Д.Баттөр: Барилгачин хүний гар хурдан, нүд нь хурц, хөл нь бат байх ёстой

Д.Баттөр: Барилгачин хүний гар хурдан, нүд нь хурц, хөл нь бат байх ёстой
“Жигүүр Гранд” групп энэ өдрүүдэд 30 жилийн ойгоо тэмдэглэн өнгөрүүлж байна. Иймээс группийг үүсгэн байгуулагч, Монгол Улсын гавъяат барилгачин Д.Баттөрийг “Дугаарын зочин” буландаа урьж оролцуулж байна. Хэвлэлд тэр бүр ярилцлага өгөөд байдаггүй, дээр нь тэр бүр олддоггүй, завгүй энэ эрхэмтэй уулзаж барилгын салбарт анх хөл тавьсан тэр үеийн дурсамжаас нь эхлээд өнөөдрийн энэ амжилтанд хүрсэн талаар болон барилгын салбарын хөгжил дэвшил, өнөөгийн нөхцөл байдал гээд өргөн сэдвийн хүрээнд илэн далангүй ярилцсанаа уншигчдадаа дэлгэж байна. 

            -“Жигүүр Гранд” компанийн үндэс суурь хэрхэн тавигдсан талаар ярилцлагаа эхлэх үү. Хийж хэрэгжүүлсэн, бүтээн босгосон их ажлуудаа эргээд нэг харахад алдаа оноо, амжилт бүтээл хэр байв. Энэ талаар ярихгүй юу?

-Хоршооллын хөдөлгөөн үүсгэн байгуулагдсан тэр цаг үетэй “Жигүүр Гранд” компаний үндэс суурь эхтэй. Тодруулбал 1980-аад оны сүүл, 1990-иэд оны эхээр зах зээлийн нийгэмд шилжих үед хоршооллууд Монголд үүсэн хөгжиж ирсэн. Тэдгээрийн анхдагчуудын нэг нь “Жигүүр” хоршоо юм. Анх үйл ажиллагаагаа хэвлэл, худалдаа, нийтийн хоолны чиглэлээр эхлүүлж байсан. Байгуулагдаад жил хүрэхгүй хугацааны дараа улс орны нийгэм, эдийн засгийн байдалд өөрчлөлт орсонтой зэрэгцэн үйл ажиллагааны чиглэлдээ өөрчлөлт оруулах зайлшгүй шаардлага бий болсон. Тодруулбал хууль, эрх зүйн орчин гэрэл, гэгээтэй болохын зэрэгцээгээр бизнесийн салбарт илүү чөлөөтэй, өөрөөр сэтгэж үйл ажиллагаагаа өргөжүүлэх боломж, бололцоо нээгдэж эхэлсэн. Энэ ч үүднээс өөрийн бизнесээ өргөжүүлж, сайжруулахын тулд багагүй хугацаанд судалгаа, шинжилгээ хийсний дүнд өөрийн дур сонирхолтой салбартаа чиглэн ажиллах нь илүү үр дүнтэй юм байна гэдгийг ойлгосон. Азтай ч гэх үү тухайн бүтээн босголтын ид үед бүх салбар нээлттэй орчин нь сайхан болж эхэлсэн үе. Ингээд барилгын салбарт хөл тавьж эхэлсэн дээ. Өнгөрсөн 30 жилийн ажил, амьдралаа эргээд нэг харахад зөвхөн миний хувьд ч биш Монголын барилгачид бүгд энэ хугацаанд алдаа, оноо, хүнд даваа, нугачаатай замыг их туулж иржээ. Эдгээр нь бидэнд сургамж өгөхийн зэрэгцээ гэгээн сайхан дурсамж, салбарын хөгжлийн нэлээдгүй үндэс суурыг тавьж өгч чадсан байх. Одоо манай компани зөвхөн эх орондоо төдийгүй олон улсад хэдийнэ танигдаж “Mongolia Property Awards”-аас 2017 онд Нийгмийн хариуцлага хэрэгжүүлэгч шилдэг компани, 2018 онд “Парк Вью хотхон”, “Парк-Од Молл” бүтээн байгууллагын оны шилдэг бүтээн байгуулалт шагналуудыг тус тус хүртээд байгаа нь Монголын барилгачид олон улсад хэр үнэлэгдэж буйн нэг илэрхийлэл гэж хэлж болно.

