Орчин үеийн модон хийц эрчим хүчний алдагдлаас хамгаалж доторх агаарын чийгшлийг эрүүл байлгадаг

Орчин үеийн модон хийц эрчим хүчний алдагдлаас хамгаалж доторх агаарын чийгшлийг эрүүл байлгадаг

Агаар нэвтрүүлэх чанар гэдэг нь гуалин болон байшингийн завсраар агаар дотогш эсвэл гадагш шууд нэвтрэнэ гэсэн үг биш юм. Орчин үеийн дүнзэн байшингууд нь үнэндээ маш бага эрчим хүчний алдагдалтай байдаг. Дүнз нь байшин доторх агаарын чийгшлийн хэлбэлзлийг тэнцвэржүүлэх байдлаар амьсгалж байдаг юм.

“Доторх агаарын чийгшил нэмэгдэхэд гуалин нь илүүдэл чийгийг өөртөө шингээн авч байдаг. Харин агаар хуурайших үед гуалин нь эргээд өрөөний агаарыг чийгшүүлж байдаг” хэмээн Контио-ийн төлөвлөлтийн менежер Микко Лёф тайлбарласан байна.

Гэхдээ чийг гуалинд бүхэлд нь шингэж орно гэж ойлгож болохгүй юм. Илүүдэл чийг нь гуалингийн зөвхөн өнгөн хэсэгт, 5см-ээс илүүгүй зузаанд л нэвтэрч орох болно. Ингэснээр өрөөний агаар хуурайших үед чийг нь маш хурдан хугацаанд буцаж агаарт нэвтрэх юм.

Тэнцвэрт байдлыг хангах нь

Модон хананы чийгшил зохицуулах шинж чанарыг бодитоор дүрслэхийн тулд Лёф гэр бүл эсвэл найз нөхөдтэйгээ оройг саунд тааламжтайгаар өнгөрүүлж буй жишээг татан авсан юм. Сауны ялгаруулж буй чийгнээс гадна шүршүүрийг хэд хэдэн удаа, сауны өмнө болон дараа нь ашиглаж хүмүүс ууранд суунгаа ярилцаж үе үе чулуун дээр ус цацдаг. Хэсэг хугацаа өнгөрнө. Удалгүй цонх болон толь цанатаж, хувцас солих өрөөнд байгаа ямар ч төрлийн цаас чийгтэн үрчийж эхлэх болно. Энэ нь агаарын чийгшлийн хэмжээ нь хүйтэн гадаргуу дээр конденсаци үүсгэх түвшинд хүрснийг илтгэж буй дохио юм.

Нөхцөл байдлыг сайжруулах зорилгоор агааржуулагчийг асааж болох бөгөөд энэ нь энгийн бүтэцтэй байшингуудын хувьд авдаг ердийн арга хэмжээ билээ. Харин Контио-ийн дүнзэн байшингуудад ийм асуудал ердөөсөө ч үүсэхгүй юм. Саунд суух бүхэл оройн турш цонхнууд цанатахгүй ба цаас хуурай хэвээр байх болно. Агаарын чийгшил төдий их биш мөн хүнд биш байх бөгөөд дүнзэн байшинд амьсгалахад үргэлж амар байдаг.

“Нөгөө талдаа, дүнзэн байшингийн өрөөн дэх агаарын чийгшил буурах үед чийг бага багаар агаарт буцан нэвтэрч хэзээ ч агаарыг хуурайшуулахгүй” хэмээн Лёф ярьж байна.

Иймд дүнз нь тухайн орчны нөхцөл байдлаас шалтгаалан агаарын чийгшлийн хэмжээг ихэсгэж, бууруулах замаар хамгийн тохиромжтой түвшинд тохируулж байдаг үр ашигтай, нэг төрлийн хамгаалалтын хэрэгсэл юм. Өвлийн улиралд доторх агаар ихэвчлэн хуурай байдаг ч хувцас угаах, шүршүүрт орох зэргээс үүссэн агаарын чийгшил нь дүнзэнд шингээх хангалттай хэмжээний чийгийг үүсгэж байдаг. Ингэснээр агаарын чийгшлийн хэмжээ хэвийн хэмжээнээс доош орох үед дүнз нь хадгалсан чийгийн зарим хэсгийг буцаан өрөө рүү гадагшлуулж эхэлдэг байна.

