Дэлхийн хамгийн шилдэг нисэх онгоцны буудал

Дэлхийн хамгийн шилдэг нисэх онгоцны буудал
Сүүлийн 7 жил тасралтгүй “Дэлхийн шилдэг нисэх онгоцны буудал”-аар шалгарсан Сингапур улсын Чанги (Changi) нисэх онгоцны буудал нь ой мод, хиймэл хүрхрээ бүхий “Jewel” хүлээлгийн танхимаа өнгөрсөн сард албан ёсоор нээсэн билээ. "Magical garden" буюу "Ид шидийн цэцэрлэгт хүрээлэн" хэмээгдэж буй энэхүү гайхалтай бүтээн байгуулалтын зураг төслийг алдарт архитектор Moshe Safdie гаргасан байна. 



Задгай дээвэр дээрх усан сан, халуун рашаан, цэцэрлэгт хүрээлэн, ногоон төгөл дунд эрвээхий нисэлдэж, цөөрөмд нь загас сэлж, кино театр, хүүхэд болон томчууд тоглох боломжтой тоглоомын ертөнцтэй энэхүү нисэх онгоцны буудалд 1.3 тэрбум долларын өртгөөр гайхалтай цэцэрлэгт хүрээлэн бий болгосон нь энэ юм. 



Уг байгууламж нь газраас доош тав, газраас дээш тав нийт арван давхар бөгөөд архитектурын төгс шийдлийг эндээс харж болно. 14,000 метр квадрат ногоон байгууламж дунд таазнаас эгц доошоо урссан том хүрхрээтэй. Энэ нь дотор орчны төрөлдөө дэлхийн хамгийн өндөрт тооцогддог аж. Уг хүрхрээ нь борооны усаар ажиллах бөгөөд цэцэрлэгт хүрээлэнгийн 2500 гаруй мод, 100,000 бут сөөгийг усалдаг юм байна. Мөн шөнийн цагаар хүрхрээг ашиглан гайхалтай гэрлийн шоу үзүүлдэг нь олон сая зорчигчийн таашаалыг хүртжээ.



Сингапур нь ойн бүс ихтэй, үүгээрээ ч дэлхийд алдартай учраас уг утгыг илэрхийлсэн нисэх буудалтай болохыг зорьж, энэхүү гайхалтай бүтээн байгуулалтыг бий болгосон байна. 



Өнгөрсөн оны судалгаагаар уг нисэх онгоцны буудлаар 65.6 сая зорчигч үйлчлүүлсэн бөгөөд улсынхаа эдийн засагт томоохон хөрөнгө оруулдаг бүтээн байгуулалт.  Одоогийн байдлаар уг нисэх онгоцны буудал нь 100 гаруй агаарын тээврийн компани, 100 орчим улс орны 400 гаруй хот руу долоо хоногт 7,400 удаа барагцаалбал 80 секундэд 1 нэг удаа нислэг үйлддэг аж. 



​Дашрамд дуулгахад хамгийн анх 1981 онд албан ёсоор нислэг үйлдэж эхэлсэн бөгөөд хүлээлгийн танхимын зарим хэсэг бүрэн ашиглалтад ороогүй байсан юм.














 
 


 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.