Та орон сууцандаа засвар хийх гэж байгаа бол...

Та орон сууцандаа засвар хийх гэж байгаа бол...

Материалаа зөв сонгох нь чухал- Будгийн хаяглалт юу өгүүлдэг вэ
Орон байранд тань гэрэл гэгээ нэмж, өнгө оруулж гоёмсог харагдуулдаг заслын ажлын үндсэн материалын нэг нь будаг тул будаг, будалтын материалаа зөв сонгох нь хамгийн чухал юм. Будаг, будалтын материал нь гадаргуугийн тоосжилтыг багасгах, бохирдолт, зэврэлт, ялзралт, өгөршилт зэрэг орчны үйлчлэлээс хамгаалах үүрэгтэй ба барилгын архитектурын өнгө төрхийг илэрхийлдэг, ашиглагдах хугацааг уртасгаж, өрөө тасалгааны ариун цэвэр, эрүүл ахуйн нөхцлийг сайжруулах бөгөөд аливаа материалыг галд болон гаднын нөлөөнд тэсвэртэй болгоно. 
Будгийн найрлага нь олон бүрэлдэхүүнт хольц бүхий өнгө өгөгч хуурай будгийн зүйл, дүүргэгч, холбогч болон дагалт эрдэс бодисуудаас бүрдэх ба эдгээр нь тодорхой үүрэгтэйгээр орно. 
Холбогч буюу хальс үүсгэгч бодис нь будсан гадаргууг бат бэх болгох, будгийн нимгэн хальс үүсгэх, өнгө өгөгч хуурай будгийн зүйл болон бусад эрдэс бодисуудыг хооронд нь барьцалдуулах үүрэгтэй. Холбогч нь будгийн найрлагад тунгалаг байдал, нягт чанар, гадаргууд барьцалдах чанар, хаталтын хугацаа, хатуулаг чанар, өнгөний байдалд нөлөөлнө. Холбогч бодисын төрөлд цавуу, цийдэм, казейн цавуу, шохой, шингэн шил, полимер, олиф, лак зэрэг багтана. Будгийг ихэвчлэн холбогчийн төрлөөр нь нэрлэх ба  будгийг зөв сонгохын тулд түүний ангилалыг сайн мэдэх хэрэгтэй. 

  1. Цавуун будаг-Амьтны ба ургамлын, химийн цавууны 5%-ийн уусмалаар бэлдэнэ. 
  2. Эмульсэн будаг-Ус тосны найрлагатай химийн цавуу
  3. Силикат будаг-Цахиур хүчлийн калийн уусмалаар найруулсан
  4. Шохойн будаг-Шохойн холбогчоор найруулсан
  5. Тосон будаг- Ургамлын тосноос болон химийн аргаар гаргаж авсан олифоор найруулсан шороон будаг
  6. Лакан будаг-Зөвхөн уусгагчаар шингэлсэн лак
  7. Эмаль-Өнгөт бодис оролцсон лакаар найруулсан будаг гэх мэт ангилна. 