-Тухайн үед Монголчууд бие дааж барилгын салбар руу хүчтэй орж чаддаггүй. Гаднынхан буюу Оросууд голлон барилга барьдаг байсан. Тийм болохоор ажил олж, барилга барина гэдэг амаргүй даваа байсан уу?

-Үнэхээр тухайн үед манай улсын барилгын салбарт гол тоглолт хийдэг хүмүүс нь Зөвлөлт Социалист Бүгд Найрамдах Холбоот Улс /хуучнаар/-ын барилгачид байсан. Яахав манайхан барилга барина гэхдээ л Монголчуудын барьсан барилга Оросуудынхаас эрс өөр гэхүүдээ. Гол шалтгаан нь барилгын зах зээлийн систем нь өөрөө бүрдээгүй байсан. Систем гэдэг нь зургийн захиалга өгөхөөс эхлэн газар сонголт, барилга угсралт, ажилтнуудаа цалинжуулах, улсын комисст хүлээлгэн өгөх хүртэлх циклийг хэлж байгаа хэрэг. Харин бидний хувьд ажлаа алхам алхмаар урагшлуулж байсан. Эхлээд барилгын засал хийлээ, тодорхой хугацааны дараа барилга угсралт зэргээр бага, багаар ахиц дэвшилттэйгээр урагшилсан. Миний хувьд эхний үед ажилтнуудаа мэргэшүүлэн, чадавхижуулах, нөгөө талаар зэх зээлийн орчинд ажиллах чадамжтай барилгачдыг бэлтгэхэд түлхүү анхаарсан. Үүний зэрэгцээ ажилтнуудынхаа нийгмийн асуудал, ажлын байраар хангах, хөдөлмөр хамгаалалтанд анхаарч байлаа. Учир нь тэр жилүүдэд буюу 1990 он гараад удаагүй зах зээл зогсонги болж тодорхой хэмжээгээр хүнсний хомсдол үүсч, юм юм л зогсонги шилжилтийн байдалд орсон. Социалист системээс зах зээлийн системд шилжсэн учраас мөнгөтэй хүн ч бараг үгүй. Энэ утгаараа захиалга маш цөөхөн. Одоогийн ХААН банк буюу хуучнаар Хөдөө аж ахуйн банк зэрэг 1-2 байгууллага л жижиг сажиг засвар үйлчилгээ хийлгэдэг. Тийм мөнгөөр компани яаж оршин тогтнох билээ. Компани гэдэг улс орныхоо өмнө хариуцлага хүлээхээс гадна ажилтнуудынхаа өмнө өндөр хариуцлага хүлээдэг. Иймээс бидний хувьд томоохон ажил олж хийх шаардлага тулгарсан. Тухайн үед мөнгөтэй байгууллага нь Монгол Оросын хувь нийлүүлсэн “Улаанбаатар төмөр зам” нийгэмлэг. Ингээд тус байгууллагын Замын-Үүдэд барих “Жинчин” зочид буудлын тендерт анх удаа оролцсон. Энэ тендерийн хамгийн хүчтэй өрсөлдөгч нь Оросын нэр хүндтэй, туршлагатай ”Зарубежстрой”, “Инкон” компаниуд байсан. Иймээс яах бол гэсэн эргэлзээ их байсан ч тухайн үедээ томд тооцогдох энэ бүтээн байгуулалтыг монголчууд бид өөрсдөө хийж үзэх юмсан гэсэн хүсэл, эрмэлзэл дүүрэн ажлаа эхлүүлсэн. Бидэнд эдгээр компаниуд шиг том, том барилга барьсан туршлага байхгүй ч барилга барих боломжтой гэдгийг ТЭЗҮ харуулсан учраас манай компанийг сонгосон гэж тендерийн комисс тухайн үед хэлж байсан. Ингээд бид шалгаран “Жинчин” зочид буудлыг хугацаанд нь буюу 11 сарын дотор барьж гүйцэтгэсэн. Ингэж ажилласнаар ажилтнууд минь ч тодорхой хэмжээнд дадлагажихын зэрэгцээ өөрсдийн хүч чадал, эрэмбээ мэдэж авч, ОХУ-ын барилгачидтай энэ тэнцүү барилга барьж чадах юм байна гэдэг их урам авсан. Ер нь манай компани энэ 30 жилийн хугацаанд зөвхөн хоёрхон тендерт л оролцсон. Хоёр дахь нь мөн л Улаанбаатар төмөр замын тасалбар худалдаалах төвийн барилга буюу төмөр замын буудлын хажуугийн билетийн кассын барилга шүү дээ. Энэ мэтээр бидний ажил эхэлсэн.

