Хялбар хийцтэй зуны модон сууц

Хялбар хийцтэй зуны модон сууц

Зуны богинохон өдрүүдийг хотоос зайдуу, дуу чимээ багатай агаарын болон хөрсний бохирдолгүй газарт зуны жижиг модон сууц барьчихаад гэр бүл, үр хүүхдүүдтэйгээ аз жаргалтай, хөгжилтэй өнгөрүүлэхийг хүсч байна уу.  Ийм хүсэлтэй иргэдэд зориулан хямдхан үнээр, авсаархан шийдэлтэй, хялбар баригдах модон сууцаа өөрсдийн хүчээр яаж барих талаарх зөвлөгөөг хүргэж байна.
Зөвхөн дулааны улиралд амьдрах зуны сууцыг бат бөх, дулаахан, эрүүл, аюулгүй амьдрах орчинг бүрдүүлдэг, эдийн засгийн үр ашигтай, эдэлгээ сайтай байгалийн цэвэр материал болох модон материалаар баривал илүү тохиромжтой ба ихэнхдээ модон каркасан шийдэлтэй барьж байна. Модон каркасан барилга нь барьж босгоход хялбар, энгийн байдаг учраас түгээмэл хэрэглэгддэг. Үүний чухал давуу тал нь шалны угсаргаа хэсэг нь хананаас тусдаа баригддаг. Тиймээс эхлээд шалаа тавиад шалан дээрээ ханын каркасаа угсарч дотор, гадна ханаа гараар босгож угсардаг. Модон каркастай барилгад стандартын зүсмэл болон модон бүтээгдэхүүн, хана, шал, дээвэр хийх хавтан материал зэргийг ашигладаг ба энэ нь барилга барихад хурдан, бүтээл өндөртэй байдаг. Модон барилгыг хэрэглэж байгаа модноос нь хамааруулан гуалин, дүнзэн, наамал модон, дулаалгатай модон каркасан барилга гэж ангилдаг.
Сүүлийн үед  модон сууцыг модулийн зарчмаар буюу урьдчилан үйлдвэрт бэлтгэсэн бэлэн деталь материалуудаар барих нь хугацаа хэмнэж, барихад хялбар болгож байна.
Төлөвлөлт
Сууцны хэмжээг газрын байрлал, талбайн хэмжээ ам бүлийн тооноос хамаарч сонгох, цаг хэмнэх үүднээс бэлэн зураг ашиглаж болох ба 24-60м2 талбайтай дан байх нь тохиромжтой. Өрөө тасалгааны талбайг сонгохдоо хэрэгцээт бүх тавилга тавигдаж, тав тухтай амьдрах хүрэлцээтэй бөгөөд хангалттай зай хэмжээг бодолцох хэрэгтэй. Сууцны өрөөнүүдийн  хамгийн бага хэмжээ нь: зочны өрөө -18м2, унтлагын өрөө- 8м2,  гал тогоо- 10м2 байна. Өрөөнүүдийн хамгийн бага өргөн нь: гал тогооны хэсэгт – 1,7м, үүдний хэсэгт- 1,4м, хонгил-0,85м, ариун цэврийн өрөө- 1,5 м байвал тохиромжтой. Орон сууцны барилгын сууцны өрөөний өндрийн доод хязгаар 2.5 м байна. Нар тогтмол тусах өрөөний хэмжээг 1-3 өрөө сууцанд нэг өрөөтэй тэнцэхээр тооцож төлөвлөнө. Ихэнх тохиолдолд зуны сууцыг 4х6м, 5х6м, 6х8м хэмжээтэй төсөллөдөг. Үүнээс их талбайтай байшинг жилийн 4 улиралд ашиглаж амьдрахаар төлөвлөнө.
Байгалийн гэрлийн тусгал, гадна талбайн тохижилт, галын аюулгүй байдлыг хангах зорилгоор:
  • Хөрш айлын талбайгаас 3м, нийтийн гудамжнаас 5м-с доошгүй зайтай сууцаа төлөвлөх;
  • Модон сууцыг зэргэлдээх сууц тоосгон бол 10м, модон бол 15 м-ээс багагүй зайд төлөвлөх нь галын аюулгүй байдлыг хангах зорилготой.
  • Зэргэлдээх сууцанд тусах  нарны тусгалыг хаахгүй байх зорилгоор сууц хоорондын зайг  байшингийн өндрөөс их зайд төвөллөх ёстой.
Модон материал:
Модон материал олдоц сайтай, барихад хялбар, гадна өнгө үзэмж сайтай, жин хөнгөн, бат бэх, хүний амьдрах орчинд эерэг нөлөөтэй зэрэг шалтгааны улмаас зуны сууцаа модоор барих иргэд олширч байна. Модон материал нь нэгэн төрлийн бус бүтэцтэй, галд тэсвэргүй, өмхрөл ялзралд ордог зэрэг дутагдалтай талтай боловч модон бүтээцийн галын эсрэг арга хэмжээг бүтээцлэлийн болон химийн аргаар хангадаг. Үүнд: модон элементийн цулжилтыг хангах, шатдаггүй материалаар дулаалах, модны гадаргууг түрхлэгээр хамгаалах, будгаар будах, галд тэсвэртэй материалаар бүрэх арга хэмжээ орно. Модон бүтээцийн ашиглалтын үед чийгшлийг хэвийн хэмжээнд байлгаж хэт хатаахгүй байх, салхи оруулж байх, ус чийг хамгаалах хуйлмал материал ашиглах, антисептик түрхлэг хийх замаар өмхрөлт, ялзралаас хамгаалах арга хэмжээ авдаг.
 Суурь, шал
Хялбар баригдах зуны сууцанд хүртэл суурь хийх заавал шаардлагатай. Барилгын ажлын эхний үе шатанд барилгын талбай дээр улаан шугам татаж, суурийн нүхний хэмжээсүүдийг зөв тавьж, суурийн нүх ухах ажлыг эхлүүлнэ. Модон барилгын суурийг газрын түвшнээс дээш 40 см-ээс багагүй өндөрт хийвэл зохино. Энэ нь ханын модон материалыг ус чийгний үйлчлэлээс хамгаалах ач холбогдолтой. Суурийн дээд түвшинд, хөрстэй харьцаж байгаа хэсэгт ус тусгаарлах арга хэмжээ авна. Зуны модон сууцны суурийн төрөл нь ихэвчлэн баганан болон шугаман байдаг.
Баганан суурь бол материалын хэмнэлттэй, өөрсдийн хүчээр хийхэд тохиромжтой.
Баганан суурийг 1,5-3м алхамтайгаар гадна ханын уртын дагуу ханын булан, дотор гадна ханын уулзвар дээр хийнэ. Сууринд бетон, улаан тоосго, бетон блок болон суурийн блокыг ашиглаж болно. Суурь суулгах гүн 40 см хүртэл, хөндлөн огтлол нь ханын зузаанаас их байна. Багануудын тогтвортой байдлыг нэмэгдүүлэхийн тулд модон ба төмөрбетон дамнуруугаар холбож өгч болно. Суурийн дор 30-40мм зузаантай элсэн дэвсгэр хийж нягтруулах ба дунд ширхэглэлтэй хайрга, керамзит хийвэл тохиромжтой.
Харин байшингийн шалны элементүүд нь ачааллыг найдвартай даахуйц бат бэх, зөвшөөрөгдөх хэмжээнээс илүү хотойлт үүсэхээргүй байх шаардлагатай. Энэхүү чанар нь хучилтад хэрэглэх модон материалын төрөл, ангилал, огтлолын хэмжээ, алхам, хучилтын дэвсгэр үеийг дам нуруунд бэхлэх бэхэлгээ, дам нурууны холбоосны хэлбэр зэргээс хамаарна. Шалны үндсэн элементүүд нь ул банз, анкерын боолт, үндсэн дам нуруу, туслах дам нуруу, мөрөгцөг дам нуруу, холбоос, шалны дэвсгэр үеэс бүрдэнэ.