Будгийг найрлагаас нь хамааруулж усан ба усгүй /тосон/, полимер будаг гэж ангилна. Усаар шингэлж найруулдаг бүх төрлийн будгийг усан будаг, харин олиф, лакаар найруулвал усгүй /тосон/ будаг, төрөл бүрийн химийн холбогч бодисууд оролцсон байвал полимер будаг гэж үзнэ. 
Ашиглалтын нөхцлөөс хамааруулан гадна ба дотор зориулалттай будаг гэж ангилна. 
Гадна зориулалттай будаг нь барилгын фасад, хашаа, гадна хаалга, гадна тохижилтын архитектурын элементүүдийг будахад зориулагдана. Энэ будаг нь барилгад гоосайханы болон үзэмжийн өнгө нэмэхээс гадна гадаргууг гадны атмосферийн нөлөөнөөс /ус, тоос шороо, нарны туяа, ультра ягаан туяа/ болон бактериас хамгаална. Фасадны будгийн сонголтонд анхаарах гол зүйл нь химийн найрлага ба энэ нь будгийн чанарт их нөлөөтэй. 
Дотор зориулалтын будаг нь хүний эрүүл мэндэд харшлахгүй бүрэлдхүүнтэй байх ба ариун цэврийн өрөө, саун, бассейн зэрэг ус чийгтэй орчинд тусгай зориулалтын будгийг хэрэглэх нь тохиромжтой.  
Манай улсад будгийн үйлдвэрлэл төдийлөн хөгжөөгүй дийлэнх хэсгийг импортоор хангаж байна. ОХУ, БНХАУ, Солонгос, Герман, Польш, Финлянд зэрэг улсад үйлдвэрлэгдсэн будаг будалтын материалыг барилгад өргөнөөр хэрэглэж байна. 
Будаг, будалтын материалыг таних, зөв сонгохын тулд түүний хаяглалт, тэмдэглэгээг мэддэг байх ёстой. 

ОХУ-д үйлдвэрлэгдсэн будгийн тэмдэглэгээ:
Орчин үеийн технологиор үйлдвэрлэгдэж байгаа будгийн найрлага нь төрөл бүрийн химийн бодисуудын нэгдлээс бүрдэж байна. Будгийн бүрэлдэхүүн хэсгийг заасан тэмдэглэгээнээс түүний хэрэглэх хүрээ, төрөл, зориулалт, шинж чанарын үзүүлэлтүүдийг мэдэж болно. 
ОХУ-ын стандартаар лак, будалтын материалын марклалт буюу тэмдэглэгээг үсгэн, тоон цифрээр хийх ба будаг, эмаль, хөрсжүүлэг, тэгшилгээний шаваасан /замаска/ материалын тэмдэглэгээ 5, лакных 4 хэсгээс бүрддэг ба дараах агуулгыг багтаадаг. 

I-  Лак, будалтын материалын нэрийг заах ба бүтэн үгээр бичигдэнэ. Жишээ нь: эмаль, лак, краска /будаг/, грунтовка /хөрсжүүлэг/ гэх мэт.
II- Будгийн найрлагад ордог будгийн хальс үүсгэх, барьцалдуулах үндсэн холбогч бодис болох давирхай, полимер, олифийн химийн найрлагыг  дор дурьдсан товчилсон 2 үсгээр заадаг.

АД – полиамид; АК – полиакрилат; АУ – алкидно-уретан; АС – полимер полиакрил; АЦ – ацетилцеллюлоз; БТ – битум; ВА – поливинилацетат; ВН – винил ба винилацетат; ВС — полимер поливинилацетат; ГФ – глифталевний давирхай; ЖС – силикат; КФ – канифоль; КО – кремний органик  давирхай; КЧ – каучук; МА -тосон будаг; МЛ – меламиноалкид; НЦ – нитроцеллюлоз; ПФ – пентафталевийн давирхай; УР – полиуретан; ФА – фенолоалкид; ХВ – хлорвинил; ШЛ – бүрхүүл; ЭП – эпоксидний давирхай; ЭЦ – этилцеллюлоз; ЯН – янтар давирхай. 

