Орон сууцны үнэ 0.4 хувиар буурчээ

Орон сууцны үнэ 0.4 хувиар буурчээ

Улаанбаатар хотын төвийн 6 дүүрэгт орон сууцны үнэ 2019 оны II улиралд 2010 оны эцсээс 81.7 хувиар өсөж, өмнөх оны мөн үеэс 0.3 хувиар, өмнөх улирлаас 0.4 хувиар тус тус буурсныг Статистикийн үндэсний хорооноос танилцуулж байна. Тодруулбал, орон сууцны үнэ өмнөх оны мөн үеэс Чингэлтэй дүүрэгт 0.2, Сүхбаатар дүүрэгт 0.5, Сонгинохайрхан, Баянгол дүүрэгт 0.6 хувиар тус бүр буурч, харин Баянзүрх дүүрэгт 0.4 хувь, Хан-Уул дүүрэгт 0.3 хувиар өссөн байна.



Өмнөх оны мөн үетэй харьцуулахад 2019 оны II улиралд 1970 оноос өмнө ашиглалтад оруулсан орон сууцны үнэ Хан-Уул, Баянгол, Чингэлтэй дүүрэгт 0.1 хувь, Баянзүрх, Сонгинохайрхан дүүрэгт 0.2 хувиар буурч, Сүхбаатар дүүрэгт өөрчлөлтгүй. 1970-2001 оны орон сууцны үнэ Баянгол, Сонгинохайрхан дүүрэгт 0.7 хувь, Сүхбаатар, Чингэлтэй дүүрэгт 0.3 хувь, Хан-Уул дүүрэгт 0.1 хувиар буурч, Баянзүрх дүүрэгт 1.1 хувиар өссөн байна. 2001 оноос хойш ашиглалтад оруулсан орон сууцны үнэ Баянзүрх, Баянгол дүүрэгт 0.5 хувь, Сүхбаатар дүүрэгт 0.9 хувиар буурч, Чингэлтэй дүүрэгт 0.1 хувь, Сонгинохайрхан дүүрэгт 0.3 хувь, Хан-Уул дүүрэгт 1.1 хувиар өсчээ. Өмнөх улиралтай харьцуулахад 1970 оноос өмнө ашиглалтад оруулсан орон сууцны үнэ 6 дүүрэгт өөрчлөлтгүй, 1970-2001 оны орон сууцных Чингэлтэй, Сүхбаатар,Сонгинохайрхан, Баянгол дүүрэгт 0.4-0.7 хувиар буурч, Баянзүрх дүүрэгт 0.1 хувиар өсөж, Хан-Уул дүүрэгт өөрчлөлтгүй. 2001 оноос хойш ашиглалтад оруулсан орон сууцны үнэ Баянгол, Сүхбаатар,Чингэлтэй, Баянзүрх дүүрэгт 0.4-0.7 хувиар буурч, Сонгинохайрхан дүүрэгт 0.1 хувь, Хан-Уул дүүрэгт 1.0 хувиар өссөн байна.
Аж үйлдвэрийн салбарын үйлдвэрлэгчийн үнийн индекс 2019 оны 6 дугаар сард урьдчилсан гүйцэтгэлээр 137.5 хувь болж, үйлдвэрлэгчийн үнэ өмнөх сараас 5.9 хувиар өсөж, харин өмнөх оны мөн үеэс 3.1 хувиар буурсан байна. Тус салбарын үйлдвэрлэгчийн үнэ 2019 оны 6 дугаар сард өмнөх сараас 5.9 хувиар өсөхөд уул уурхай, олборлолтын дэд салбарын үйлдвэрлэгчийн үнэ 6.7 хувь (металлын хүдэр олборлолтынх 17.5 хувь), цахилгаан, хий, уур, агааржуулалтын дэд салбарынх 8.9 хувиар өссөн нь голлон нөлөөлжээ.


Харин салбарын нийт үйлдвэрлэл 2019 оны эхний хагас жилд урьдчилсан гүйцэтгэлээр 8.4 их наяд төгрөгт хүрч, өмнөх оны мөн үеэс 940.5 (12.6%) тэрбум төгрөгөөр өсчээ. Үүнд уул уурхай, олборлох аж үйлдвэрийн нийт үйлдвэрлэл өмнөх оны мөн үеэс 721.8 (13.6%) тэрбум төгрөгөөр, үүнээс нүүрс олборлолт 682.8 (35.1%) тэрбум төгрөг, металлын хүдэр олборлолт 54.7 (2.0%) тэрбум төгрөгөөр тус тус өссөн нь голлон нөлөөлсөн байна. Оны эхний  хагас жилд өмнөх оны мөн үеэс зэсийн баяжмал, нүүрс, цайрын баяжмал, хайлуур жонш,төмрийн хүдэр зэрэг гол нэр төрлийн бүтээгдэхүүний олборлолт 4.8-48.8 хувь, боловсруулах аж үйлдвэрийн салбарт зүсмэл материал, вакуум цонх, хаалга, барилгын модон хаалга, цонх зэрэг гол нэр төрлийн бүтээгдэхүүний үйлдвэрлэл 1.3-2.1 дахин өссөн байна.



Аж үйлдвэрийн салбарын борлуулсан бүтээгдэхүүн 2019 оны эхний хагас жилд урьдчилсан гүйцэтгэлээр 10.1 их наяд төгрөгт хүрч, өмнөх оны мөн үеэс 1.5 (16.7%) их наяд төгрөгөөр өсчээ. Нийт борлуулсан бүтээгдэхүүний 7.3 их наяд төгрөг буюу 72.4 хувийг гадаад зах зээлд борлуулсан байна.
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.