-Хүнд, хэцүү цаг үеүдэд та ямар бодлого барьж ажилласны үр дүнд өнөөдрийн энэ өндөрлөгт хүрч чадав аа?

-“Тэнгэр хол, газар хатуу” байсан ч шүдээ зуугаад зүтгэх үе байлаа. Яагаад гэвэл, зөвхөн миний хийх алхмаас миний гэр бүл, дээр нь ажилтнууд тэдний гэр бүл гээд маш олон хүний амьдрал надаас шалтгаалж байсан юм. Иймээс алдах эрхгүй гэсэн сэтгэлээр зүтгэж өдий хүрсэн. Мэдээж хүн л болсон хойно алдсан зүйл бий байх.
Барилга бол их нарийн салбар. Энэ салбарт ажиллахаар орж байгаа залуусыг би буруушаахгүй, харин ч дэмжинэ. Улс орныхоо энэ бүтээн байгуулалтад гар бие оролцох хэрэгтэй. Гэхдээ жаахан мэдлэг, туршлагатай болж байж орох ёстой. Тэгэхгүй бол алдаа эндэгдэл их гарна. Мөнхийн эрсдэлтэй салбар. Хэзээ нэгэн цагт асуудал үүсэхийг хэн ч үгүйсгэхгүй. Дээр нь барилга ганц хүний гараар босдоггүй барилгын мянга гаруй төрлийн материалаар, хэдэн зуун хүн гар бие оролцож олон төрлийн барилгын ажил хийж байж босдог. Аль нэг дамжлага дээр хэн нэгэн алдаж болно. Түүнийг инженер болон бригадын дарга эсвэл ажилтан нуугаад өнгөрч болно. Энэ тохиолдолд эрсдэл их гардаг. Иймээс алдаж болохгүй салбар учраас тогтмол хянах хэрэгтэй. Ер нь ямар нэг барилга барихдаа тэнд амьдрах, ажиллах хүнээ бодсон сэтгэл барилгачдад байх хэрэгтэй. Ийм сэтгэлгүйгээр барилга барина гэвэл хэцүү.

-Таны бодлоор төр, засгаас барилгын салбарыг дэмжсэн хамгийн сайн бодлого юу байна вэ?

