ГЗБГЗЗ салбараас анхны Монгол улсын хөдөлмөрийн баатар төрлөө

ГЗБГЗЗ  салбараас анхны Монгол улсын хөдөлмөрийн баатар төрлөө
Монгол Улсын гавъяат барилгачин Баатарын Рагчааг монгол орны нутаг дэвсгэрийг зурагжуулах ажилд оруулсан хувь нэмрийг төр засгаас өндрөөр үнэлж, Тулгар төрийн 2228, Их Монгол Улсын 813, Ардын хувьсгалын 98 жилийн ой, Үндэсний их баяр наадмыг тохиолдуулан Ерөнхийлөгчийн зарлигаар Монгол Улсын Хөдөлмөрийн баатар цол олголоо.
Хөдөлмөрийн баатар Б.Рагчааг Барилга, хот байгуулалтын дэд сайд Б.Мөнхбаатар, Төрийн захиргааны удирдлагын газрын дарга Д.Баярсайхан, Газар зохион байгуулалт, геодези, зураг зүйн газрын дарга Ц.Ганхүү, Барилгын салбарын ахмадын зөвлөлийн дарга, Монгол Улсын гавьяат барилгачин Л.Тогтохбаяр, яам, агентлагийн удирдлагууд хүлээн авч хүндэтгэл үзүүллээ.
Хөдөлмөрийн баатар Б.Рагчаа нь 1951 онд ажлын гараагаа Энхтолгойн сангийн аж ахуйн нутаг Сэлэнгэ голын хөндийн, Борнуурын сангийн аж ахуйн ногооны талбайн, Батсүмбэрийн сангийн аж ахуйн нутаг Сөгнөгөр, Үлдэгийн амны 1:1000-1:5000-ны масштабтай байр зүйн зураг зохиох ажлаар эхэлж байгаад Москва хотын Газар зохион байгуулалтын дээд сургуулийг 1959 онд төгсөж ирээд Улсын геодези, зураг зүйн салбарыг үүсгэн байгуулсан бөгөөд  Монгол орныг зурагжуулах, геодези, зураг зүйн салбарыг хөгжүүлэх их үйлсэд үнэтэй хувь нэмэр оруулсан.  Тэрээр Монгол улсын баруун, зүүн, хойд, урд захын цэгүүд Хүйтэн уул болон зарим томоохон уул болох Мөнххайрхан уул, Хүйтний оргил, Малчин уул, Түргэн уул, Хархираа, Сута уул, Цаст уул, Цамбагарав зэрэг 9 уулын өндрийг геодезийн аргаар тодорхойлж 1982 онд “Уулын спортын мастер” болсон байна.


БНМАУ-ын Сайд нарын зөвлөлийн 1979 оны 12-р сарын 19-ний өдрийн 334 дугаар тогтоолоор 1:100000-ны масштабтай байр зүйн зургийг 1979-1985 оны хооронд шинэчлэн нийт нутаг дэвсгэрийг хамарсан хамгийн том масштабын зургийг монгол хэл зохиож, хэвлэсэнийг одоог хүртэл ашиглаж байна.
Монгол улсын Хөдөлмөрийн баатар Б.Рагчаа нь улсад 51 жил ажиллахдаа Геодези, зураг зүй, газар зохион байгуулалтын салбарын хөгжил болон Монгол улсын тусгаар тогтнол, эрх чөлөө, нутаг дэвсгэрийн бүрэн бүтэн байдлыг хамгаалахаар 8252 км бүхий улсын хилийг тогтоох, монгол орны нутаг дэвсгэрийг зурагжуулах, анхны үндэсний атласыг зохиож, хэвлүүлэх ажлыг гардан зохион байгуулан ажилласан байна.


Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.