Энэ нь маш хурдан хугацаанд болж өрнөдөг. Мод нь өдрийн турш хэд хэдэн удаа агаарын чийгшлийн хэлбэлзэлд их бага хэмжээгээр хариу үйлдэл үзүүлж байдаг. Энэ нь байшин дотор хэрэглэгддэг цахилгаан агааржуулагчийн үйл ажиллагааг орлож байдаг юм.

Цахилгаан агааржуулагч нь тэр болгон оновчтой байдлаар, зохион бүтээгдсэн зориулалтаараа ажилладаггүй. Тухайлбал, агаарын чийгшил өндөр үед заавал ч үгүй өндөр хүчин чадлаар тэр дор нь ажиллуулах боломжгүй юм.  Мөн агааржуулагчийг ажиллуулснаар эрчим хүчний хэрэглээг эрс нэмэгдүүлэх болно. Дүнзэн байшингийн хувьд өрөөн доторх агаарын чанар сайн байдаг тул агааржуулагчыг тэр бүр асаагаад байх шаардлага гардаггүй юм.

Эрүүл сонголт

Модны агаар нэвтрүүлэх чанар ашигтай байдаг нь тогтвортой агаарын чийгшил бий болгож хүний эрүүл мэндэд ач тустай байдаг. Хэтэрхий хуурай агаар нь амьсгалын эрхтнийг цочроож байдаг бол чийгшил ихтэй агаар нь нян бактери үржих нөхцлийг бүрдүүлдэг байна. Байшин доторх хамгийн тохиромжтой агаарын чийгшлийн хэмжээ нь 45 орчим хувь байдаг байна.

Дүнзний агаар нэвтрүүлэх чанарыг хадгалахын тулд түүний гадаргууг арчилж тордох бүтээгдэхүүнийг сайтар шилж сонгох ёстой юм. Хамгийн зөв сонголт нь амьсгалдаг, органик будаг эсвэл лав юм.

“Лак мэтийн агаар нэвтрүүлэлтийг зогсоох хальсан бүрхүүл үүсгэдэг материалаас зайлсхийх шаардлагатай” хэмээн Лёф зөвлөж байна.

Дулааныг өөрийн гараар мэдрэх нь

Дүнзэн мод нь чийг хуримтлуулахаас гадна мөн дулаан хадгалж байдаг. Энгийн байшингуудыг бодвол дүнзэн байшинг ижил түвшинд халааж, хөргөх шаардлагагүй тул эрчим хүч хэмнэдэг юм. Модны дулаан хадгалах чадвар нь энгийн байшингуудтай харьцуулахад эрчим хүчний хэрэглээг 5 орчим хувиар бууруулдаг ба хөргөхөд зарцуулах эрчим хүчний хэрэглээг 50 хувиар бууруулдаг байна.

Мөнгө хэмнэхээс гадна бага эрчим хүч зарцуулах нь байгаль орчинд ээлтэй юм.

Лёфийн хэлж буйгаар дүнзний дулаан хадгалах чадварыг гараараа ч мэдрэх боломжтой аж. Дүнзэн байшингийн хананд хүрэхэд дулаан мэдрэгддэг байна.

“Эсрэгээрээ, хэрэв та чулуун хана эсвэл гипсэн хананд нуруугаа харуулан хэдэн см-ийн зайтай зогсож байсан ч хүйтнийг мэдрэх боломжтой байдаг. Та үүнийг гадаа байхдаа ч  туршиж үзэх боломжтой бөгөөд эхлээд чулуун дээр суусны дараагаар модон сандал эсвэл хожуул дээр сууж үзсэнээр мэдэх боломжтой юм. Аль нь илүү тав тухтай болохыг мэдэж болно!”

