“Тэнгэр баганадсан эко байгууламж”-ийн ялагчид тодорлоо

“Тэнгэр баганадсан эко байгууламж”-ийн ялагчид тодорлоо

2006 оноос “eVolo” архитектурын сэтгүүлээс зохион байгуулж эхэлсэн “Тэнгэр баганадсан эко байгууламж” олон улсын тэмцээний энэ жилийн ялагчид тодорсон байна. Нийт 478 төсөл оролцсон бөгөөд шагналт байранд 3 төсөл, тусгай байранд 27 төсөл шалгарчээ. Энэхүү тэмцээн нь хүрээлэн буй орчиндоо ээлтэй, хамгийн эко бүтээн байгуулалтын төслийг шалгаруулдаг юм байна. Уран зөгнөлт кинон дээрээс л хардаг өндөр технологийн барилгуудыг бодит болгох бүрэн боломжтой гэдгийг эдгээр төслүүд харуулж байгаа юм.



Тэмцээний нэгдүгээр байранд Сирбийн архитектор Марко Драгисивик /Marko Dragicevic/ - ийн  
Methanescraper”  хог дахин боловсруулах босоо үйлдвэрийн төсөл шалгарчээ. Цаг хугацаа өнгөрөх тусам Белград хотын хог хаягдал улам нэмэгдэж, тэр  хэрээр байгаль орчин бохирдож, хүмүүсийн амьдрах газар нутаг багассаар байна. Тиймээс хог дахин боловсруулах үйлдвэрийг бий болгож, түүнийгээ сэргээгдэх эрчим хүч гаргахад ашиглаж, байгаль орчин болон хүрээлэн буй орчноо эрүүл, цэвэр болгож хүний амьдрах таатай орчинг бий болгох зорилготой юм байна. 
Уг төслийг Белград хотын Данубе голын зүүн эрэг орчим хотын гуравдагч дүүрэг болгон хөгжүүлэх зорилготой ажээ. 


Харин удаах байранд Польшийн архитектор Klaudia Gołaszewska болон Marek Grodzicki хамтран загварыг нь гаргасан  “AIRSCRAPER” шалгарчээ. Энэ нь хүн ам ихтэй хот суурин газарт зориулагдсан агаар цэвэршүүлэх барилга юм. Хүн амын хэт нягтаршлаас болж нүүрсхүчлийн хийн ялгаруулалт ихсэж, үүнээс үүдэлтэй амьсгалын замын элдэв өвчин гарч, автомашины түгжрэл, утаа гэх мэт олон хүчин зүйлээс болж агаар ихээр бохирдож байна. Бээжин хот энэхүү асуудлын нэгэн тод жишээ бөгөөд агаарын бохирдлоос болж жилд 1 сая орчим хүн нас барж байгаа нь үнэхээр харамсалтай. Тиймээс энэ асуудлыг шийдэж болох архитектурын төслийг танилцуулсан байна.

Энэхүү барилга нь гадна орчноос агаарыг сорж, нарийн шүүлтүүрээр бохир агаарыг шүүж дотогш нэвтрүүлдэг байна. Энэ нь дотор агаарыг цэвэршүүлэхээс гадна хүрээлэн буй орчныхоо агаарын дулааны нөлөөг бууруулахад тусалдаг аж. Энэхүү байгууламж нь 800 м өндөр, 60 метр диаметртэй бөгөөд 3 төрлийн модулиас бүрджээ. Хамгийн доод хэсэгт агаарын хэрэглээний, дунд хэсэгт нарны эрчим хүчний, дээд хэсэгт ногоон цэцэрлэгт хүрээлэнгийн хэсэг байх юм. Эдгээр модулиуд тус бүртээ өөр өөрийн онцлог үүрэгтэй гэнэ.

Агаарын хэрэглээний модуль: PM10, PM2.5 тоосонцор гэх мэт орчны бохир агаарыг цуглуулан цэвэршүүлдэг. Энэхүү систем нь судалгаагаар бохир агаарыг 80 хүртэл хувь цэвэршүүлэх ажээ. 

Нарны эрчим хүчний модуль: Цамхагийн дунд хэсэгт нарны туяанд хамгийн их өртдөг. Тиймээс үүнийг ашиглан доороос ирж буй агаарын эргэлтийг сайжруулахад ашиглажээ. Өртөг ихтэй, механик агааржуулалтын тоног төхөөрөмжгүйгээр нарны эрчим хүчийг ашиглан энэхүү системийг ашиглах боломжтой юм.

Ногоон цэцэрлэгт хүрээлэн: Байгууламжийн 400 метрээс дээш байрладаг энэ хэсэгт оршин суугчид амьдрах бөгөөд утааны давхарга хүрэхгүй, маш нарийн шүүгдсэн цэвэр агаараар дүүрэн байх юм. Оршин суугчдыг эрүүл, сайхан орчинд амьдруулж, хүчилтөрөгчийн хэмжээг илүү цэвэр, хэвийн байлгах зорилгоор төрөл бүрийн ургамлыг тарих аж. Мөн нарны энерги сайн нэвтрэх учир хэрэгцээт витаминуудыг авах бүрэн боломжтой юм байна.

“Ирэх 15 жилд Бээжингийн хүн ам 30 хувиар өсөх тооцоо бий. Тиймээс мега хот буюу өндөр цамхаг барих шаардлагатай болно. Бид агаарын бохирдлыг бууруулахад туслахын зэрэгцээ эрүүл амьдрах орчинг бүрдүүлэх замаар гайхалтай шинэ бүтцийг нэвтрүүлэхийг зорьж байна” хэмээн төслийг санаачлагч хэлжээ.
 

Гуравдугаар байранд Zijian Wan, Xiaozhi Qi, and Yueya Liu нарын гаргасан Biosphere Skyscraper шалгарчээ. Энэхүү төсөл нь дархан цаазат газрын ан, амьтдыг хамгаалах зорилго бүхий эрдэм шинжилгээний байгууламж юм.

Цаг агаар, уур амьсгалын өөрчлөлтөөс болж байгаль дэлхий өөрчлөгдөх болсон. Иймээс хүн төрөлхтөн энэхүү өөрчлөлтийг хянахын тулд судалгаа шинжилгээний ажлыг хийж хэрэгжүүлсээр байна. Түүний нэг нь энэхүү төсөл бөгөөд хүн төрөлхтөний буруутай үйл ажиллагаанаас болж ан амьтад үрэгдэж байгаа тул нэн ховордож буй тэднийг хамгаалах эрдэм шинжилгээний хүрээлэн юм. Тодруулбал, энэхүү байгууламж нь нэн ховордсон ан, амьтдад тохирсон уур амьсгалыг бүрдүүлж өгсөн хүрээлэн бөгөөд жуулчдад нээлттэй байхаар зохион байгуулжээ.

Тусгай байранд орсон онцлог төслүүдээс

АНУ "Тэнгэр баганадсан эко байгууламж"


Өмнөд Солонгос "Туйлын мөсийг хайлахаас хамгаалах төв"


Веларус "Нүүрсхүчлийн хийг багасгаж, хүчилтөрөгч ялгаруулагч"


Польш "Далайн ус цэвэршүүлэгч"




 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.