Бяцхан үрсдээ зориулж элсний талбай хийцгээе

Бяцхан үрсдээ зориулж элсний талбай хийцгээе
Зуны зугаатай өдрүүд үргэлжилсээр….. Та зуслан болон хашаандаа бяцхан үрсээ тоглуулах тоглоомын талбай тэр дундаа элсний талбай хийхээр төлөвлөж байна уу. Элсний талбайг ихэнх хүмүүс газар ухаад элс асгаад л болчихдог гэж ойлгодог. Гэвч энэ нь нэг л борооноор  хамаг элс нь урсаад хавь орчноор тараад алга болдог. Иймээс элсний талбайг бат бэх, эдэлгээ, үзэмж сайтай, хүүхдэд аюулгүй, тав тухтай шийдэхийн тулд элсний хайрцагтай байх нь тохиромжтой ба дараах хувилбаруудаас санаа авч хийгээрэй.
  • Элсний талбайг өндөр мод, аж ахуйн барилгын хойно ч юм уу нүднээс далд байрлуулж болохгүй, аль болохоор аав ээж нь хүүхдүүдээ тоглож байгааг бүрэн харах боломжтой байрлалыг сонгох ба элсний талбайн тал нь наранд, нөгөө тал нь сүүдэрт байхаар байрлуулбал илүү тохиромжтой. Элсний хайрцгийг ихэвчлэн банз, брусээр хийдэг ба тэдгээрийг сайн харуулдаж хурц өнцөг үүсгэхгүйгээр холбох хэрэгтэй.
  • Элсний хайрцагны хэлбэр, хэмжээг нэг дор тоглох хүүхдийн тоо, талбайн хэмжээ, байрлалаас шалтгаалан сонгож болох ч хашлагын өндөр хүүхэд өөрөө алхаж орж гарахад саад болохооргүй  2-3 настай хүүхдийнх 20 см, түүнээс дээш настай бол 22-30 см өндөр байх нь зохимжтой.
  • Нэг хүүхэд тоглохоор бол 1,2 х 1,2 х 0,2м хэмжээтэй, 3-5 насны 2-3 хүүхэд тоглохоор бол 1,7 х 1,7 х 0.22 - 0,30 м хэмжээтэй байх нь тохиромжтой ба тоглож байгаа хүүхдийн хөл газарт хүрэхгүй байх хэрэгтэй.
  • Элс нь тоос шавар шорооны хольцгүй, нарийн ширхэглэлтэй шигшсэн байх ба бохирдсон тохиолдолд солих шаардлагатай.
 1.  Шүхэртэй задгай элсний хайрцаг. 
Дөрвөн буландаа суух тавцантай хоёр буландаа нарнаас хамгаалах шүхэр байрлуулсан элсний хайрцаг ч үзэмжтэй бөгөөд хийхэд хялбархан. 

  • Элсний хайрцаг хийх талбайгаа сонгож газарт хэмжээгээ тэмдэглэж дөрвөн буланд нь шон зоож утас татна.
  • Ургамлын хөрсийг 20 см орчим хуулна. Ус зайлуулах сувагтай хийхээр бол талбайн голд 40-50 см диаметртэй 60-70см гүн нүх ухаж бэлтгэнэ. Нүхэн дотроо хайрга хийгээд нягтруулж ус зайлуулах сувгийг хийнэ.
  • Элсний талбайн захаас гол хүртэл тодорхой хэмжээгээр налуу үүсгэн бэлтгэх нь борооны ус нь ус зайлуулах сувагт орж элсний талбайд ус тогтохгүй нөхцөлийг бүрдүүлдэг. 
  • Бэлэн болсон талбай дээрээ ус тусгаарлах хуудсан материал, хар цаас дэвсэж өгвөл сайн. 
  • Элсний хайрцаг нь 180х210 см хэмжээтэй тэгш өнцөгт хэлбэртэй. 2.5-3 см зузаантай 3м урттай банзыг тайрч тэгш өнцөг үүсгэн өөр хооронд хадаасаар холбож дотор талыг нь булан төмрөөр бэхэлж өгнө.
  • Дөрвөн буланд нь суух зориулалтаар тавцан хадаж өгөх нь элсний хайрцгийг хөдөлгөөнгүй бат бэх болгоход хэрэгтэй.
  • Хоёр буланд нь нарнаас хамгаалах шүхэрний ишийг оруулах зорилгоор ПВХ хуванцар хоолой суулгаж өгнө.
  • Элсний хайрцгийг ховилтой шалны банзаар шаллаж болно. Дараа нь хүссэн өнгөөрөө будаарай.
2. Тагтай элсний хайрцаг. 
Тагтай элсний хайрцаг нь элсийг гадны бохирдлоос хамгаалдаг ба таг нь эвхэгдэж түшлэгтэй 2 сандал болдогоороо давуу талтай.

  • 95Ч5х5 см хэмжээтэй 4 брус, 170х30х2,5 см  хэмжээтэй 4 модон самбар, эвхэгддэг сандалд 200х40х2,5 см хэмжээтэй 4ш модон самбарыг бэлтгэж модон материалыг олиф болон гадны нөлөөнд тэсвэртэй түрхлэгээр будна.
  • 4 брусээ элсний талбайн буланд байрлуулан 15-20 см хөрсний гүнд суулган бэхэлнэ. Элсний хайрцагны ханын самбарыг 30 см өндөртэй хийх ба 10 см өргөнтэй 3 эгнээ банзыг холбож хадаад булангийн брусэнд хадаж бэхэлнэ. Дараа нь нугасны тусламжтай эвхэгдэж түшлэгтэй сандал болдог модон тагийг бэлтгэж элсний хайрцагт бэхлээрэй. 
3. Сүүдрэвч- элсний хайрцаг.
Энэ нь хүүхэд дан элсэн дээр  биш мөн сүүдрэвчинд тоглох боломжтойгоороо давуу талтай. Элсэн дээр тоглож дуусаад элсний хайрцагийг хялбархан хурааж сүүдрэвчийн дор оруулах боломжтой, энэ нь элсийг гадны бохирдол, ус чийгнээс хамгаалаад зогсохгүй ногоон байгууламжийг ашиглах бололцоотой. Сүүдрэвч-элсний хайрцгийг дугуйтай хийж өгснөөр дуртай газраа байрлуулах ба өнгө дизайныг өөрсдийн хүссэнээр шийдэх боломжтой. 


Бүрдэл хэсгүүд: 
  • Дугуйтай, гурван талд нь модон сараалж хадсан сүүдрэвч
  • Сүүдрэвчийн 4 нуруунд бэхлэгдсэн 2 налуутай дээвэр
  • Дугуйтай элсний хайрцаг
  • Хэмжээ: 150х145х160см /урт, өргөн, өндөр/
  • Материал-нарс
Элсний хайрцгийг модоор хийх олон хувилбарууд байгаа ба доорхи зургуудаас санаа авч бяцхан үрсээ тоглох тав тухтай, аюулгүй орчныг бүрдүүлээрэй.




Танд амжилт хүсье.  
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.