Шинэ судалгаа, шинэлэг мэдээлэл, асуудал хөндсөн нийтлэлтэй “Барилга.МН” сэтгүүл

Шинэ судалгаа, шинэлэг мэдээлэл, асуудал хөндсөн нийтлэлтэй  “Барилга.МН” сэтгүүл
Барилгын салбарын ололт амжилт, тулгамдаж буй асуудал, бүтээн байгуулагчдынхаа хийж бүтээсэн ажил, амжилтынх нь тухай нийтлэл, мэдээ мэдээллийг уншигчиддаа цаг алдалгүй хүргэж, дотоод, гадаадын хөгжил дэвшил, техник технологийн гайхалтай нээлт, интерьер, архитектурын сонин содон шийдлүүд, салбарт тулгамдаад буй асуудлыг хөндөж тавьсан нийтлэл, өгөөжтэй ярилцлагуудыг хүргэдэг “Барилга.МН” сэтгүүлийн 111 дахь дугаар уншигч таны гар дээр очлоо. Энэ удаагийн дугаарт…

Дугаарын зочин



Сэтгүүлийн хоймор ярилцлаганд “Макс Өргөө” ХХК-ийн захирал Т.Түмэн-Өлзий оролцлоо. Тэрбээр ШУТИС-ийг 2012 онд Иргэний ба үйлдвэрийн барилгын инженер мэргэжлээр төгссөнөөс хойш өнөөдрийг хүртэл салбартаа амжилттай ажиллаж яваа залуу удирдагч.  Түүний салбартаа гаргасан ололт, амжилт, бүтээн байгуулалт, ирээдүйн зорилго мөн өнөөгийн барилгын салбарын тухай ямар санал, бодолтой явдаг талаар энэхүү  ярилцлагаас уншаарай. 
Амины орон сууцтай болохыг хүсдэг хүн бүрийн унших дуртай буланд...



Зуны энэ богинохон хугацааг хотоос зайдуу, цэвэр агаарт өөрийн барьж босгосон амины орон сууцандаа хайртай дотнын хүмүүстэйгээ хамтдаа өнгөрүүлэхийг хүссэн уншигчдадаа зориулж бид сэтгүүлийнхээ дугаар бүрт хэрэгтэй, үнэтэй зөвлөгөө мэдээллийг хүргэсээр өдгөө уламжлал болжээ. Энэ удаад амины орон сууцны хамгийн гол хийц болсон хана буюу хийт бетон блокоор хана өрөх аргачлалын талаар танилцуулсан. Учир нь, амины орон сууцны ханын бүтээцийг сүүлийн үед автоклавын хийт бетон гулдмай буюу блокоор өрөх хандлага нэмэгдсэн. Ингэснээр дулаан тусгаарлах чанар сайн болохын зэрэгцээ хөнгөн жинтэй, өрөхөд хялбар, хөдөлмөрийн бүтээмж ч өндөр байдаг.
Барилгын материал, орон сууцны үнэ ханш, зах зээл, захиалгын судалгаа...



Байр, орон сууц худалдаж авахаар хайж байгаа болон барьсан барилга, орон сууцаа худалдаж борлуулахыг хүсч байгаа хувь хүн, албан байгууллагууд нэлээдгүй. Тиймээс ч эдгээр уншигч, хэрэглэгчдэдээ зориулсан нийтлэл, судалгаа, үнэ ханш гээд цогц мэдээллийг тогтмол хүргэдэг. Энэ дугаарт 2019 оны 7 дугаар сарын 28 -ны байдлаар гаргасан шинэ орон сууцны үнэ ханшны талаарх судалгааг Улаанбаатар хотод өнгөрсөн 6 дугаар сарын байдлаар хэчнээн айлын хэдэн айлын шинэ орон сууцны төсөл хэрэгжиж байгаа, үүнээс дүүрэг тус бүрээр хэдэн айлын орон сууцны захиалга авч байгаа талаар мэдээлэлтэй давхар харж, харьцуулан судлах бүрэн боломжтой.  Цаашилбал, барилгын салбарынханд хамгийн “эрэлттэй” мэдээлэл болох цемент, тоосго, блок, арматур, бетон зуурмаг, модон материал, галд тэсвэртэй хөөсөн полистирол хавтан, цонх хаалга, элс хайрга, будаг эмульс гээд барилгын бүхий л материалын үнэ ханш, барилгын ажлын гүйцэтгэлийн шинэчлэгдсэн үнэлгээ гээд Та бүхний ажилд судалгаа, тооцоо, төсөв гаргахад тус болсон мэдээ, мэдээллийг зөвхөн “Барилга.МН” сэтгүүлээс харах боломжтой гэдгийг дуулгая.
Усаа зайлуулж чадахгүй бол ус биднийг зайлуулна