-Энэ нь зөв бодлого болж чадсан гэж хэлчихээр зүйл бараг байхгүй. Миний хувьд МБҮА-ийг 10 жилийн өмнө байгуулалцахдаа амбиц хөөж, албан тушаал горилж байгуулсангүй. Зөвхөн барилгын салбарт бага ч болов хөгжил авчрах зорилгоор байгуулсан. Эхний үед энэ байгууллага төлөвшин тогтноход хүнд байсан. Харин сая 10 жилийн ойгоо тэмдэглэн өнгөрүүллээ. Салбарын холбоодуудаас хамгийн хүчтэй явж байгаа нь МБҮА. Би энэ байгууллагаараа дамжуулж улс төржсөнгүй. БХБЯ болон бусад төрийн байгууллагуудтай салбарын үйл ажиллагааг сайжруулахад анхаарч ажиллаж байна. Зөвхөн барилгын салбарын хөгжилд хувь нэмрээ оруулах, наад зах нь барилгын үйл ажиллагааны тусгай зөвшөөрлөө өөрсдөө мэддэг, зарим ажил хэрэгт бидний дуу хоолойг сонсдог байхын төлөө байгуулсан. Ингэж зөв бодлогоор ажиллаж байгаа учраас өнөөдөр дажгүй ажиллаж яваа гэж би боддог. Үүнтэй адил аливаа улс орны төр засаг, бизнес эрхлэгчдээ зөв бодлогоор дэмжиж, чиглүүлж явах ёстой. Түүнээс хувийн хэвшлийнхний урдуур орж бизнесийн үйл ажиллагаанд нь оролцох ёсгүй. Бид барилга, орон сууцаа барьж босгоод мөрөөрөө явж байна. Гэтэл зэрэгцээд төр нь барилга орон сууц барьж жам ёсоор хөгжиж байгаа зах зээлд өрсөлдөөний шударга бус байдал үүсгээд байна шүү дээ. Чөлөөт өрсөлдөөний зөв бодлогыг бий болгох хэрэгтэй юм. Төр нь барилгын компаниудад захиалга өгөөд түрээсийн орон сууцаа бариулах ёстой байтал төрийн компани байгуулчихаад туслан гүйцэтгэх компаниудаар барилга бариулна гэдэг байж болох уу. Барилгын салбарын энэ жижигхэн зах зээлийг хайрлаж явахгүй бол уналтанд ороход маш амархан. Иймээс л төр бодлогоо зөв тогтоогоод дээр нь төрд ажиллаж байгаа ажилтнууд нь мэргэжилдээ чадамжтай, улс төр, нам гэж талцахгүйгээр улс орныхоо хөгжлийн төлөө ажиллах ёстой. Дээр нь хуулиа мөрдөж ажиллах хэрэгтэй байна. Хамгийн сүүлд хэлэхэд, аль нам гарч ирэх нь хамаагүй, төрийн байгууллагын төрд ажиллаж байгаа мэргэшсэн суурь ажилтнуудаа л халмааргүй байна. Яам ч, хот ч ялгаагүй. Энэ хамгийн аюултай. Төрийн албан хаагчдыг тэр чигт нь өөрчлөөд дадлага туршлагагүй хүмүүс тавьчихдаг. Тэр улсуудаас болж төр өөрөө тэнцвэргүй байдалд орчхоод байгааг ойлгодог ч юм уу даа.

-Таныг барилга дээрээ жаахан л алдаа гарвал шууд нураалгадаг их хатуу бас зарчимч хүн гэж ярихыг нэг бус хүнээс сонслоо. Ингэхэд та хэр хатуу хүн бэ?

-Барилгачин хүний гар хурдан, нүд нь хурц, хөл дээрээ бат зогсч чадаж байж сая барилга барьдаг. Нэгдүгээрт, барилгачин хүн  1 давхарт 1 см алдсан бол 10 давхарт 10 см, 16 давхарт 16 см алдана биз дээ. Барилгачин хүн маш өндөрт өндөр эрсдэлтэй нөхцөлд ажилладаг учраас тэр шүү дээ. Хоёрдугаарт, ажилдаа чадвартай, үнэнч, өгсөн үүрэг даалгаврыг чанартай гүйцэтгэдэг ажилчидтай болохыг ямар ч компаний захирлууд хүсдэг. Тэгвэл ийм ажилчид гэнэт хүрээд ирэхгүй. Тиймээс гүйцэтгэлийг сайн шалгаж, хянаж, ажлын явцад нь ойлгуулж засаж, залруулж ажилласнаар бидний хүсдэг тэр ажилчид мэргэжлийн хувьд төлөвшин мэргэшдэг гэж миний хувьд боддог. Тэгж ч ажиллахыг зорьдог.  Иймээс барилгын компанийн удирдлагуудын хараа хурц байх хэрэгтэй. Ажилтнуудаасаа илүү хурц байж барилгаа хянана. Миний хувьд ажилчидтайгаа илэн далангүй харилцаж чаддаг. Мэдээж хатуу үедээ хатуу, зөөлөн үедээ зөөлөн. Хамгийн гол нь бие биенээ ойлгож ажиллах нь гол. Аливаа байгууллагын удирдлага уулзахаар ирсэн ажилтнуудынхаа үгийг гүйцэд сонсож чаддаг байх хэрэгтэй. Тэр ажилтан өөрийн хүндрэлтэй асуудал, шинэ санаа, оноо, санал бодлоо солилцоход анхааралтай сонсож дуусгаад хариу бодлоо ярьдаг байвал их зөв гэж бодож ажилладаг.