III- Үсгийн дараа орох эхний тоо нь хэрэглэх хүрээ, зориулалтыг заана. 
1- гадна зориулалттай /гаднын нөлөөнд тэсвэртэй/
2-дотор зориулалттай 
3-хамгаалалтын 
4-усанд тэсвэртэй 
5-эмаль
6-бензин тосонд тэсвэртэй
7-химийн бодист тэсвэртэй
8-дулаанд тэсвэртэй
9-цахилгаан тусгаарлах 
0- хөрсжүүлэгч, дэвсгэр будаг
00-шаваас /замаска/
Зарим тохиолдолд будгийн тэмдэглэгээнд тооны дараа будгийн онцлогийг үсгэн тэмдэглэгээгээр тэмдэглэсэн байдаг. ХС-хүйтэнд бэхжүүлэх,  ГС-халуунд бэхжүүлэх, ПН-бага шатамхай, НГ-шатдаггүй материал, М-бүрсгэр гадаргуу, ПМ-хагас бүрсгэр гадаргуу. 
IV-  Үйлдвэрлэгчийн код
V-   Лак, будалтын материалын өнгийг тус тус заасан байдаг.
Жишээ нь: Эмаль ПФ-218ХС белая /ПФ- пентафталын олифон суурьтай, 2-дотор зориулалттай, 18-үйлдвэрлэгчийн код, ХС-хүйтэнд бэхжүүлэх, белая-цагаан/
Эмульсийн тэмдэглэгээ: Эмульсийн үсгэн тэмдэглэгээ нь В-ус нэмж болно; ВЭ-усан цийдмэг /эмульс/; ВД-усны тархалттай гэх мэт байдаг. Эмульсэн будгийн давуу тал нь эдийн засгийн хэмнэлттэй, галын аюулгүй, экологийн өндөр түвшин, хэрэглээ өргөн байдаг.  Эмульсийг акриловын, поливинилацетатын, усан цийдмэг, усны тархалттай, силиконон и латексан эмульс гэж ангилдаг. Мөн усан ба тосон суурьтай байдаг. Эмульсэн будгийн савлагаанд тэмдэглэгээг заримдаа хийдэггүй ба будгийн саван дээр шинж чанарын үзүүлэлтүүдийг бичсэн байдаг. /суурь, хэрэглэх хүрээ/
Тосон будгийн тэмдэглэгээ: Тосон будгийн үндсэн холбогч нь олиф /маажин/ юм. Ургамлын тосыг /наранцэцэг, маалинга, олс/-ыг 200С буцалган нэрэх замаар боловсруулан олифийг гаргаж авна. Жинхэнэ олиф нь 100% ургамлын тос, харин зохиомол буюу оксоль олиф нь 55% тос, 45% уайт-спирт агуулсан байдаг бол хосолмол олиф нь 70% тос, 30% уайт-спирттэй үйлдвэрлэгдэнэ. 
Хосолмол олифыг глифталын, пентафталын, перхлорвинилийн /ПХВ/ гэж ангилна. Тосон будгийн ихэвчлэн МА гэсэн үсгэн тэмдэглэгээгээр тэмдэглэнэ. Эхний тоон цифр нь хэрэглэх хүрээг нь, сүүлийн 1-5 гэсэн тоон цифрт түүний холбогч бодис болох олифийн төрлийг оруулсан байдаг. 1- жинхэнэ олиф, 2- зохиомол /оксоль/ олиф, 3-глифталын, 4- пентафталын, 5-хосолмол олиф. 
Жишээ нь: Краска МА-15  /Краска-будаг, МА-тосон будаг, 1-гадна зориулалттай, 5-хосолмол олиф/


Будаг, будалтын материалыг сонгохдоо дараах зүйлийг анхаараарай

  1. Будах гадаргуугийн төрөл: Гадаргуугийн төрлөө тодорхойлж будгаа сонгох ба модон, металл, бетон, шавардлагатай, хуучин будагтай гадаргуу зэрэг сууринд зориулсан тэгшилгээний материал, хөрсжүүлэг, дэвсгэр будаг, өнгө  будаг нь нэг үйлдвэрлэгчийнх байвал будалт илүү чанартай болох ба тухайн гадаргуугийн төрөлд тохирсон будгийг авч хэрэглээрэй.

  2. Барилгын гадна, дотор зориулалтын аль нь эсэхийг сайн лавлаарай. Ашиглалтын нөхцлөөс хамааруулан дотор, гадна зориулалтын будгаа зөв сонгож аваарай. Дотор зориулалттай будгаар барилгын гадна талыг будаж болохгүйг анхаарна уу. ОХУ-д үйлдвэрлэгдсэн будагт “для наружных работ-гадна зориулалттай”, “для внутренных работ-дотор зориулалттай” гэсэн бичиглэл байдаг.

