Гадна тохижилт тав тухтай орчин

Гадна тохижилт тав тухтай орчин

Амины орон сууцыг гадна тохижилтыг төлөвлөж хийхдээ хүрээлэн буй орчин, байгаль цаг уурт нь тохируулан, тухайн байршлынхаа давуу талуудыг тодотгосон зураг төслөөр гүйцэтгэвэл оршин суугчдад илүү тав тухтай, стресс багатай орчныг бүрдүүлж өгдөг.

Газар зохион байгуулалт, төлөвлөлт

Төлөвлөж бодож хийсэн нь огт төлөвлөгөөгүй хийсэн зүйлээс ямагт илүү байдаг төдийгүй эдийн засгийн хувьд хэмнэлттэй байдаг. Ийм учраас юуны өмнө өөрийн байшингийн гадна тохижилтыг ямар байх талаар байшингаа барихаас  өмнө цаасан дээр буулгаж, төлөвлөх хэрэгтэй. Төлөвлөлтөнд нөлөө үзүүлэх зүйлүүд:

Газрын байршил-Таны байшин тэгш газар, мөн налуу, уул толгодын ойролцоо байж болно, үүнийг төлөвлөлтөнд анхаарах хэрэгтэй.
 

Эзэмшил газрын хэлбэр-Уламжлалт тэгш өнцөгт хэлбэртэй газарт төлөвлөлт хийхээс гадна гурвалжин, Г хэлбэрийн, дугуйрсан булантай ч байж болно.
 

Хөрсний төрөл-Хөрс олон төрөл боловч “ядуу” үржил шим муутай хөрсөнд мод зүлэг, ургамал сайн ургадаггүй тул үржил шим сайтай хөрсийг зөөж авчрах хэрэгтэй. 
 

Хөрсний усны түвшин-Хөрсний усны түвшингээс хамаарч  хөрсний усыг зайлуулах арга хэмжээ авах хэрэгтэй. 
 

Байгалийн гэрлийн тусгал-г тооцсоноор өдрийн турш нар их үзэх газарт амралтын бүсийг байршуулах нь чухал. Гадна тохижилтын төлөвлөлтөнд дараах бүсүүдийг тусгах нь зүйтэй. Үүнд, амьдрах бүс, амралтын бүс, цэцэрлэг ногоон байгууламжийн бүс, аж ахуйн бүс юм.
 

Төлөвлөхдөө газраа нарийн хэмжиж, зай талбайгаа тооцоолох нь зүйтэй. Ингэснээр таны хийх зүйлийн  хэмжээ гарах төдийгүй үнэ өртгийн багцаа бий болох юм. Хамгийн эхний зүйл бол эзэмшил газраа масштабаар төлөвлөх хэрэгтэй. Та мм-ийн цаасан дээр санаагаа буулган зурж болно. Жишээ нь: нэг метр - нэг эсвэл хоёр нүд байхаар төлөвлөнө. Хоёрдахь хувилбарт жижиг нарийн ширийн зүйлийг илүү нарийвчлан зурж төлөвлөгөөгөө гаргана. Төлөвлөгөөнд дараах зүйлийг зааж өгөх ёстой:

  • Гэрэл тусах талаас анхаарч төлөвлөх.
  • Одоо байгаа болон төлөвлөгдсөн барилгуудыг тусгах
  • Барилгын холбоо (сантехник, бохир, гэрэлтүүлэг)-г тооцох
  • Хаалга, зам хүртэлх зайг төлөвлөх
  • Тарих ургамлын жагсаалт гаргах
  • Ногооны талбай, цэцэрлэг төлөвлөсөн бол байрлалыг зөв сонгох
  • Хүүхдийн тоглоомын талбай, сүүдрэвч, сандал, цэцгийн мандал, хашаа хашлага, бичил цөөрөм, усан оргилуур зэрэг архитектурын элементүүдийг оруулах

Төлөвлөж байгаа хэсгээ мм-ийн цаас болон картон дээр тэмдэглэхээс гадна зураг, дүрслэл, төсөөллийг ашиглан харах зорилгоор макет хийж болно. Баримлын шавар,  хөөсөнцөр, савх мод гэх мэт гарын доорх материалыг ашиглаж болно. Аль болох жинхэнэтэй нь төстэй материал хэрэглэхийг хичээх хэрэгтэй. Нарны сүүдрэвчийг савх модоор, хувийн сууц болон бусад барилга байгууламжийг пенопласт буюу картоноор, вандан сандал, цөөрөм, усан оргилуур, мод, цэцэгсийг баримлын шавраар хийнэ.