 
-Одоо хоёулаа таны нутаг усны талаар ярилцлагаа үргэлжлүүлье. Таны уугуул нутаг хаана вэ?

-Аав ээжийн минь нутаг Өвөрхангай. Аав маань Есөнзүйл сум, хуучнаар Илдэн бэйлийн хошуу буюу Өндөр гэгээн Занабазарын мэндэлсэн газар, шорооны ойролцоо төрсөн хүн. Өндөр гэгээн Занабазар нь Монголын газар шороон дээр нэг ч хятад хүн хүрз барихгүй, бас хятад хүн монгол хүнтэй суухгүй байх шаардлага тавьж, Манжтай гэрээ байгуулсан гэдэг. Магадгүй тэр нь өнөөдөр бидний оршин тогтнох үндэс болсон байх. Харин ижий минь Өвөрхангай аймгийн Хайрхандулаан сумынх. Миний  төрсөн нутаг Сэлэнгэ аймгийн Зүүнхараа гэж сайхан нутаг байна.
Ижий минь 2 ахтай. Түүний нэг нь Булган аймгийн намын хорооны даргаар 15 жил ажилласан. Миний хувьд бага наснаасаа их очдог байлаа. Ахынхаа машины хойно суугаад очоогүй сум, баг бараг байхгүй дээ. Сүүлийн 20 гаруй жилийн турш Булган аймгийн Хутаг-Өндөр суманд аж, ахуйн бизнес эрхэлж, сардаа заавал нэг удаа эсвэл 2-3 удаа очиж ажилладаг. Одоо ингээд бодохоор бидний хувь тавилан сонин. Ах маань намын хорооны даргаар ажиллах үедээ Хатанбаатар Магсаржавын шарилыг Хутаг-Өндөрийн хажуу дахь Цагаан бургасын даваанаас аваад Булганы төв дээр бунхан байгуулсан байдаг. Цаанаас нэг юм хэлээд байх шиг. Юу вэ гэвэл ах маань уг бурхныг бүтээн, их хүчний нэрэмжит амралт сувиллыг барьж байгуулсан гээд бодохоор учиртай шүү. Гэтэл одоо “Баатарван” амралт сувиллыг 2015 онд барьж, ашиглалтад орууллаа. Ингээд бодохоор учиргүй юм гэж байдаггүй бололтой.

-Ингэхэд та ямар мэргэжилтэй юм бэ?

-1977 онд Худалдааны техникум төгссөн бөгөөд таваар судлалын мэргэжилтэй.

-Худалдааны салбарын хүн яаж яваад барилга руу орчихов оо. Ямар өдөөгч байв.

-Барилгын ажилд багаасаа сонирхолтой байлаа. Аав, ээж минь гэртээ засварын ажил их хийнэ. Энэ ажилд би бас маш сонирхолтой багсыг нь аваад будаж гарна. Мөн сургуульд байхдаа шугам зурагт дур сонирхолтой байсан. Изометр биет дүрсийг тэгш өнцөгтийн 3 биед хувирган зурах их сонирхолтой. Эдгээр сонирхол эсвэл хобби нөлөөлсөн үү, бүү мэд. Ер нь тэр үеэс барилгын ажил хийж болмоор гал сэтгэлд зурсхийсэн дээ (инээв). Харин барилгын талбар дээр ажиллах хугацаандаа цаг үргэлж мэргэжлийн хүмүүсээс суралцаж байсан. Түүнээс барилгын мэргэжлээр сурсан зүйл байхгүй. Тэгээд ч хүн ажлыг гололгүй сэтгэлээсээ хийвэл үр өгөөжөө цаг үргэлж өгдөг юм байна гэж мэдэрсэн.

