Барилгын зураг төсөл дэх архитектур төлөвлөлтийн шаардлагыг хангуулах тухай зөвлөмж

Барилгын зураг төсөл дэх архитектур төлөвлөлтийн шаардлагыг хангуулах тухай зөвлөмж
Сүүлийн жилүүдэд барилгын компаниуд барилга, орон сууц барихдаа ногоон байгууламж, хүүхдийн тоглоомын талбай, автомашины зогсоол гэх мэт гадна талбайн тохижилтыг орхигдуулах болсон. Үүнээс үүдэн оршин суугчдын ажиллах, амьдрах орчин, аюулгүй байдал алдагдаж цаашлаад байгаль орчин, хүний эрүүл мэндэд сөрөг нөлөө үзүүлж байна. Тиймээс эдгээр нийтлэг зөрчил, дутагдлыг арилгах зорилгоор  барилгын хөрөнгө оруулагч, захиалагч, зураг төсөл зохиогч аж ахуйн нэгж, байгууллагуудад Мэргэжлийн хяналтын ерөнхий газраас дараах зөвлөмжийг гаргасан байна.  
Тодруулбал, б
арилгын (архитектур төлөвлөлт) зураг төслийн боловсруулалтын явцад Хот байгуулалтын тухай, Барилгын тухай хууль болон тэдгээртэй нийцүүлэн гаргасан норм, дүрэм, журам, стандартын холбогдох шаардлагуудыг хангахгүй нийтлэг зөрчил дутагдлууд жил бүр давтагдан илэрч байгаа аж. Иймд барилгын ажлын улирал эхэлж байгаатай холбогдуулан учирч болзошгүй эрсдэлээс урьдчилан сэргийлэх, зөрчлийг таслан зогсоох зорилгоор ийнхүү зөвлөмжийг гаргажээ. Үүнд:
  1. Барилгын зураг төсөл боловсруулах тусгай зөвшөөрлийн хүрээнд  барилгын зураг төсөл боловсруулах ажлыг гүйцэтгэх;
  2. Хөрөнгө оруулагч, захиалагч нь батлагдсан архитектур төлөвлөлтийн даалгаврын дагуу тухайн барилга байгууламжийн байршил, загвар зургийг боловсруулж батлуулах, байр зүйн дэвсгэр зураг, инженер геологийн дүгнэлт гаргуулах, техникийн нөхцөлийг авах ажлыг зохион байгуулах;
  3. Барилгын зураг төслийг боловсруулахдаа батлагдсан хот, суурин газрын ерөнхий төлөвлөгөө, хэсэгчилсэн ерөнхий төлөвлөгөөний шийдлүүд, олгогдсон газрын хэмжээ, зориулалттай уялдсан байх бөгөөд Хот байгуулалтын тухай хуулийн 12 дугаар зүйлийн 12.8, 12.6.3-д заасны дагуу барилгажих талбай нь тухайн төлөвлөлтөнд хамрагдсан газрын 70 хувиас илүүгүй, 30-аас доошгүй хувь нь цэцэрлэг, ногоон байгууламж, автомашины зогсоол байхаар төлөвлөх;
  4. Барилга байгууламжийн хоорондын болон гал тусгаарлах хамгаалалтын зай нь “Орон сууцны барилгын зураг төсөл төлөвлөлт” /БНбД 31-01-10/-ийн 4.18, заавал мөрдөх 4 дүгээр хавсралт, “Хот тосгоны төлөвлөлт барилгажилтын норм ба дүрэм” /БНбД 31.01.04/-ийн 2.11, заавал мөрдөх 4 дүгээр хавсралтын дагуу тогтоож төлөвлөх;
  5. Орон сууц, олон нийт, иргэний барилгын өрөө тасалгаанд нарны шууд тусгалын үргэлжлэх норматив хугацааг “Орон сууц, олон нийтийн барилга, сууцны барилгажилтын бүсийн нарын тусгалын (ээвэрлэлтийн) хангамж /БНбД 23-04-07/-ын дагуу тооцож төлөвлөх;
  6. Хөгжлийн бэрхшээлтэй иргэдийн хэрэгцээ, техникийн шаардлагыг Хот байгуулалтын тухай хуулийн 20 дугаар зүйл, Барилгын тухай хуулийн 11 дүгээр зүйлийн 11.1.6, 12 дугаар зүйлийн 12.1.6, 15 дугаар зүйлд заасны дагуу хангаж төлөвлөх;
  7. Орон сууц, олон нийтийн барилга болон үйлдвэрийн туслах барилгын доторхи тусгаарлах бүтээцийн дуу тусгаарлах арга хэмжээг барилгад “Дуу чимээ тусгаарлалт” /БНбД 23-05-10/-ын дагуу тооцож төлөвлөх;
  8. Орон сууцны барилгын цахилгаан шатыг унтлагын өрөөний ханатай зэрэгцээ байрлуулахгүйгээр төлөвлөх ба бусад өрөө тасалгаатай зэрэгцээ төлөвлөх тохиолдолд “Дуу чимээ тусгаарлалт” /БНбД 23-05-10/-ын дагуу дуу чимээ тусгаарлах хийцлэлийн арга хэмжээ авах;
  9. Олон нийтийн барилгад цахилгаан шатны ба түүний төхөөрөмжийн өрөө болон шатны хонгилыг сургуулийн өмнөх насны хүүхдийн өрөө, сургалтын байгууллагын анги, танхим, олон нийтийн барилгад байрлах сууцны өрөө, үзвэрийн танхим, уншлагын танхим, клубын өрөө тасалгаа, тогтмол хүнтэй байдаг өрөөнүүдтэй шууд тулгаж байрлуулахгүйгээр төлөвлөх;
  10. Барилга байгууламжийн зураг төсөлд (архитектур төлөвлөлт) захиалагчийн зүгээс өөрчлөлт оруулахдаа барилга байгууламжийн норм, нормативын баримт бичигт тавих чанар, аюулгүй байдлын шаардлагад нийцсэн тохиолдолд зөвшөөрч, баталгаажуулах;
  11. Барилгын хөрөнгө оруулагч, захиалагч аж ахуйн нэгж, байгууллага, иргэн нь эрх бүхий байгууллагаар батлагдаж, магадлалаар хянагдсан зураг төслийн дагуу барилгын ажлыг гүйцэтгүүлэх;
  12. Барилгын угсралтын явцад захиалагч, зураг төсөл зохиогч аж ахуйн нэгж, байгууллага нь “Барилгын ажлын захиалагчийн дүрэм”, “Барилгын ажилд зураг төсөл зохиогчийн хяналт тавих дүрэм”-ийн дагуу хяналт шалгалтыг тогмолжуулах, эдгээр шалгалтаар илэрсэн зөрчил дутадлыг бүрэн арилгуулж хэвших:
  13. Барилгын хөрөнгө оруулагч, захиалагч, зураг төсөл зохиогч аж ахуйн нэгж, байгууллага нь Хот байгуулалтын тухай, Барилгын  тухай хуулиуд болон салбарын бусад хууль эрх зүйн актуудыг мөрдөж, хуулиар хүлээсэн эрх, үүргийн хэрэгжилтийг хангаж ажиллахыг зөвлөж байна.
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.