Зуслангийн байшингаа хамтдаа тохижуулъя

Зуслангийн байшингаа хамтдаа тохижуулъя
Зуны зугаатай өдрүүд үргэлжилсээр. Эрүүл агаар, тав тухтай зуслангийн байшин, үзэмжтэй, цэвэр цэмцгэр  ногоон орчинд хайртай, дотны хүмүүстэйгээ хамтдаа байна гэдэг хамгийн сайхан амралт. Иймээс зуслангийн байшиндаа илүү тохь тухтай амрах, орчин тойрноо тохижуулах, зуслангийн газраа илүү үнэ цэнтэй болгох талаар үнэтэй зөвлөмжийг хүргэж байна. Хамгийн гол нь Та толгойдоо орсон бүх мөрөөдлөө ганцхан зуны дотор хийнэ гэж төлөвлөж болохгүй шүү. Учир нь, хэт олон ажил зэрэг эхлүүлэхээр алийг нь ч дуусгаж амжилгүй зуны сар дуусч болно. Иймээс алхам алхмаар, хүч бололцоондоо тулгуурлан хийх нь үр дүнтэй гэдгийг битгий мартаарай. Нэмж хэлэхэд зуслангийн байшингаа тохижуулж ажиллах нь байгалийн танин мэдэхүйн хичээлийг өөрийн хашаанаасаа олж мэдэхээс эхлээд олон талын ач тустай.

Ногоон орчин, ногоон зүлэг...
Зуслангийн хашаанд байх хамгийн гол зүйл бол ширдэг шиг зөөлхөн ногоон зүлэг. Гэхдээ хөрсний болон орчны бохирдол, арчилгаа зэргээс үүдэн зүлэг халцрах, шарилж, хогийн ургамал ургах зэрэг сөрөг үзэгдлүүд гарах нь олонтаа. Иймээс тогтмол арчилж, зүлгээ засч янзалж байх хэрэгтэй. Хэрэв боломжтой бол зүлгээ тогтмол биш ч гэсэн хааяадаа тэгшилж байх хэрэгтэй бөгөөд 5 см-ээс багасгалгүй тэгшлэхийг танд зөвлөе. Мөн зүлгийг суулгаж арчлахад зардал их ордог учир тодорхой хэмжээний газарт зааг гарган тарих нь илүү цэвэрхэн, цэгцтэй харагдахаас гадна арчилгаанд ч хялбар. Нөгөө талаар ургамлын сүрэл болон хайргаар тохижуулах шийдлийг хүмүүс сүүлийн үед ихээр хэрэглэх болсон бөгөөд хайрганы хувьд тоос босохгүй, хямд өртөгтэй, арчилгаа багатай зэрэг олон давуу талтай байхад сүрэл нь хөрсөн дэх чийгийг хадгалж, мөн гадна орчны бохирдол, чийгээс хамгаалдаг давуу талтай.

Тарьж ургуулах модны хувьд Сакураг санал болгож байна. Учир нь, хамгийн түрүүнд цэцэглэдэг учраас сайхан мэдрэмжийг танд төрүүлэх нь гарцаагүй. Эхлээд ягаан, дараа нь цагаан өнгөтэй гоёмсог цэцгүүд хашаанд тань амьд архитектурыг бүрдүүлнэ гэсэн үг.  Мөн шилмүүсээ гөвдөггүй учраас жилийн 4 улиралд өтгөн саглагар байж чаддаг нарс модыг тарьж болно. Арчилгаа багатай, хурдан томордог гээд ашигтай зүйл их. Түүнчлэн манай нөхцөлд хамгийн тэсвэртэй түргэн ургадаг мод нь хайлаас улиас. Өнгө үзэмж сайтайн зэрэгцээ энерги сайтай мод гэж нэрлэгддэг. Эсвэл хамгийн найдвартай “байгаль хамгаалагч” болдог бургас ч болно. Хөрс голохгүй хаана ч ургадаг учраас цөлжилтийн аюул нүүрлэсэн газар болон ширгэж буй гол мөрний сав газарт тариалахад усны нөөцийг нэмэгдүүлдэг ач холбогдолтой. Хурдан ургадаг учраас цөлөрхөг газрыг ногооруулах хэлбэржүүлэлт хийж гоёл чимэглэлийн болон амьд хайс хашлага салхины нөмөр болгох зорилгоор зурваслан тарьдаг юм. Хамгийн гол нь манайд гадуур худалдаалагдаж байгаа зарим суулгац зориулалтын бус аргаар уулнаас шууд авчран үндсийг нь гэмтээж, хатаачихаад зарж байгаа харагддаг. Ийм мод ургах магадлал бараг үгүй юм. 

