Түрээсийн орон сууцанд хамрагдах иргэдийг долдугаар сарын 22-ноос бүртгэнэ

Түрээсийн орон сууцанд хамрагдах иргэдийг долдугаар сарын 22-ноос бүртгэнэ
Засгийн газрын хуралдаанаар Буянт - Ухаа II хорооллын 972 айлын орон сууцыг түрээслэх шийдвэр гарч, хэзээнээс бүртгэх, ямар шалгуураар хамрагдах боломжтой талаар иргэдийн дунд хүлээлт үүсээд байсан билээ.
Энэ тухай НОСК -ийн албаны хүнээс тодруулахад, “Түрээсийн орон сууцанд хамруулах журам” - ыг долдугаар сарын 2-нд тэргүүлэгчдийн хурлаар батлуулж, дараа нь хууль зүйн яаманд дахин шалгуулж, батлуулна. Тиймээс долдугаар сарын 22- ноос иргэдийг цахимаар бүртгэж эхлэхээр төлөвлөөд байна. Албан ёсны бүртгэл эхлэхээс өмнө НОСК- ийн сайт руу нэвтэрч, мэдээллийн сан хэсэг рүү орж бүртгүүлээд жишиг анкет бөглөх боломжтой. Ингэснээр та хувийн ямар мэдээллээ, хэрхэн бичих талаар мэдэж авах боломжтой юм. Жишиг анкет бөглөсөн ч бүртгэл албан ёсоор эхлэх үед анкет автоматаар дахин шинэчлэгдэнэ гэдгийг анхаарах хэрэгтэй. Хэрвээ хэрхэн бүртгүүлэхээ мэдэхгүй байгаа бол харъяа дүүрэг, хороо дээрээ очоод лавлаж болно”  гэдгийг хэлсэн юм.
Одоогийн байдлаар “Буянт - Ухаа II” хорооллыг улсын комисс хүлээн аваагүй байгаа юм. Түрээсийн орон сууцнуудын 30 хувийг зорилтот бүлгийн иргэдэд өмчлүүлэхгүйгээр түрээслэж, 30 хувийг нь түрээслээд өмчлөх хэлбэрээр олгох бол үлдсэн 40 хувийг газар чөлөөлөлт, дахин төлөвлөлтөд хамрагдсан иргэдийн газрыг байраар сольж авах санал боловсруулжээ.
Зорилтот бүлэгт залуу гэр бүл, төрийн албан хаагч, хувийн байгууллагын ажиллагсад болон хувиараа хөдөлмөр эрхлэгч,18 хүртэлх насны дөрөв ба түүнээс дээш хүүхэдтэй гэр бүл,  өрх толгойлсон эцэг, эх, өндөр настны тэтгэвэр тогтоолгосон ахмад настан, хөгжлийн бэрхшээлтэй иргэн, түүнийг халамжилдаг гэр бүл, гамшиг аюулт үзэгдлийн улмаас орон гэргүй болсон иргэд хамрагдаж байгаа юм.
“Түрээслээд өмчлөх орон сууц” гэсэн ангилалд “Түрээслэгч нь түрээсийн төлбөрөөс гадна түрээслэж байгаа орон сууцны үнийг таван жил хүртэлх хугацаанд сар бүр хуваарийн дагуу хэсэгчлэн төлж, түрээсийн орон сууцаа худалдан өмчлөх” гэж зааж өгчээ. Өөрөөр хэлбэл, тухайн түрээслэсэн иргэн 5 хүртэл жилийн хугацаанд орон сууцны үнийг төлж барагдуулах юм байна.
“Газар чөлөөлөлт” гэсэн ангилалд нийслэлийн хэмжээнд баригдах дэд бүтэц, сургууль, цэцэрлэг зэрэг нийгмийн зорилготой төслүүдийн газар чөлөөлөлтөд хамрагдах иргэд болон бусад томоохон төслийн газар чөлөөлөлтөд өртсөн иргэдийг зохих хууль, журмын дагуу хамруулна хэмээн тусгаж өгчээ.
Бүртгүүлсэн иргэдийг сонгон шалгаруулалт эсвэл сугалаагаар сонгох уу гэдгийг Нийслэлийн Засаг Даргын зөвлөл хуралдаж шийдвэрлэх юм. Хэрвээ сонгон шалгаруулалт хийвэл олон нийтийн өмнө нээлттэй, ил тодоор явагдах бөгөөд ямар нэгэн хахууль, танил талаа хамруулах асуудал үүсгэхгүй байхаар зохион байгуулах аж. Хамгийн түрүүнд нэн шаардлагатай айлуудыг хамруулахаар төлөвлөсөн байна.
Цаашид НОСК - оос орлогод нийцсэн ногоон орон сууц хөтөлбөрийг хэрэгжүүлж, төсвийн 570 сая доллар шаардлагатайгаас 270 сая гаруй долларыг бүрдүүлээд байгаа юм.
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.