Бүх зүйлийг өөрөө тооцоолоод хийж болох ч энэ чиглэлийн мэргэжлийн зураг төслийн компанид хандаж хийлгэвэл илүү тодорхой ойлгомжтой болно. Зургийн дагуу байшингаа барьж дуусаад газрын доорхи инженерийн байгууламж, шугам сүлжээгээ хийж дууссаны дараа гадна тохижилтын ажлаа эхлэх хэрэгтэй. Үүнд: Цэвэр бохир усны шугам, цахилгааны шугам, худаг, ус зайлуулах хоолой гэх мэт орох бөгөөд ингэх нь хийсэн зүйлээ эвдэж сүйтгэхгүй байх сайн талтай. 

 

2. Зам талбай, гэрэлтүүлэг



Төлөвлөгөөнд бүх зүйлийг тусгасны дараа  зам тавих, гэрэлтүүлгийн системийг хийж эхлэнэ. Яагаад эдгээр хоёр өөр системийг нэгэн зэрэг төлөвлөх хэрэгтэй вэ? Зам талбай нь ихэвчлэн гэрэл тусахаар байх шаардлагатай.

 

Замыг төлөвлөхдөө хоёр үндсэн дүрэм байдаг. Нэгдүгээрт, хэрэв та байшиндаа хүрэх дөт замыг сонгохоор бол шулуун зам тавьдаг. Эзэмшил талбай томтой эсвэл урт, нарийн бол энэ дүрэм хамаарна. Бусад бүх тохиолдолд шулуун замаас зайлсхийх хэрэгтэй. 


Тохижилтын ажлыг зам талбай тавихаас эхэлнэ. Зам хийх газрын доогуур инженерийн шугам сүлжээ хийх зорилгоор ухаад буцааж булсан газар бол уг газрыг дахин ухаж хөрсийг нь 30 см дутамд нягтруулан булах хэрэгтэй. Зам тавих газрын ургамлын үетэй өнгөн хөрсийг авч оронд нь хайрга дэвсэж өгвөл илүү бат бөх болдог. Хашаандаа зам тавих материал сүүлийн үед манайд харьцангуй сонголт ихтэй болсон. Үүнд: Бетоноор цутгах, асфальт, бетон цутгамал ба шахмал хавтан, байгалийн чулуун зам мөн бетоныг газар дээр нь хээ гаргаж хэвлэж, байгалийн чулуу мэт харагдуулдаг технологи ч нэвтрээд байна. Эдгээр материал нь бүгд өөрийн давуу болон сул талуудтай байдаг. Жишээ нь: Чулуугаар зам хийхэд бат бөх,  удаан эдэлгээтэй боловч бусад материалыг ашигласнаас харьцангуй үнэтэй болно. Бетоноор зам талбай хийхээр шийдсэн бол дулааны улиралд сайн чанарын буталж угаасан хайргаар цутгаж хийх хэрэгтэй. Хаа сайгүй зардаг голын шавартай хайргаар бетон цутгавал нэгээс хоёр жилийн дараа хагарч бутраад, нөр их хөдөлмөр үгүй болж мэднэ. Зарим явган замын бетон хавтан мөн адил хямд угаагаагүй хайргаар хийсэн бол хагарч бутардаг тул чанартай гадна тохижилтын материалыг зөвшөөрөлтэй үйлдвэрээс дагалдах чанарын гэрчилгээтэй нь сонгож аваарай. Замыг эвддэг хамгийн гол зүйл бол ус байдаг. Иймд зам тавихдаа бороо, цасны усыг хэрхэн зайлуулах талаар сайтар бодож, эдэлбэр газраас гадагш налуутай тооцоолох хэрэгтэй. Амины сууц барих газрын налуу 10-20 хувь байж болох ба ийм гадаргууд хэсэгчилж шаталсан зам гаргавал ашигтай.  Явган хүний замыг 30-60, 75-100см, автомашины замыг 2-2,5м өргөнтэй хийнэ.