Модон каркас угсралт
Зуны сууцны ашигтай хувилбар-модон каркасан барилга юм.
Модон каркасан сууц барих үе шатууд:
     Суурь угсралт
     Хар шал хийх
     Каркас угсралт
     Дулаалга, уур ус тусгаарлалт
     Ханын хавтангийн угсралт
     Хучилт хийх
     Дээвэр угсралт
     Цонх, хаалганы ажил
     Гадна, дотор заслын ажил
Модон барилгын ханыг суурьтай сайн бэхэлсэнээр барилгын хөшүүн чанарыг сайжруулахаас гадна, газар хөдлөлтийн үед ханыг гулсахаас хамгаална. Сууриас гаргасан анкер бэхэлгээгээр ханыг бэхэлж өгнө. Каркасны ул банзыг модон араг бүтээцийг суурьт анкерлах, хучилтын уулзваруудад бусад хийцийг бэхлэх үндсэн зорилгоор хийдэг.
Модон араг бүтээцтэй барилгын ханын каркас нь босоо тулгуурууд, дээд, доод хэвтээ хөндөл, ялуу, ялууны тулгуур, булангийн багана, хамар ханын уулзвар болон холбоос зэрэг элементүүдээс тогтоно. Ханын каркасыг зөв хийснээр барилгын гадна, дотор өнгөлгөөг хийхэд хялбар болдог. Мөн дараа нь нэмэлт өөрчлөлт хийх үед хүндрэл бага гардаг. Сууцны хэмжээ, давхрын тооноос хамаарч модон каркаст 100х100мм, 150х150мм хэмжээтэй палк, эсвэл 50 мм зузаантай банзыг ашиглаж болно. Үйлдвэрт урьдчилан бэлтгэсэн бэлэн модон деталь материалуудаар зуны сууцаа өөрсдөө угсрахаар бол угсралтын заавар, схемтэй сайн танилцаж, модон барилга угсрах чадвар эзэмшсэн байх ёстой. Эсвэл мэргэжлийн туршлагатай хүмүүсийн тусламжтай угсралтын ажлаа хийлгээрэй.
Модон каркасыг угсрах дараалал:
  • Суурийн хэвтээ гадаргууд ус тусгаарлалт хийж өгнө.
  • Барилгын периметрийн дагуу тавьсан, мөн тусгаарлах ханын дагуух каркасын доод хэвтээ хөндөлийг  бэхэлгээний деталь болон анкер төмрийн тусламжтай суурьтай холбож өгнө.
  • Шалны дэр модыг тавьж бэхэлнэ.
  • Булангаас эхлэн ханын босоо тулгууруудыг ханын дагуу 0,6м зайтай угсрах ба босоо тулгууруудыг хэвтээ хөндөлийн ховилд оруулж барилгын скоб, хадаасаар эхэлж түр зуур бэхлээд босоо чиглэлийн хазайлтыг тэгш усаар шалгасны дараа бүрмөсөн бэхэлнэ.
  • Булангийн босоо тулгуурыг модон палкаар хийх ба завсрын тулгууруудыг 50 мм зузаантай ижил өргөнтэй банзаар хийж болно.
  •  Босоо тулгууруудын дээр дээд модон хөндөлийг бэхэлж өгнө. Хаалга, цонхны нүхний каркасыг угсрана
  • Каркас угсралтын явцад хэмжин шалгалтын багажуудыг ашиглан босоо, хэвтээ чиглэлийн хазайлт, модон хийцүүд нэг хавтгайд байгаа эсэхийг байнга шалгах хэрэгтэй.
Ханын дотор, гадна өнгөлгөөнд шаардлага хангасан төрөл бүрийн модон хавтангууд, банз, рейк мод, ОСБ хавтан, гипсэн хавтанг ашиглаж болно.



