Шинэлэг мэдээлэл, шинэ судалгаа,онцгой зочинтой Барилга.мн сэтгүүл

Шинэлэг мэдээлэл, шинэ судалгаа,онцгой зочинтой Барилга.мн сэтгүүл

Барилгын салбарын ололт амжилт, тулгамдаж буй асуудал, бүтээн байгуулагчдынхаа хийж бүтээсэн ажлынх нь тухай нийтлэл, мэдээ мэдээллийг уншигчиддаа цаг алдалгүй хүргэж, дотоод, гадаадын хөгжил дэвшил, техник технологийн гайхалтай нээлт, интерьер, архитектурын онцгой содон шийдлүүд, салбартаа тэргүүлэгчдийн үзэл бодол, өгөөжтэй ярилцлагуудыг нийтэлдэг “Барилга.МН” сэтгүүлийн 110 дахь дугаар уншигч таны гар дээр очлоо. Энэ удаагийн дугаарт…

Дугаарын зочин

Сэтгүүлийн хоймор ярилцлаганд “Голомт констракшн” группийн ерөнхий захирал А.Ариунболд оролцлоо. Тэрээр ШУТИС - ийг 2003 онд Барилгын инженер мэргэжлээр төгсөөд Японы барилгын зураг төслийн “ХайБиг Монгол” компанид шалгалт өгч тэнцээд 2004 - 2006 онд  ажиллах хугацаандаа зураг төслийн инженерээс ахлах инженер хүртлээ дэвшин ажилласан байна. 2007 онд хувийн компаниа байгуулж, өдгөө “ГРУПП” болтлоо өргөжин хөгжжээ. Түүний салбартаа гаргасан ололт, амжилт, бүтээн байгуулалт, ирээдүйн зорилго мөн өнөөгийн барилгын салбарын тухай ямар санал, бодолтой явдаг талаар энэхүү  ярилцлагаас уншаарай. 

Мэргэшсэн инженерийн мэргэжлийн зөвлөмж “Хялбар хийцтэй зуны модон сууц” 


Зуны дэлгэр өдрүүд үргэлжилсээр.... энэ богинохон цаг хугацааг хотоос зайдуу, дуу чимээ багатай агаарын болон хөрсний бохирдолгүй газарт зуны жижиг модон сууц бариад гэр бүл, үр хүүхдүүдтэйгээ хамт өнгөрүүлэх хүсэлтэй иргэдэд зориулан хямдхан үнээр, авсаархан шийдэлтэй, хялбар баригдах модон сууцаа хэрхэн барих талаар зөвлөгөөг хүргэж байна. Төлөвлөлтөө хэрхэн хийх, материалаа хэрхэн сонгох, модон карказын угсралт хэрхэн хийх, суурь шал, хучилт дээврээ хэрхэн барих гэх мэт хэрэгцээт бүхий л мэдээлэл, зөвлөгөөг “Амины орон сууц” булангаас уншаарай. Мэргэшсэн инженерийн мэргэжлийн зөвлөмж танд тусална гэдэгт итгэлтэй байна. 

“Амжилтын эзэд” булангаар юуг хөндөв?
 

Барилгын салбартаа амжилтанд хүрсэн эрхмүүдийг онцлон урьж, өөрсдийн туршлага, ололт амжилт, салбартаа тулгарч буй асуудал, түүнийг хэрхэн шийдэх гарц гаргалгааны талаар харилцан ярилцдаг “Амжилтын эзэд” дуэль ярилцлагын энэ удаагийн дугаарт “Эдшил” ХХК - ий захирал, архитектор Ө.Ганболд, “New Urbanism” ХХК -ий захирал, хот төлөвлөгч З.Туяа нар оролцлоо. Тэдний ярилцлагаас хот төлөвлөлтийн шатанд бид юун дээр алдсан, үүнээс болж үүсээд буй утаа, түгжрэл, хотын иргэдийн бухимдлыг хэрхэн шийдэх үү, нэгэнт замбараагүй зохион байгуулалттай болсон хотыг хэрхэн дахин төлөвлөх гарц гаргалгааны талаар сонирхолтой яриаг энэхүү ярилцлагаас уншаарай. 