Нийслэлчүүдийн хувьд өвлийн улиралд тулгамдсан асуудал нь агаарын бохирдол бол зуны улиралд үер усны асуудал нэн тэргүүнд шийдэх ажлын нэг болоод байна. Хотын хэмжээнд ус зайлуулах шугам сүлжээ бараг байхгүй гэж хэлэхэд хол зөрөхөөргүй. Тэр байтугай Улаанбаатар хотын хатуу хучилттай нийт замын 90 хувь нь борооны ус зайлуулах шугамгүй гэвэл Та итгэх үү. Нийслэлчүүд бидний хувьд хамгийн тулгамдсан асуудал өнөөдөр ямар байдалтай байгаа цаашид хэрхэн анхаарч ажиллах шаардлагатай талаар энэ удаад хөндөж бид нийтэллээ. Ажил болгож заавал уншаарай хэмээн уншигчид тэр тусмаа холбогдох албан тушаалтнуудыг урьж байна.
Хэрэглэгчийн булан


 
Та зуслан болон хашаандаа бяцхан үрсээ тоглуулах тоглоомын талбай тэр дундаа элсний талбай хийхээр төлөвлөж байна уу. Элсний талбайг ихэнх хүмүүс газар ухаад элс асгаад л болчихдог гэж ойлгодог. Гэвч энэ нь нэг удаагийн борооноор хамаг элс нь урсаад хавь орчноор тараад алга болдог. Иймээс элсний талбайг бат бэх, эдэлгээ, үзэмж сайтай, хүүхдэд аюулгүй, тав тухтай хэрхэн шийдэх зөвлөгөөг “Хэрэглэгчийн булан”-гаас шимтэн уншаарай. 
Барилгын технологийн топ 10 инноваци


 
1 ширхэг хадаас ч хэрэглээгүй барилгын технологи, хог гэж нэрлэдэг хаягдал байшин болсон нь, уян бетон, био хуванцар байшин, нүүрсхүчлийн хийн бетон, газрын хөрс барилгын материал болсон нь гэх мэтчилэн сонсоход ч гайхал төрүүлэм бүтээн байгуулалтууд хэдийнэ олон улсад нэвтэрч эхэлжээ. Энэ талаарх сонирхолтой нийтлэлийг “Технологийн дэвшил” булангаас танилцаарай.
Нийслэлийн бүх цэцэрлэг хүчин чадлаа 85 хувиар хэтрүүлэн ажилладаг



Нийслэлийн төрийн өмчийн 230 цэцэрлэг нийт 45,395 хүүхдийн хүчин чадалтай ч одоогийн байдлаар 84,206 хүүхэд хүлээн авч ажиллаж байна. Энэ нь нийт цэцэрлэгт хамрагдаж буй хүүхдийн 72.4 хувь нь гэсэн үг. Харин хувийн 441 цэцэрлэг нь нийт цэцэрлэгт хамрагддаг хүүхдийн 27.6 хувийг буюу 32,011 хүүхэд хүлээн авч үйл ажиллагаа явуулж байна. Нийслэлийн хэмжээнд цэцэрлэгт хамрагддаггүй 36,765 хүүхэд байна. Үүний зэрэгцээ цэцэрлэгүүдийн барилга байгууламжийн ашиглалтын судалгаа, их засварын өнөөгийн байдал, цэцэрлэгүүдэд тулгамдаж буй асуудлыг “Нэг сэдвээр” буланд хөндөж тавьсан юм.

                     Сэтгүүл захиалах
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.