  3. Хийцийн төрөл: Фасад, дээвэр, шал, хана, металл, модон  хийцэд зориулагдсан будагнууд байдаг. Будах гэж буй хийцийн төрөл, овор хэмжээ, гадаргуун хэлбэрээс хамаарч будгаа сонгох нь зөв. 

  4. Савлагааны хэмжээ, орцын норм, зарцуулалт: Нэгж талбайд ямар хэмжээтэй будаг орох, эсвэл нэг сав будгаар хэдэн м2 талбайг будах зэрэг будгийн зарцуулалтыг мэдсэнээр будгийн хэмжээгээ зөв тооцоолж чадна. 

Жишээ нь: 

8-10м2/л- 1 л будгаар 8-10м2 талбайг будна.

1,9л≈7м2- 1,9л будгаар ойролцоогоор 7м2 талбайг будна.

110-120г/м2-1м2 талбайд нэг үеэр будахад 110-120грамм будаг орно. 

5л на 30-40м2- 5л будгаар 30-40м2 талбайг будна.

2,5л =3.75кг ≈ 15м2-2,5л будаг нь 3,75 кг-тай тэнцэнэ, ойролцоогоор 15 м2 талбай будна.

  1. Зааварчилгаа, тэмдэг тэмдэглэгээ: Будаг, будалтын материалын савалгаан дахь зааварчилгаа, тэмдэг тэмдэглэгээг нягталж үзээрэй. Будаг, будалтын материалын савлагаанаас хэрэглэх хүрээ, найрлага, шинж чанарын үзүүлэлт, хэрэглэх арга, зарцуулалт, хаталтын хугацаа, аюулгүй ажиллах арга, тээвэрлэлт хадгалалт, хэрэглэгчийн заавар, хог хаягдал зайлуулах арга зэрэг мэдээллийг англи, орос, үйлдвэрлэсэн орны хэл дээр харж болно. Мөн хэрэглэх хүрээ, ямар багаж ашиглах, орчны нөхцөл, зарцуулалт, аюулгүй ажиллагааны зааварчилгааг зурган тэмдэглэгээгээр тэмдэглэсэн байдаг. 

  2. Үнэр, будгийн бүрхэх чадвар чухал. Хамар цоргисон хурц үнэртэй будаг нь хүнд металлын агууламж ихтэй байдаг тул хүний эрүүл мэндэд хор нөлөөтэй байдаг. Нэгж талбайд орох будгийн орц бага байх тусам бүрхэх чадвар сайтай байна.  

  3. Будгийн савалгаа: Сав, савалгааны бүрэн бүтэн байдлыг сайн шалгах, үйлдвэрлэсэн огноо, хадгалах хугацаа, хэмжээ, хадгалалтын орчин нөхцөл үйлдвэрлэсэн орны нэр, стандартын дугаар, барааны код /баркод/, чанарын тэмдэг үйлдвэрийн будгийн саван дээр байдаг тул үүнийг сайн нягталж үзээрэй.  

Эх сурвалж: Барилга.МН

Сэтгэгдэл (1)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    matilda 1 сарын өмнө 197.234.221.188

    Сайн уу, ээж ээ Хүмүүсийн мөрөөдлийг биелүүлэх боломжийг олгохын тулд бид зээл олгодог санхүүгийн бүтэц юм. Хэрэв танд хувийн төсөл байгаа бол; эсвэл санхүүжилт хэрэгтэй. Хэрэв та сонирхож байгаа бол бидэнтэй холбоо бариарай. Зээл хүсч буй дүн болон эргэн төлөлтийн хугацааг бидэнд шууд хэлнэ үү. * 3,000 долларын эргэлтийн зээлд $ 15,000,000 * и-мэйл: matildalecoustre@gmail.com wathsapp: 0022 995 414 913