Зам талбайгаа хийж дууссаны дараа гэрэлтүүлгээ суурилуулах хэрэгтэй. Гэрэлтүүлэг нь  зам талбайд зориулагдахаас гадна байшин болон бусад тохижилтыг гэрэлтүүлэхэд ашиглавал үдэш орой илүү гоёмсог  харагдуулж тав тух, сэтгэл ханамжийг нэмэгдүүлдэг. Харин гэрлээ сонгохдоо сүүлийн үеийн гадна цаг агаарын нөлөөнд тэсвэртэй лед гэрэлтүүлгийг сонговол эдийн засгийн хувьд ашигтай төдийгүй удаан эдэлгээтэй байдаг. 

 

3. Ногоон байгууламж

Дараагийн чухал ажил бол орчноо зүлэгжүүлэх, мод тарих. Зүлэг тарихаас өмнө модоо суулгах хэрэгтэй. Мод үржүүлгийн газраас модны нас өндрийг нь зөв сонгож аваарай. Мод үржүүлгийн газарт тарьсан навчит модыг 2,0-2,5м буюу 2-3 настайд нь, шилмүүст модыг 1,2-1,5м буюу 8-10насанд, төрөл бүрийн бут сөөгийг 1,0-1,2м ургах буюу 3-4 настайд нь тус тус шилжүүлэн суулгахад ашигтай. Мод сөөгийг башин барилга, зам талбайд хэт ойр суулгадаггүй ба модны хооронд нь 4-5м, бут сөөгийг 2,5-3,5м зайтай суулгах нь тохиромжтой. Манайд гадуур худалдаалагдаж байгаа зарим суулгац зориулалтын бус аргаар уулнаас шууд авчран, үндсийг нь гэмтээж, хатаачихаад зарж байгаа харагддаг. Ийм мод ургах магадлал бараг үгүй юм. Учир нь модны үндэс доторх нарийн хялгасан үндсүүд нь хатсан тохиолдолд хөрснөөс шим тэжээлээ авч чадахаа больдог. Хөрс муутай газарт зүлэг шинээр суулгана. Зүлэг шинээр тарихдаа юуны өмнө газрын өө сэвийг сайтар янзалж тэгшлэх хэрэгтэй. Мөн хөрсөнд байгаа хуучин ургамлын үндсийг авахад илүүдэхгүй. Энэ нь  зүлэг тарьсан газарт элдэв хогийн ургамал ургахаас сэргийлнэ. Манай орны нөхцөлд хүйтэнд тэсвэртэй олон наст зүлгийн үрийг сонгож, зааврын дагуу тарих хэрэгтэй. Түүнчлэн суулгах үр шинэ байх нь чухал. Ямар ч зүлгийн үр олон жил хадгалж, он дамжих тусам соёолох чадвараа алдаж, ургац нь 30-40 хувь буурдаг. Зүлгээ зааврын дагуу тарьсны дараа хөрсөө нягтруулж өгвөл хожим нь хүн явахад хонхойж эвдэрдэггүй сайн талтай.  
 

4. Архитектурын элементүүд

Гадна тохижилтын бас нэг чухал элемент нь архитектурын жижиг байгууламжууд юм.  Үүнд: Сүүдрэвч, сандал, цэцгийн мандал, хашаа хашлага, бичил цөөрөм, усан оргилуур зэрэг орно. Эдгээрийг донжийг нь олоод гаднаа хийчихвэл ая тух нэмэгдэхээс гадна хашаа хорооны үзэмжинд чухал нөлөөтэй. Сүүдрэвч, сандал зэргийг цэвэр модоор хийх нь зүйтэй. Ямар ч төрлийн модоор  сүүдрэвч хийж болох ч хамгийн чухал нь сайтар хатсан мод байх хэрэгтэй. Хатаасан модоор хийсэн зүйлс хэлбэрээ алдахгүй байх сайн талтай. Гадна орчинд байх зориулалтаар хийсэн модоо өнгөлөхдөө дотор зориулалтын лак бус гадна агаарын нөлөөнд тэсвэртэй модруугаа шингэж уусдаг лазураар өнгөлөөрэй. 



Уншигч та бүхэн "Амины орон сууцны шилдэг 100 загвар" каталогийг худалдаж авах бол "Номин"-гийн салбар дэлгүүрүүд болон "Интер ном", "Аз хур" "Мажестик" номын дэлгүүрийг зориорой. Мөн хот дотор ҮНЭГҮЙ ХҮРГЭЛТ - тэй. Хэрэв хөдөө орон нутагт амьдардаг бол "Монгол шуудан" болон "Түгээмэл шуудан" - гаар захиалан авах боломжтой гэдгийг дууулгахад таатай байна.

 

 

 
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.