Контио-ийн дүнзэн байшингууд нь бусад талаараа ч эрчим хүчний хэмнэлттэй нь Контио-ийн өөрийн чанарын хяналтын өндөр шаардлага, мөн агаарын битүүмжлэлтэй холбоотой стандартуудын дагуу баригддагтай холбоотой юм. Стандартын дагуу агаар солилцооны түвшин 4-өөс ихгүй байх ёстой бөгөөд энэ үзүүлэлт бага байх тусмаа байшингийн агаарын битүүмжлэл төдий чинээгээр сайн байгааг илтгэдэг байна.

“Контио-ийн бүх байшингуудад агаарын битүүмжлэлийн туршилт хийгдсэн байдаг. Энэ нь манай бүх нийлүүлэлтэд хийгддэг чанарын хяналт шалгалтын нэг хэсэг бөгөөд хэрэглэгч маань байшингаа өөрөө угсарсан ч адил байдаг юм. Заримдаа Контио-ийн дүнзэн байшингийн агаарын битүүмжлэлийн коэффициент 0.2-той байсан тохиолдол ч бий”, хэмээн Лёф ярьж байна.

Цэвэр модон байгууламж нь хамгийн зөв сонголт

Агаарын битүүмжлэлийн түвшин сайн байснаар эрчим хүчний алдагдалгүй байна. Түүнээс гадна байгууламж дотор хяналтгүй агаарын урсгал бий болохгүй тул агаарын чанарыг хадгалахад хялбар болгож байгаа юм.

“Дүнзэн барилгуудыг эрчим хүчний хэмнэлттэй чанараар нь бусад материалуудтай харьцуулдаг ба зарим талаараа хамгийн сайн, найдвартай сонголтоор шалгардаг” 

Энэ тал дээр цэвэр модон хана бүхий барилга байгууламжууд хамгийн тохиромжтой байдаг хэмээн онцолж байна. Энгийн бүтэцтэй байгууламж нь агаар алдалт гарах сул тал хамгийн багатай байх болно.

“Тухайлбал, энгийн байшингуудын хувьд нимгэн хананд хадаас хадах эсвэл өрөмдөж цоолох нь тухайн хавтангийн чийг нэвтрүүлэхээс хамгаалсан хуванцар саадыг нүхлэх эрсдэлтэй юм. Цэвэр модон хананд ийм сул тал байдаггүй. Хадаас эсвэл шурагийг буцааж сугалсан ч дараа нь нэвчих эрсдэл үүсэхгүй юм.”

Контио нь дүнзэн байшингуудын загвараа гаргахдаа эрчим хүчний үр ашгийг тооцон үздэг. Ингэхийн тулд дүнзийг нүхлэх болон ухах, түүнчлэн заадас болон холбоосуудыг битүүмжлэх зэрэг хүчин зүйлүүдэд ихээхэн анхаарал хандуулах шаардлага гардаг. Бүтээгдэхүүнийг зах зээлд нийлүүлэх шийдвэрийг гаргахын өмнө Контио-ийн өөрийн бүтээгдэхүүн хөгжүүлэлтийн лаборатори болон гадны туршилтын байгууламжууд дээр удаан хугацааны туршилтууд  хийгддэг юм. Үүнээс гадна бэлэн болсон дүнзэн барилгууд дээр туршилтууд хийгдсэнээр цаашдын бүтээгдэхүүн хөгжүүлэлт болон түүнтэй холбоотой шийдлүүдээ олоход шаардлагатай мэдээллээр тасралтгүй хангагдаж байдаг юм.

Зөв угсарч боловсруулсан модон хана нь эрчим хүч хэмнэхээс гадна агаарын чийгшлийн хэлбэлзлийг тогтворжуулдаг байна. Ийм учраас дүнз нь эрүүл мэндэд тустай, хүртээмжтэй болоод байгальд ээлтэй, хамгийн оновчтой сонголт юм.

Эх сурвалж: https://www.progrex.mn/kontio-log-house-energy-efficiency/ https://www.kontio.com/en/stories/energy-efficiency/

Эх сурвалж: Kontio

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.