буюу “4 улирлын туршид ногоон байх өвлийн цэцэрлэг”, Монголын хамгийн анхны дугуйн болон явган хүний замтай “Гүүрэн гарц”, Гэртээ рашаанд орох боломжтой Монголын анхны рашаан түгээлтийн систем, Хотхоны 70%-д ногоон байгууламж байх гэх мэт төлөвлөлтүүдээрээ барилгын салбарын бусад төслүүдээс ялгарч байгаа юм. Монголдоо анхдагч дээрх төлөвлөлтүүд нь Барилга, үл хөдлөх хөрөнгийн салбарыг дэлхийн жишигт аваачин, салбарын хөгжилд нөлөөлөхүйц томоохон бүтээн байгуулалтыг бий болгож байгаа юм

Харин шилдэг төсөл, хөтөлбөр хэрэгжүүлэгчээр “Монкон групп” “Мандала гарден” төслөөрөө шалгарлаа. Уг төсөл нь AWT буюу animab, water, tree гэсэн байгальд орчинд ээлтэй, цогц төлөвлөлт, шинэлэг концефцитэй төсөл юм. Оршин суугчдын ая тух, аюулгүй байдлыг дээд зэргээр хангахуйц худалдаа үйлчилгээ, спорт комплекс, усан оргилуур, гольфийн талбай, гүйлтийн зам, зэргийг төлөвлөсөн байна. 


Шилдэг үйлдвэрлэгчээр эрчим хүчний хэмнэлт, дулааны алдагдлыг бууруулах эрдэст чулуун хөвөн бүтээгдэхүүнийг хэрэглээнд өргөн нэвтрүүлэх аргаар дэлхийн дулаарлыг бууруулах, агаар мандалд ялгарах нүүрсхүчлийн хийг бууруулах, Улаанбаатар хотын агаарын бохирдлыг багасгахад дорвитой хувь нэмэр оруулж байгаа “Монгол базальт” ХК тодорлоо. Тэд 2000 оноос Базальт эрдэс чулуунд суурилсан дулаан тусгаарлагч материалын үйлдвэрлэлийн технологи хөгжүүлэх Эрдэм шинжилгээ судалгаа, сорил туршилтын ажлууд дээр Орос, Герман, Дани, Япон, Хятад зэрэг орны Технологи хөгжүүлэлтийн эрдэм шинжилгээний байгууллагуудтай хамтран ажиллаж туршилтын үйлдвэрлэлийг амжилттай хэрэгжүүлж, дэлхийд аравхан улс эзэмшдэг энэхүү өндөр технологийн “НОУ ХАУ”-г эх орныхоо эрдэст түүхий эд болох базальт чулуунд түшиглэн боловсруулж, өөрийн өвөрмөц орц шийдлийг гарган 2007 онд үйлдвэрээ ашиглалтанд оруулан “BASALTWOOL” брэнд нэрээрээ өдгөө хэдийнэ хэрэглэгчдэд танил болж чадсан компани юм. 

Харин шилдэг ханган нийлүүлэгч номинацийн эзнээр “ТОТ КОМ СЕРВИС” ХХК шалгарлаа. Тус компани нь 2000 онд байгуулагдсан бөгөөд Израйль улсын “HOP Еngineering” компани, Шведийн “Алфа лавал“ компани, БНСУ-ын “Scale buster” компани, Шанхайгийн “Ассишион”компани, БНСУ-ын ДАЕWОО ENERTEC зэрэг компаниудын Монгол дахь албан ёсны дистрибьютер юм. Халуун хүйтэн усны болон халаалтын шугам хоолойд усны хатуулгаас сэргийлж, ус сайжруулагч тоног төхөөрөмжийг нийлүүлж суурилуулах мөн хувь хүн, аж ахуйн нэгж байгуулагуудад олон улсын стандартад нийцсэн чанар сайтай тоног төхөөрөмж, сэлбэг хэрэгслэл болон туслах материал нийлүүлэх, цахилгааны хэмнэлттэй 5 төрлийн шалны халаалтын систем нийлүүлж, суурилуулан ажилладаг. 
Шилдэг шинэ орон сууцаар "ТЭСО ПРОПЕРТИС" ХХК - ий "Содон" стандарт хороолол шалгарсан юм. Тус компани нь 2012 оноос эхлэн хүн төвтэй төлөвлөлт бүхий төслүүдийг санаачлан хэрэгжүүлэн ажиллаж байгаа бөгөөд салбартаа стандарт хорооллын жишиг тогтоон "Содон" стандарт цогцолбор хороолол төслийг санаачлан хэрэгжүүлж байгаа билээ. Тус хороололд 640 хүүхдийн улсын дунд сургууль, 120 хүүхдийн 259-р улсын цэцэрлэг, фитнесс клуб, айл бүрт хүрэлцээтэй автомашины дулаан зогсоол, ногоон байгууламж, усан оргилуур, цэцэрлэгт хүрээлэн, спорт талбай, газар хөдлөлтийн 8 баллд тэсвэртэй гэх мэтчилэн хүний хэрэгцээг бүхий л зүйлийг цогцоор шийдсэн юм. 


Шилдэг шинэ технологи нэвтрүүлэгч номинацийн эзнээр агааржуулалт хөргөлтийн шугам хоолой суурилуулалтыг дэлхийн стандартаар үйлдвэрлэн хүргэж буй “ЭйрВинт” ХХК тодорсон юм. Тус компани нь барилгын салхивч агааржуулалтын салбарт  нимгэн төмөр шугам хоолой хийцлэлийн тэгш өнцөгт болон дугуйн хоолойн, хагас болон бүрэн автомат компьютерийн өндөр нарийвчлалтай төхөөрөмжүүдийг Монголдоо нэвтрүүлээд байна. 



Шилдэг оролцогч компаниар "ЭЙ ЖИ ЖИ ЭС" ХХК шалгарлаа. Тус компани нь дархан цаазат шүтээн Хан Богд уулынхаа бэлд их хотын нүргээнт чимээ шуугианаас ангид, эргэх дөрвөн улирлын өнгө тансаг үзэсгэлэн дунд Улаанбаатарынхаа хөгжлийг тольдон суух ая тухтай амгалан тайван орчинд, ой моддын найгах исгэрээг сонсох боломжийг бүрдүүлсэн “ХАН ТӨГӨЛ” хотхоныг хэрэгжүүлж байгаа билээ. Европын сонгодог хэв шинжийг монгол архитектур инженерүүдийн гайхалтай ур ухаанаар уламжлан баяжуулж, орчин үеийн техник технологийн дэвшлийг хослуулан цогцлоож, оршин суугч бүрийн хэрэгцээ шаардлагыг бүрэн хангахуйц, тансаг зэрэглэлийн хаус хотхон юм. 

 

"Барилга Орон сууц 2019" үзэсгэлэн яармагийн сэтгүүл татаж унших бол ЭНД ДАРНА УУ 

 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.