Явган зам тавих...
Хашаан доторх ногоон байгууламжаа хүний хөлд үрэгдүүлж, сүйдлэхгүйн тулд та явган хүний зам тавих нь нэн хэрэгтэй зүйлийн нэг. Ингэхдээ хөдөлгөөний урсгалаа оновчтой тооцох нь чухал. Мөн өндөр зардлаар нүсэр зам тавих шаардлагагүй. Аль болох хямд зардлаар, байгалийн чулуу, цөөн тооны плита, тоосго, сүүлийн үед ашиглагдах болсон нүхтэй хавтан байж болно. Хамгийн гол нь байгаль экологидоо ээлтэй байхаар замаа шийдэх нь зүйтэй юм. Чулуугаар барьсан уламжлалт зам ямар ч газар чимэг болдог. Хэрэв ийм замын хажуугаар жижиг бут эсвэл цэцэгс суулгавал тэрхүү гоо үзэмжийг хоёр дахин нэмэгдүүлэх нь гарцаагүй. Өөр нэг сонирхолтой хувилбар нь тэгшилж зассан болон байгалиас шууд авсан чулууны хослол. Мэдээж эвтэйхэн гэдэг үүднээс тэгш зассан гадаргуу нь замын ихэнхи хэсгийг эзлэх нь зүйтэй юм. Том, жигд, хавтгай чулуугаар хийсэн замыг ногоогоор чимнэ. Ялангуяа ийм замын хэсгүүдээр хөвд байвал илүү тохиромжтой. Эсвэл олон наст, тачир ургадаг цэцэгсийг сонгож болно. Эдгээр нь чулуудын хоорондох зайг нөхөж харагдуулдаг.


Ижил хэмжээтэй, гэхдээ өнгөний хувьд өөр өөр чулуугаар өөрийн төсөөллөөрөө хүссэн хээ хуарыг ч зам дээрээ гаргаж болно. Нөгөө талаар зөөлөн ногоон зүлгэнд шигдсэн мэт хийцтэй зам нь төрөлх байгалийн мэт таатай мэдрэмжийг төрүүлдэг. Замыг төлөвлөхдөө 2 үндсэн дүрэм байдаг. Нэгдүгээрт, хэрэв та байшиндаа хүрэх дөт замыг сонгохоор бол шулуун зам тавих хэрэгтэй. Эзэмшил талбай томтой эсвэл урт нарийн бол энэ дүрэм хамаарна. Харин бусад   тохиолдолд шулуун замаас татгалзаарай. Ингээд эцэст нь хэлэхэд, замынхаа хажуугаар жижигхэн дэнлүү өлгөхөө мартав. Байгаль орчинд ээлтэй, эрчим хүчний хэмнэлттэй буюу нарны зайгаар ажилладаг бол тун чиг хэрэгтэй. Ингэснээр өдөр нь чимэг болж, шөнө нь зуслангийн  байшин, хашааг тань гэрэлтүүлэх болно.

Байгалийн чимэглэлүүдээр гоёх нь ...
Зай муутай өрөө нь хүний зан байдалд сөрөг нөлөө үзүүлдэг болохыг Та мэдэх үү. Хэт их эд хогшил, элдэв зүйлс нь хүнд хаалттай, зайгүй, давчуу мэдрэмжийг төрүүлэхийн сацуу намхан тааз, байгалийн гэрэл муу, чөлөөт орон зайг дүүргэсэн эд хогшил, бүгчим халуун өрөө нь хүнд илүү ядаргаатай, бухимдангуй орчинг төрүүлдэг болохыг эрдэмтэд хэдийнэ тогтоосон. Иймээс зуслангийн байшин тань хамгийн түрүүнд саруулхан байх ёстойг анхаараарай. Түүний дараа өнгө гэрлийн хослолыг бодох хэрэгтэй. Мэдээж гол зүйл бол байгалийн гэрэл. Гэхдээ байгалийн гэрэл өөрийн найрлагаас хамаарч янз бүрийн гэрэлтэй орчинг бий болгодог. Жишээлбэл, шууд тусгал нь дулаан орчныг бий болгож, нар жаргах үед өнгө нь дотор орчинг хүйтэн харагдуулдаг. Нар мандах үед шаргал, улбар шар, заримдаа гал улаан харагддаг. Мөн цонхоор туссан байгалийн гэрлийн ойлтоос адилхан өнгөөр будсан биетүүд өөр харагдах тохиолдол бий. Учир нь, нарны тусгал цонхны ойр байсан модон дээр туссанаас ногоолог өнгөний нөлөөг авчирдаг гэсэн үг. Энэ бүхнээс хамаараад байшингийнхаа интерьерийн голлох өнгөө сонгоорой. Жишээлбэл, хойд, зүүн хойно, байруун хойшоо чиглэсэн цонхтой бол гэгээлэг өнгөөр ханаа чимэглэх нь нэн тохиромжтой. Харин өмнө зүгийн чиглэлтэй бол хүйтэндүү, гэрэл шингээгч өнгийг сонгох хэрэгтэй.