Хучилт ба дээвэр 

Хучилтын модон дам нурууг каркасын дээд хөндөлд барилгын скобын тусламжтай бэхэлж өгөх ба 3-4м өргөнтэй алслалд 50х150мм хөндлөн огтлолтой, үүнээс их алслалд 100х150мм, 150х150мм хэмжээтэй модон палкыг ашиглана. Модон дам нурууны алхам 0,6м байх ба  хучилтанд 1,8м өргөнтэй модон хавтанг хэрэглэхэд тохиромжтой.
Зуны сууцанд ихэвчлэн налуу дээвэр хийдэг ба энэ нь шувуун нуруун бүтээцтэй байдаг. Шувуун нуруун дээвэр нь гол нуруу, диагональ нуруу, ул нуруу, тулгуур хийцээс тогтоно. Шувуун нуруун дээврийг 6-12м алгасалтай модон каркасан барилгад хэрэглэнэ. Шувуу нуруу хоорондын зай зуны сууцанд ихэвчлэн 0,8-1,2м байдаг. Шувуу нурууны дээд үзүүрийг гол нуруунд, доод үзүүрийг ул нуруу /мауэрлат/-д дэрлүүлэн байрлуулах бөгөөд  ул нуруутай булан төмрөөр хадаж бэхэлнэ. Дээврийн хучлагад 0,4-0,5мм зузаан долгионт болон хавтгай гөлмөн төмөр хэрэглэнэ. Дээврээс ус гоожихоос хамгаалж долгионт гөлмөн төмрийг зөрүүлж угсрах ба хавтгай гөлмөн төмрийн хооронд босоо ба хэвтээ эмхэрдэж холбоно. Босоо эмхэрдэлтийг дээврийн налуугийн дагууд, хэвтээ эмхэрдэлтийг дээврийн хөндлөн чиглэлд хийнэ.



Зуны модон сууцны тодорхойлолт  
Нэг давхар модон каркасан сууцны хэмжээ: 6х4,5м,  зочны өрөө 10,71 м2, унтлагын өрөө 2-5,36 м2
•     Суурь - баганан, бетон блок 20х20х40 см
•     Булангийн босоо тулгуур- палк 150х150 мм
•     Шалны дай мод - банз 150х50 мм
•     Хар шал - шалны хавтан, зузаан 25 мм (OСБ хавтан)
•     Цэвэр шал - шалны банз,  зузаан 36 мм
•     Завсрын босоо тулгуурууд - банз 100х50 мм
•     Ханын дулаалга - дулаан тусгаарлагч Rockwool чулуун хөвөн
•     Ханын гадна засал - модон хавтан, уур тусгаарлагч материал
•     Дотор хана - гипсэн хавтан,  ГКЛ 12,5 мм
•     Хучилт- банз 100х50 мм, 2 талаасаа гипсэн хавтан өнгөлгөөтэй
•     Дээвэр - шувуун нуруу, банз 100х50 мм
•     Дээврийн хучилга - металл черепиц
•     Цонх - 2 давхар шилтэй, модон
•     Хаалга - модон
•     Таазны өндөр - 2,5 м
 
Зуны модон сууцаа өөрсдийн хүчээр хялбар барихын тулд мэргэжлийн хүмүүсээс зөвлөгөө авч, өөрсдийн хүссэн сууцандаа гэр бүлтэйгээ аз жаргалтай амьдраарай. Танд амжилт хүсье.
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.