Судалгаа 

Улаанбаатар хотын төвийн 6 дүүргийн хэмжээнд барилгын салбарт үйл ажиллагаа явуулж буй “Бичил, жижиг, дунд үйлдвэрлэл эрхлэгч буюу бригадууд” (цаашид БЖДҮЭ буюу бригад гэх)-ын ажлын туршлага, мэргэжлийн чадавхи, эдийн засгийн үзүүлэлт, ажиллах хүчний цогц мэдээллийг багтаасан сонирхолтой судалгааг энэхүү булангаас сонирхоорой. Өмнөх дугаарт бригадуудын үйл ажиллагааны чиглэл, ажилласан туршлага, үндсэн гишүүдийн тоо, бригадуудын жилийн орлого, тэдэнд тохиолддог бэрхшээл, ямар сургалтанд хамрагдах талаар сонирхолтой судалгаа мэдээллийг танилцуулсан. Харин энэ удаад бригадуудын үйл ажиллагаа идэвхтэй явагддаг сар, гишүүдийн харьяалал, ажлын цалин хөлсөө тогтмол авдаг эсэх буюу сүүлийн 3 жилийн хугацаанд ажлынхаа хөлсийг авч чадаагүй тохиолд хэр гарсан гэх мэт судалгааг хүргэж байна.  

Цаг үеийн тодруулга 

Сүүлийн үед ипотекийн зээлийн санхүүжилт Монголбанкнаас орж ирээгүй гэсэн үндэслэлээр банкууд зээл олгохгүй байна гэсэн мэдээлэл иргэдийн дунд үүсээд байсан. Тиймээс энэ талаар Монголбанкны Олон нийтийн боловсрол, мэдээллийн төвийн хэвлэлийн албаны ахлах мэргэжилтэн Д.Ариунаа болон бусад банкны ажилтнуудаас тодруулга авч, уншигч танд хүргэж байна. 

Ипотекийн 8 хувийн зээлд зориулан 2019 оны эхний 6 сарын байдлаар 210 тэрбум төгрөгийн санхүүжилтийг 3000 орчим зээлдэгчдэд олгосон байна. Үүнээс Монголбанкны эх үүсвэрээс 95  тэрбум төгрөгийн санхүүжилтийг 1,294 иргэнд, Засгийн газрын эх үүсвэрээс 55 тэрбум төгрөгийн санхүүжилтийг 882 иргэнд, банкууд өөрийн эх үүсвэрээс 60 тэрбум төгрөгийн санхүүжилтийг 761 иргэнд олгожээ. Цаашид дээрх 3 төрлийн эх үүсвэрээс он дуустал сар бүр тогтмол 36 тэрбум төгрөгийн санхүүжилтийг орон сууцны зээлд зориулан олгох юм. Энэ талаарх илүү дэлгэрэнгүй мэдээллийг сэтгүүлийн шинэ дугаараас уншиж танилцаарай. 

Шинэ орон сууцны үнэ ханш, зах зээл, захиалгын байдал 
 

Улаанбаатар хотод өнөөдрийн байдлаар нийт 54 841  айлын 409 шинэ орон сууцны төсөл хэрэгжиж байгаа бөгөөд захиалга авч буй 31.972 айлын 241 төсөл байна. Үүнээс Баянзүрх дүүрэгт 10 444, Хан - Уул дүүрэгт 10 893, Баянгол дүүрэгт 4298, Сонгинохайрхан дүүрэгт 1842, Сүхбаатар дүүрэгт 2132, Налайхад 504, Чингэлтэй дүүрэгт 207 айлын орон сууц захиалга авч байна. Үүний зэрэгцээ дүүрэг тус бүрээр төрөлжүүлэн 2019 оны 6 дугаар сарын 28 -ны байдлаар гаргасан шинэ орон сууцны үнэ ханшны талаарх судалгааг эндээс олж мэдээрэй. Үүний зэрэгцээ портландцемент, тоосго, блок, арматур, бетон зуурмаг, модон материал, галд тэсвэртэй хөөсөн полистирол хавтан, цонх хаалга, элс хайрга, будаг эмульс гээд барилгын бүхий л материалын үнэ ханшийг мөн өдрийн байдлаар танилцуулж байна. Та бүхний ажилд судалгаа, тооцоо, төсвөө гаргахад тус болно гэдэгт бид итгэлтэй байна.

Архитектур 
 

Дэлхий нийтээрээ ногоон байгууламжийг хайрлан хамгаалж, нэмэгдүүлэх замаар цөлжилт, дэлхийн дулаарал, агаарын бохирдлын эсрэг тэмцэж эхлээд багагүй хугацаа өнгөрч байна. Тиймээс гүн ногоон өнгөөр хучигдаж, цэвэр агаарын эх уурхай болсон дэлхийн хамгийн ногоон, эко хотын жагсаалтыг гаргах болсон билээ. Энэ удаагийн “архитектур” булангаараа “2019 оны дэлхийн хамгийн ногоон хот” - ыг танилцуулж байна. Дэлхийн жишиг болсон эдгээр хотууд хэрхэн агаарын бохирдол, хог хаягдлаасаа салсан талаарх сонирхолтой мэдээллийг эндээс олж мэдээрэй. Улаанбаатар хотынхоо ногоон байгууламжийг нэмэгдүүлэх хүсэл, тэмүүллийг танд өгөх болно.  
 



Сэтгүүл захиалах

 


 

Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.