-Барилгын салбарт өрсөлдөөн хэр байна. Тэр нь яаж мэдрэгддэг вэ. Мөн энэ салбарт ажиллаж байгаа хүмүүсийн мэргэжлийн чадвар өсөж байна уу?

-Өрсөлдөөн мэдээж байна. Хийж байгаа төслүүд нь цаг хугацаандаа хэрэгжиж байна уу, барьсан бүтээгдэхүүн нь ард түмний сэтгэлд хүрч байна уу, захиалга борлуулалт, эдийн засаг талдаа нөлөөлөл юу байна, бизнес төлөвлөгөөгөө яаж зөв зохицуулж байна вэ ч гэдэг юм уу, өрсөлдөөн бүх талаар явагддаг. Жишээлбэл, миний ганц баримталдаг үзэл бодол бол бизнесээ хийх. Ийм учраас ямар ч улс төрийн намд элсэж явсангүй. Ер нь улс төр хийдэг хүмүүс улс төрөө хийгээд, бизнес хийдэг нь бизнесээ хийгээд өөр өөрсдийнхөө түвшинд хөгжөөд явбал Монгол Улс маш хурдан хугацаанд хөгжинө гэж бодож явдаг. Барилгын салбарын хувьд шинэ залуу компани их бий болж байна. Хурдацтай хөгжих хөгжлийн горим руугаа ч орж эхэлж байна. 2 хоногийн өмнө Эрхүү ороод ирлээ. Эрхүү, Улаанбаатар 2-ын хөгжил эрс, тэс харагдсан. Одоо төр засгаас жаахан дэмжээд өгвөл барилгын салбар илүү хөгжинө.  Утаа гээд гамшгийн хэмжээнд хүрсэн асуудлыг шийдвэрлэх ажил байна. Эхний ээлжинд хөдөө, орон нутгаас шилжин ирэгсдийг зохицуулах хэрэгтэй юм. Мөн түрээсийн орон сууцны бодлогыг дэмжих хэрэгтэй. Германд орон сууцнуудын ихэнх нь түрээсийнх. Монголчууд бид яагаад ийм орон сууцны хөтөлбөр боловсруулж, ард иргэд нь ийм орон сууцанд амьдарч болохгүй гэж. Өнөөдөр энэ төр засгийн гаргаж байгаа шийдвэрүүдээс амьдралтай нийцэж байгаа нь тун цөөхөн. Энэ төрийн өндөрлөгт байгаа зарим хүмүүс амьдрал ойлгохгүй юм. Амьдрал ойлгодог, мэдэрдэг хүн л асуудлыг шийдэхээс биш тэр бүхнийг мэдэхгүй хүн хэзээ ч засч, зөв шийдвэр, бодлого боловсруулахгүй.
Цаашилбал, монголчууд бидэнд тулгамдаад байгаа хүмүүс хоорондын харилцаа, хандлага, хувь хүний ёс зүй, хүмүүжлийн зөв сэтгэлгээ, боловсролын тогтолцоо гэх мэт маш олон асуудлыг шийдвэрлэж ажиллах хэрэгтэй байна. Мөн эрүүл мэндийн бодлого ч буруу зүг рүү яваад байх шиг.  Удахгүй энэ бүхнийг ойлгох байх.

-“Жигүүр Гранд” групп одоо ямар том төсөл дээр ажиллах гэж байна вэ?

-Гэр хорооллын дахин төлөвлөлт рүү орох бодолтой байгаа. Энэ жилээс эхлэлээ тавих байх. Тодруулбал, Баянзүрх дүүрэг, Чулуун-Овооны орчимд орон сууцны барилга барихаар зарим гэрээ хэлцэл хийгдээд эхэлсэн. Дундаж орлоготой айл, өрхөд зориулсан орон сууцыг бид хамгийн хямд өртгөөр, хамгийн боломжтой дээр нь чанартай барилгыг бүтээн босгохоор ажиллаж байна. Ер нь бид цаашдаа ийм айл, өрхөд зориулсан түрээсийн орон сууц барихад анхаарч ажиллана. Хамгийн гол нь хот зөв бодлогоор дэмжээд өгвөл бид ажиллахад бэлэн байгаа.

