Нийслэлийн Орон сууцны корпорациас мэдээлэл хийлээ

Нийслэлийн Орон сууцны корпорациас мэдээлэл хийлээ

“Буянт-ухаа-2" 972 айлын түрээсийн орон сууцанд хамрагдах хүсэлтэй иргэдийн сонгон шалгаруулалтын ажилтай холбогдуулан нийслэлийн Орон сууцны корпорациас өнөөдөр /2019.08.09/  мэдээлэл хийлээ.
Түрээсийн орон сууцны сонгон шалгаруулалт хэвлэл мэдээллийн байгууллага болон төрийн бус байгууллагуудад нээлттэй явагдаж байгаа буюу хуралдааны үйл явцыг ажиглаж, харах, хянах боломжтой юм байна.
Залуу гэр бүл гэсэн ангиллын байраа түрээслээд өмчлөх хэлбэрт нийт 4082 иргэн бүртгүүлснээс энгийн түрээс болон түрээслээд өмчлөх хэсэгт 58 байрны квоттой. Гэхдээ дээрх 4082 иргэдээс 1356 нь эхний шаардлага хангаагүй гэдэг үндэслэлээр сонгон шалгаруулалтад орох боломжгүй болжээ. Учир нь эдгээр иргэн Улаанбаатар хотод байнга оршин суудаггүй, гэр хороололд инженерийн шугамд холбогдсон өөрийн сууцгүй, тогтмол орлоготой, чанаргүй зээлийн түүхгүй, өмнө нь түрээсийн орон сууцанд хамрагдаж байгаагүй байх гэсэн нийтлэг үндэслэлүүдийг хангаагүй байна. Нийслэлийн Орон сууцны корпорацийн мэргэжилтнүүд тайлбарлахдаа “Жишээлбэл, залуу гэр бүл гэсэн ангилалд нийгмийн даатгал төлсөн хугацаагаар, гэр хороололд амьдарч буй агаарын чанарын бүсчлэлээр, хүүхдийн тоогоор нь гэх гурван үзүүлэлтээр эрэмбэлсэн. Нэг иргэнээр жишээ авахад 418 гэсэн кодтой, 16 жил нийгмийн даатгал төлсөн, агаарын чанарын нэгдүгээр бүсчлэлд амьдардаг, таван ам бүлтэй, гурван хүүхэдтэй, Сонгинохайрхан дүүргийн 25 дугаар хороонд амьдардаг, гэрлэсэн эмэгтэй хамгийн эхэнд тэнцээд байна” гэв. Энэ мэт иргэдээ сонгон шалгаруулсны дараагаар эх материалаа авч ирэхийг шаардах юм байна. Залуу гэр бүлийн ангилалд 12 жилээс доош нийгмийн даатгал төлсөн иргэд орж чадаагүйг албаныхан хэллээ. Харин энгийн түрээсийн байранд хамрагдах хүсэлтэй 35 наснаас доош залуу гэр бүлийн ангилалд зургаан жилээс дээш нийгмийн даатгал төлсөн хүмүүс багтжээ. Өнөөдөр сонгон шалгаруулалтын комисс үлдсэн ангилалд хүсэлтээ ирүүлсэн иргэдийн мэдээллийг эрэмбэлээд дуусах төлөвлөгөөтэй ажиллаж байгаа аж. Иймээс ирэх долоо хоногийн нэг дэх өдрөөс иргэдийн гар утсанд тэнцсэн, тэнцээгүй мэдээллийг илгээх юм байна. Мөн энэ үеэр түрээсийн орон сууцанд хамруулах хүсэлтэй иргэдийг залилах, луйвардах тохиолдол гарч байгаа учраас хууль хяналтын байгууллагад яаралтай хандахыг мэргэжилтнүүд анхаарууллаа.

Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.