Манзушир хийдийг соёл, шашин, аялал жуулчлалын төв цогцолбор болгоно

Манзушир хийдийг соёл, шашин, аялал жуулчлалын төв цогцолбор болгоно

Манзушир хийдийг соёл, шашин, аялал жуулчлалын төв цогцолбор болгох төсөл танилцуулах арга хэмжээ Монголын архитекторуудын эвлэлийн байранд боллоо. Энэхүү цогцолборыг БОАЖЯ-ны захиалгаар бүтээн байгуулах бөгөөд ирэх жилээс төслийн ажил эхлэх юм байна. Төслөөс товч танилцуулбал, хийдийн хуучин туурийг шашин соёл, түүхийн төв Манзушир бурханы орон болгон сэргээн засварлаж хөгжүүлэх ба шинээр тодорсон Манзушир хутагтын номын өргөөг байгуулахаар төлөвлөжээ.



Мөн аялал жуулчлалыг хөгжүүлэх хүрээнд Манзуширын хийдээс Цэцээ гүний оргил хүртэлх 5.6 км, Баруун ширээт 6.3 км, Зайсан толгой 4.7 км, нийт 17.4 км үргэлжлэх Cable car буюу агаарын зам барихаас гадна явган аяллын амралтын цэгүүдийг байгуулах аж. Олон улсын хэмжээний аялал жуулчлалын төв цогцолбор болох дээрх төслийн гүйцэтгэгчээр “Арчер” ХХК ажиллаж байгаа аж. 



Цогцолборыг нийт 270 тэрбум төгрөгөөр бүтээн байгуулах бөгөөд улсын төсвөөс 37 тэрбум, үлдэх зардлыг гадаад, дотоодын хөрөнгө оруулагчдаас гаргахаар төлөвлөжээ. Жилдээ 1.3 сая жуулчин хүлээн авах уг цогцолбор 5 жилд өртөг зардлаа нөхөж эдийн засгийн ашгаа өгөх, нийслэлд хамгийн ойр орших, түүх, соёл, аялал жуулчлалын төв болно хэмээн төслийн эдийн засагч Г.Дарханчулуун танилцуулсан юм. Энэ ажилд мөн бурхан шашны төлөөлөл идэвхтэй оролцож буйг Монголын бурхан шашны төв Гандантэгчэнлин хийдийн тэргүүн их хамба лам Д.Чойжамц дуулгаад, “Манзуширын аялал жуулчлалын цогцолборыг түүх, археологийн судалгаанд түшиглэн, газар нутгийн байршлын онцлог, үйл ажиллагааны хэлбэр зэргээс шалтгаалж Манзуширын ариун орон, эрдэм дэлгэрүүлэх орон, урлахуйн бүтээлийн орон гэсэн гурван үндсэн хэсэгт тооцож төлөвлөсөн” хэмээн онцолж байлаа. 

Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.