-Таны хувьд юун дээр одоо анхаарч ажиллаж байна вэ? 
 
-Гранд Мед эмнэлгийн ерөнхий захирлаар ажиллахын зэрэгцээ сувиллаа давхар хариуцан ажиллаж байна. Хүүхдүүд маань тусд ороод салбар компаниудын захирлаар  ажиллаж байна.

-Барилга, анагаах энэ 2 салбарыг харьцуулахад ямар байна вэ?

-Хоёулаа адилхан хариуцлагатай салбар учраас ажилтнуудаасаа би хариуцлагыг цаг үргэлж шаарддаг. Харамсалтай нь, манай монголчуудад төлөвшсөн нэг муухай зан байна. Энэ бол нэгнийгээ өөд нь гарах гэхээр доош түлхдэг араншин. Эрүүл мэндийн салбар буюу эмнэлэг дээр ажиллахад энэ нь илүү харагддаг. Ирсэн үйлчлүүлэгчдэдээ үйлчлэх гэхээр заавал нэг өө олж харж шүүмжлэхийг гол болгоно. Яахав нэг талаар зөв. Нөгөө талаар гомдмоор. Ер нь монголчууд нэгнийгээ их шүүмжилж дардаг. Дээр нь аль нэг эмнэлэг алдаа гаргасан бол зөвхөн тэр эмнэлгийн нэрийг хэлж, бичих ёстой. Гэтэл хувийн эмнэлэг гээд тэр чигт нь хавтгайруулаад явчихна. Ингэж болохгүй биз дээ. Үүнийг бид бодох ёстой. Энэ хэдэн хувийн эмнэлэг сайн, муу хэлэгдэн байж ард түмэндээ маш сайн тусламж, үйлчилгээг үзүүлж байгаа гэж миний хувьд боддог. Хэрэв энэ хувийн хэвшлийн эмнэлгүүд үгүй бол төр яах бол... Бас л бодох зүйлийн нэг болов уу.   

-Асуухгүй өнгөрч болохгүй нэг асуулт байна. Таны уран бүтээлийн талаар. Ойрд ямар уран бүтээл, юу хийж байна. Уран бүтээлийн тоглолт, төлөвлөсөн зүйл юу байна вэ?

-Бие даасан уран бүтээл явж байгаа. 5 дахь CD-гээ гаргахаар ажиллаж байна. 13 жилийн хугацаанд 50 орчим уран бүтээл хийжээ. Морин хуур наадамд 4 дуу маань дараалан шалгарсан байна. Иймээс 30 жилийн ойн дараа буюу ирэх 10 дугаар сараас уран бүтээлийн тайлан тоглолт хийх бодолтой байгаа.

-Ер нь яагаад хөгжим руу орсон билээ. Одоо ч таны өрөөнд төгөлдөр хуур байна.

-Сургуульд байхаасаа буюу 6, 7-р ангиасаа хөгжим сонирхож эхэлсэн. Тэр үед гитар олдохгүй цэцэрлэгээс мандалин авчирч тоглож сурч байлаа. Худалдааны техникумд суралцаж байхдаа сургуулийнхаа цахилгаан хөгжмийн хамтлагт шалгалт өгч, тэнцээд гитарчнаар 3 жил байлаа. Тэр үед цахилгаан хөгжим ид моодонд орж байсан. Дараа нь Дорноговь аймагт 2 жил ажиллахдаа аймгийн Соёлын ордонд ажлынхаа хажуугаар уран сайханч хийсэн. Тэндээсээ цэрэгт яваад бас л ангийнхаа цахилгаан хөгжмийн хамтлагт уран бүтээлээ үргэлжлүүлж байлаа. Тухайн үед “Битлз” хамтлагийн оргил үе байсан тул тэдний дуунуудыг дагаж дуулдаг. Тэр үеийн үзэгчид ч өөр байж дээ. Ер нь хобби.  Дуртай болохоор зүрх сэтгэлээсээ хийдэг. Хүн ер нь дуртай зүйл рүүгээ л тэмүүлдэг шүү дээ.
 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.