“Барилга, орон сууц 2019” үзэсгэлэн, яармаг нээлтээ хийлээ

“Барилга, орон сууц 2019” үзэсгэлэн, яармаг нээлтээ хийлээ

Монгол улсад шинэ үеийн барилгын салбар үүсэн байгуулагдсаны түүхт 93 жилийн ойд зориулан зохион байгуулагдаж буй “БАРИЛГА ОРОН СУУЦ 2019” Үзэсгэлэн яармаг 13 дахь жилдээ “НОГООН ХӨГЖЛИЙГ ХАМТДАА БҮТЭЭЕ” уриан дор өнөөдөр нээлтээ хийлээ. 

Нээлтийн арга хэмжээнд БХБ-ын дэд сайд Б.Мөнхбаатар, Барилгын хөгжлийн төвийн дарга Ц.Амарсанаа,  "БАРИЛГА ЭКСПО 2019” ОУ-н үзэсгэлэн яармагийг зохион байгуулах хорооны дарга, “Барилга МН” компанийн ерөнхий захирал Г.Батсүх, Монголын Барилгын Үндэсний Ассоциацийн дэд ерөнхийлөгч Б.Нэмэхбаатар, Д.Цэнд, Монголын Барилгачдын нэгдсэн холбооны ерөнхийлөгч М.Батбаатар, ерөнхий ивээн тэтгэгч “Тэсо Пропертис” ХХК - ий гүйцэтгэх захирал П.Лхагвадорж, ивээн тэтгэгч “МОНКОН Групп” ХХК - ий гүйцэтгэх захирал  Л.Батхуяг, Үндэсний бүтээн байгуулалтын корпорацын ТУЗ--н дарга, гавъяат барилгачин Б.Жүгдэр, Монголын Барилгын гүйцэтгэгч байгууллагуудын холбооны ерөнхийлөгч, гавъяат барилгачин  Ц.Эрдэнэбат болон холбогдох албаны бусад хүмүүс оролцлоо. 

Үзэсгэлэн яармагийг нээж БХБ-ын дэд сайд Б.Мөнхбаатар хэлсэн үгэндээ “Энэ онд барилгын ажил өргөжин тэлж, хөрөнгө оруулалт нэмэгдэж томоохон бүтээн байгуулалт өрнөсөн жил болж байгаа”-г онцлоод, барилгын салбараас ДНБ-нд оруулсан хувь хэмжээ энэ оны эхний хагас жилд 9.3 хувиар буюу 230.7 тэрбум төгрөгөөр өсөж, улсын хэмжээнд хийсэн барилга угсралт, их засварын ажил хагас жилийн урьдчилсан гүйцэтгэлээр 1.8 их наяд төгрөгт хүрч нэмэгдээд байгааг тэмдэглэж байв. Тэрээр, “Барилгын салбарт ажиллагсдын цалин энэ оны I улирлын байдлаар нэг сая 123 мянган төгрөгт хүрээд байна. Үүнийг 2016 оныхтой харьцуулахад, 30.7 хувиар нэмэгдээд байна. Барилгын салбар жил бүр 8-9 мянган суралцагч, инженер, техникийн ажилтнаар хүч сэлбэн өргөжиж байна” хэмээн онцлон хэлсэн юм. 

Харин   "БАРИЛГА ЭКСПО 2019” ОУ-н үзэсгэлэн яармагийг зохион байгуулах хорооны дарга, “Барилга МН” компанийн ерөнхий захирал Г.Батсүх “ Дэлхийн улс орон, иргэн бүр өөрийн ахуй амьдрал, үйлдвэрлэл, хэрэглээнийхээ хэв маягийг эрс өөрчилж байгальд илүү ээлтэй, “ногоон” хэв загварт шилжих шаардлагатай болоод байгаа энэ цаг үед энэхүү үзэсгэлэн яармагаа зохион байгуулж, ногоон хөгжлийг хамтдаа бүтээхийг уриалж байна” гэсэн юм. 

Үзэсгэлэн яармагийн үеэр бизнес эрхлэгчдэд зориулан Барилгын салбарт төрөөс баримталж буй бодлого, салбарын ногоон хөгжил, Нийслэлийн хөрөнгөөр хийж буй төсөл хөтөлбөрүүд, Улаанбаатар хотын орон сууцны зах зээлийн судалгааны талаар танилцууллаа. Ногоон хөгжлийн чиг хандлага, салбарын хөгжил дэвшил, ололт амжилтыг олон нийтэд дэлгэн танилцуулах энэхүү үзэсгэлэн, яармагт үл хөдлөх хөрөнгийн төсөл хэрэгжүүлэгч, орон сууц борлуулагч, барилгын материалын худалдаа эрхлэгчид, дэвшилтэт техник, технологи нэвтрүүлэгч, амины орон сууц барьдаг дотоодын болон гадаадын нийт 110  гаруй шилдэг аж ахуйн нэгж, байгууллагууд оролцож байна.

Харин маргааш 13:00 цагт иргэдэд зориулсан сургалт, семинарт эрчим хүчний хэмнэлттэй амины орон сууц барих, гэр байшингаа дулаалах, хөрсний бохирдолгүй Био жорлон барих болон орон сууц сонгох, худалдан авах зөвлөгөө мэдээ мэдээллийг өгнө.



Үзэсгэлэнгийн үеэр 100 гаруй шинэ орон сууцны төслөөс сонголтоо хийж, ипотекийн 8% болон компанийн бага хүүтэй зээлээр, хямдрал урамшуулалтай авах боломжтой. Жишээ нь: “Марч констракшн” ХХК “Поларис апартмент I, II” хотхоны байрныхаа үндсэн үнээс 48-60 хувь хямдруулах, “Рийл пропертиз Улаанбаатар” ХХК-аас үзэсгэлэнгийн 3 хоногийн хугацаанд орон сууц захиалгын гэрээ хийвэл үнийн дүнгээс 10 хувь, гарааш буюу автозогсоолын үнэ 34 саяаас 29 сая болж хямдрах, "Твинхаус констракшн" ХХК -аас орон сууц худалдан  авагчдын дунд Prius 20 автомашины хонжвортой сугалаа явуулна. Мөн “Эм Ди Прожект” ХХК-аас урьдчилгаа төлбөр 30 хувь төлөөд компанийн хүүгүй 18 сарын тэнцүү төлбөрт хуваариар төлөх, “Тэнүүн Газар Констракшин” ХХК 1м2 нь 1,000,000 төгрөгөөр худалдах гэх мэт олон боломж хүлээж байна.

Мөн есдүгээр сарын 08-н буюу хаалтын өдөр 14:00 цагт УХААЛАГ УТАС, УХААЛАГ БАРИЛГА” фэйсбүүк уралдааны ялагч буюу "#Samsung_Galaxy_S10" гар утасны эзэн тодорно. Энэхүү азтан нь Barilga.mn хуудсанд LIKE дарж, уралдааны зургийг Public тохиргоотой SHARE хийж, сэтгэгдэл хэсэгт барилга, орон сууц сонирхох 5 найзыгаа @mention хийж урьсан байх ёстой. Дээрх 3 болзлыг хангасан ялагчийг үзэсгэлэн яармагийн тайзан дээр Commentpicker сайтаар тодруулна.

Үзэсгэлэн 3 хоногийн турш өдөр бүр 09:30 цагаас 18:00 хүртэл үргэлжилнэ. 

 

 
Эх сурвалж: Barilga.mn

Сэтгэгдэл (1)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    Дааиай 9 өдрийн өмнө 64.119.18.117

    Хаана болж бгаан бэ