Хэрэв Та зуслангийн байшингаа минимализм хэв маягаар чимэглэсэн бол байгалийн чулууг ашиглахыг зөвлөж байна. Ингэхдээ гоёл чимэглэлийн бус харин гялалзсан, үл ялиг уйтгартайдуу гэмээр буюу элсэн чулуу, шифер шаргал, саарал байх ёстой. Харин зөөлөн ба барзгар боржин чулуу, гантиг чулуулаг нь сонгодог хэв маягийн хувьд тохиромжтой. Цагаан, гөлгөр чулуугаар нэг талын ханаа чимбэл өрөөг бүхэлд нь гэрэлтүүлэх бөгөөд гэрэлтүүлэгтэй хосолбол илүү гэрэл гэгээтэй орчинг бүрдүүлнэ. Харин гал тогооны хувьд байгалийн боржин чулуугаар хийсэн чулуун хавтанг сонгоорой. Энэ нь гоёмсог харагдуулахын зэрэгцээ өнгөө алдахгүй, дээр нь зураас үүсгэдэггүй гээд олон давуу талтай. Сүүлийн үед хиймэл чулуу нь төрөл бүрийн гоёл чимэглэлийн онцлогуудтай, суурилуулах, арчлахад хялбар болсон. Орчин үеийн дэвшилтэт технологийн үр өгөөжөөр янз бүрийн бүтэцтэй чулууг олж авах боломжтой бөгөөд гаднах нь байгалийн чулуунаас ялгах боломжгүй болсон. Нөгөө талаар хиймэл чулуу бат бөх, байгаль орчинд ээлтэй, аюулгүй байдалтай гэх мэтчилэн давуу тал их. Мөн чулууг суулгахдаа дүрэм журмыг нь зүй ёсоор нь баримталж ажиллавал танд 10 ба түүнээс олон жилийн баталгаа өгөх болно. Гэхдээ зарим зүйлсийг санаж авахад буруудахгүй. Тухайлбал, хиймэл чулуу нь өрөөний гэрэлтүүлгийг багасгадаг учраас нэмэлт гэрэлтүүлгийг заавал хийх хэрэгтэй. Мөн чимэглэх өрөө тань нь жижиг талбайтай бол тэр бүр ашиглахыг татгалзаарай. Цаашилбал, амьдралын баяр баясал, дулаан энерги бүрдүүлэхийн тулд амьд ургамал, цэцэгсийг байршуулахаа мартаж болохгүй.
 
Тав тух, амарч суух орчин...
Тохижилтын нэг чухал элемент нь архитектурын жижиг байгууламжууд юм.  Үүнд, сүүдрэвч, сандал, цэцгийн мандал, хашаа хашлага, бичил цөөрөм, усан оргилуур зэрэг орно. Эдгээрийг эв донжийг нь олоод гаднаа хийчихвэл ая тух нэмэгдэхээс гадна хашаа хорооны үзэмжинд чухал нөлөөтэй. Сүүдрэвч, сандал зэргийг цэвэр модоор хийх нь зүйтэй. Ямар ч төрлийн модоор сүүдрэвч хийж болох ч хамгийн чухал нь сайтар хатсан мод байх хэрэгтэй. Хатаасан модоор хийсэн зүйлс хэлбэрээ алдахгүй, удаан эдэлгээтэй. Гадна орчинд байх зориулалтаар хийсэн модоо  өнгөлөхдөө дотор зориулалтын лак бус гадна агаарын нөлөөлөлд тэсвэртэй модруугаа шингэж уусдаг  лазураар өнгөлөөрэй. Эцэст нь нэгэнт хийсэн тохижилтоо сэтгэл гаргаж байнга арчилж тордсоноор үргэлж сайхнаараа байж, танай гэр бүл, үр хүүхэд, ирсэн зочдод сэтгэл ханамж, тав тухыг бэлэглэх болно.
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.