1008 айлын орон сууцны газар чөлөөлөлтийн ажил эхэлжээ

1008 айлын орон сууцны газар чөлөөлөлтийн ажил эхэлжээ

Барилга, хот байгуулалтын сайд Х.Баделхан БНХАУ-аас Монгол Улсад суугаа Элчин сайд Шин Хайминтай уулзаж барилгын салбарт хэрэгжиж буй төсөл, хөтөлбөрийн явцын талаар санал солилцсон байна. Тухайлбал, хамтын ажиллагааны хүрээнд хэрэгжүүлж буй "Улаанбаатар хотын Төв цэвэрлэх байгууламжийг шинээр барих төсөл”-ийн хэрэгжилтийн явцын талаар мэдээлэл солилцжээ. Одоогийн байдлаар БНХАУ-ын талаас төсөл хэрэгжүүлэх байршилд түр тоног төхөөрөмж байрлуулах талбай, газар чөлөөлөх асуудлыг шийдвэрлэх, лагийг боловсруулах, шилжүүлэх шийдлийн талаар Хятадын гүйцэтгэгч компанитай хамтран ажиллах, төсөлд ажиллах Хятад ажилчдын квотыг тогтоох зэрэгт дэмжлэг үзүүлж, хамтран ажиллахыг хүссэний дагуу Монголын тал дээрх тавьсан хүсэлтийг нэн даруй шийдвэрлэсэн байна. Газрын асуудлыг бүрэн шийдэж, орох, гарах гарцыг бүрэн чөлөөлөөд зогсохгүй БНХАУ-аас ажиллах ажиллах хүчний квотыг Засгийн газраас тогтоожээ. Түүнчлэн цэвэрлэх байгууламжаас гарсан лагийг байршуулах газрын асуудлыг Засгийн газрын хуралдаанаар ойрын хугацаанд шийдвэрлэхээр болсон. Өнгөрсөн хугацаанд БХБЯ БНХАУ-ын Эксим банкны төлөөлөлтэй удаа дараагийн уулзалт хийж төслийг эрчимжүүлэх талаар яриа хэлэлцээр хийсээр байгаа. Төслийн тусгайлсан зээлийн хэлэлцээр байгуулах бэлтгэл шатны ажлыг Монголын талаас бүрэн хангасан бөгөөд санхүүжүүлэгч тал төслийг үнэлэх шат эхэллээ. Иймд үнэлгээний ажлыг түргэтгэж, төслийг эрчимжүүлэхэд Элчин сайд анхаарч, дэмжлэг үзүүлэн хамтран ажиллахыг сайд Х.Баделхан хүссэн байна. 

"Улаанбаатар хотын Төв цэвэрлэх байгууламжийг шинээр барих төсөл”-ийн нэгж байгуулагдаж, төслийн ажлын зургийг боловсруулж, магадлалаар орж батлагдахад бэлэн болжээ. Угсралт, түр байр барих зэрэг ажил хийгдэж буй бөгөөд төлөвлөгөөний дагуу энэ жил биологийн цэвэрлэгээний байгууламжийн бетон хийцийн ажлыг хийж гүйцэтгэх юм. Үүний дараа "Сүхбаатар дүүргийн 9 дүгээр хороонд хэрэгжих 1008 айлын орон сууц" төслийн талаар санал солилцсон байна. Төслийн хэрэгжүүлэх хэлэлцээрийг хоёр тал баталснаар бэлтгэл ажил эхэлсэн. Монголын тал зураг төслийг бэлэн болгох, газар чөлөөлөх, шаардлагатай дэд бүтцийг бүрэн гүйцэтгэхэд анхаарч амжилттай үргэлжилж байгааг сайд дуулгалаа. Уг төслийн барилгажих талбайг бэлтгэх ажлын хүрээнд хийгдэх газар чөлөөлөлт, түр суурьшуулах болон инженерийн хангамжийн асуудлыг шийдвэрлэх, цаашид авах арга хэмжээний талаар санал боловсруулах үүрэг бүхий Ажлыг хэсэг байгуулагдсан бөгөөд газар чөлөөлөлтийг хийж эхэлжээ.  

Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.